ភ្នំពេញៈ ការចូលរួមយ៉ាងច្រើន និងយ៉ាងផុលផុស
របស់យុវជនវ័យក្មេង នៅក្នុងយុទ្ធនាការឃោសនាបោះឆ្នោត
របស់គណបក្សនយោបាយដែលកំពុងតែប្រព្រឹត្តទៅនាពេលនេះ
ត្រូវបានអ្នកវិភាគយល់ថា អាចនឹងធ្វើឲ្យលទ្ធផលនៃការបោះឆ្នោត
នៅចុងខែកក្កដានេះមានការប្រែប្រួលខ្លាំងហួសពីការស្មាន។
នៅប៉ែកខាងកើតឆៀង ខាងត្បូងសួនច្បារមុខវត្តបទុមវតី
ចាប់តាំងពីថ្ងៃបើកយុទ្ធនាការឃោសនាបោះឆ្នោតថ្ងៃទី២៧ ខែមិថុនាមក
គេឃើញក្រុមយុវជនវ័យក្មេងរបស់គណបក្សប្រជាជនរាប់រយនាក់
បានធ្វើយុទ្ធនាការឃោសនាយ៉ាងសកម្ម អំពាវនាវឲ្យប្រជាពលរដ្ឋ
ដែលធ្វើដំណើរតាមដងផ្លូវបោះឆ្នោតគាំទ្រគណបក្សប្រជាជន
ដែលមានលេខរៀងទី៤។
ចំណែកគណបក្សសង្គ្រោះជាតិ ដែលត្រូវបានគេមើលឃើញថា
កំពុងក្លាយទៅជាគូប្រកួតប្រជែងយ៉ាងខ្លាំងក្លា
ជាមួយគណបក្សប្រជាជននោះ ក៏មានក្រុមយុវជនយ៉ាងច្រើន រាប់រយនាក់
ចូលរួមដង្ហែក្បួនយ៉ាងផុលផុស ជារៀងរាល់ថ្ងៃ
មិនចាញ់គណបក្សប្រជាជនកម្ពុជាផងដែរ។
បើទោះបីជាក្រុមយុវជនគណបក្សប្រជាជន បានឈរជាប់ជាប្រចាំ
នៅតាមទីតាំងដែលមានប្រៀបក្តី
ក៏ប៉ុន្តែក្រុមយុវជនគណបក្សសង្គ្រោះជាតិ
តែងតែធ្វើការប្រមូលផ្តុំគ្នា ចាប់ពីម៉ោង ៤ រសៀលជារៀងរាល់ថ្ងៃ
នៅខាងមុខអគាររដ្ឋសភា
ហើយចាប់ផ្តើមដង្ហែក្បួនចេញទៅតាមដងផ្លូវនៅទូទាំងរាជធានីភ្នំពេញ
ដោយការស្រែកហ៊ោកញ្ជ្រៀវ ដោយសេចក្តីក្លាហាន
ហាក់ដូចជាមិនមានការភ័យខ្លាចអ្វីឡើយ
ដោយធ្វើការអំពាវនាវឲ្យគ្រប់គ្នា បោះឆ្នោតជូនគណបក្សសង្គ្រោះជាតិ
ដែលមានលេខរៀងទី៧។ នៅតាមទីតាំងផ្សេងៗទៀតនៃរាជធានី
ក្រុមយុវជនដែលគាំទ្រគណបក្សទាំងពីរ
ក៏បានចូលរួមធ្វើយុទ្ធនាការឃោសនាបោះឆ្នោតយ៉ាងច្រើន
និងយ៉ាងសកម្មដែលមានភាពខុសគ្នាយ៉ាងខ្លាំង
បើប្រៀបធៀបទៅនឹងអាណត្តិមុនៗ។ចំណែកនៅតាមបណ្តាខេត្តនានា
ក៏ត្រូវបានគេរាយការណ៍ថា
មានយុវជនយ៉ាងច្រើនបានចូលរួមក្នុងយុទ្ធនាការឃោសនាដែលមិនមែនមាន
តែគណបក្សប្រជាជន និងគណបក្សសង្គ្រោះជាតិនោះទេ
គណបក្សហ៊្វុនស៊ិនប៉ិច ក៏មានយុវជនចូលរួមផងដែរ។
អ្វីដែលគួរឲ្យកត់សម្គាល់ជាងនេះទៅទៀតនោះ មានយុវជនជាច្រើន
មើលទៅមិនទាន់គ្រប់អាយុបោះឆ្នោតនៅឡើយ រួមទាំងក្មេងៗ
ក៏បានចូលរួមយ៉ាងសកម្មនឹងគេដែរ។
សិស្សវិទ្យាល័យវត្តភ្នំ អាយុ ១៧ឆ្នាំរៀនថ្នាក់ទី១០
ម្នាក់បាននិយាយថា៖
«ខ្ញុំមានអារម្មណ៍សប្បាយរីករាយក្នុងការចូលរួមហែក្បួនជាមួយ
គណបក្សសង្គ្រោះជាតិ។ ថ្ងៃនេះ
ជាថ្ងៃទំនេរដូច្នេះខ្ញុំចូលរួមជាមួយមិត្តភក្តិ។
ខ្ញុំស្រឡាញ់គណបក្សសង្គ្រោះជាតិ»។
និស្សិតស្រីម្នាក់ទៀត អាយុ២១ឆ្នាំ រៀននៅសាកលវិទ្យាល័យអន្តរជាតិ
(IU) បាននិយាយថា នាងគាំទ្រគណបក្សសង្គ្រោះជាតិ ពីព្រោះនាងគិតថា
សង្គមខ្មែរបច្ចុប្បន្ន មានការគ្រប់គ្រងរញ៉េរញ៉ៃមិនច្បាស់លាស់
ដែលនាងចង់ឲ្យគណបក្សប្រឆាំងឈ្នះ
និងធ្វើការផ្លាស់ប្តូររបៀបដឹកនាំប្រទេស។
នាងបានថ្លែងមុនពេលជិះម៉ូតូចេញ
ជាមួយមិត្តភក្តិក្នុងក្បួនដង្ហែថា៖
«ប្រជាជនវ័យក្មេងជាច្រើននៅវ័យអាយុដូចៗខ្ញុំមានការអប់រំខ្ពស់
ហើយពួកគេចង់ឃើញប្រទេសមានការផ្លាស់ប្តូរមេដឹកនាំ»។
បន្ទាប់ពីយុវជនរបស់គណបក្សសង្គ្រោះជាតិបើកម៉ូតូចេញទៅក្រុមអ្នក
គាំទ្រគណបក្សប្រជាជន
នៅជិតនោះដែលកំពុងរង់ចាំគ្នាត្រូវបានឃើញកំពុងកាន់ទង់ជ័យ
គណបក្សហើយថ្ពាល់របស់ពួកគេមានបិទស្លាកគណបក្សប្រជាជន
ពាក់មួកនិងអាវគណបក្សប្រជាជន។ សិស្សវិទ្យាល័យទួលស្វាយព្រៃ ឈ្មោះ
ងួន សំណាង អាយុ១៩ឆ្នាំរៀនថ្នាក់ទី១២បានថ្លែងថា៖
«ខ្ញុំមកទីនេះជាមួយមិត្តភក្តិនិងអ្នកជិតខាង»។
«ខ្ញុំនឹងចូលរួមនៅថ្ងៃបន្ទាប់ទៀត។
ខ្ញុំត្រូវបានគេឲ្យប្រាក់ចំនួន ២ម៉ឺនរៀលសម្រាប់ការមកនេះ»។
យុវជនផ្សេងទៀតដែលបដិសេធមិនប្រាប់ឈ្មោះ
ក៏បាននិយាយដូចសំណាងដែរថា
ពួកគេត្រូវបានគេផ្តល់ប្រាក់ឲ្យក្នុងម្នាក់ៗ
២ម៉ឺនរៀលក្នុងមួយថ្ងៃ។ ប៉ុន្តែពួកគេនិយាយថា ពួកគេមិនមែនមកហែ
ព្រោះតែប្រាក់នោះទេ។ «ពួកខ្ញុំចង់ចូលរួមផ្ញើសារ
ប្រាប់ទៅប្រជាពលរដ្ឋ
ឲ្យបន្តបោះឆ្នោតគាំទ្រគណបក្សប្រជាជនពីព្រោះគណបក្សប្រជាជន
បានជួយរំដោះប្រទេសឲ្យរួចផុតពីការកាប់សម្លាប់របស់ខ្មែរក្រហម
និងបានធ្វើឲ្យប្រទេសមានសន្តិភាពនិងមានការអភិវឌ្ឍរហូតមកដល់
សព្វថ្ងៃ»។
លោក ទេព នីថា អគ្គលេខាធិការនៃគណៈកម្មាធិការជាតិរៀបចំការបោះឆ្នោត
គ.ជ.ប ហាក់ដូចជាមិនបានលើកទឹកចិត្ត
ចំពោះការចូលរួមរបស់ក្រុមយុវជននេះទេ
ដោយថ្លែងថាការចូលរួមដង្ហែក្បួនរបស់ពួកគេ
បានបង្កឲ្យមានភាពស្មុគស្មាញ។
លោកថ្លែងក្នុងកិច្ចប្រជុំជាមួយគណបក្សពីម្សិលមិញថា៖«ពួកគេបើក
ម៉ូតូហែក្បួននៅពេលយប់
ដែលបណ្តាលឲ្យប៉ះពាល់ដល់សណ្តាប់ធ្នាប់សង្គមនិងសណ្តាប់ធ្នាប់
ចរាចរណ៍»។
លោក ហូ វ៉ាន់ បេក្ខជនតំណាងរាស្ត្ររបស់គណបក្សសង្គ្រោះជាតិ
បានថ្លែងថា អ្វីដែល គ.ជ.ប
បានលើកឡើងគឺជាការរារាំងសកម្មភាពដង្ហែក្បួនឃោសនាជាពិសេសការចូល
រួមរបស់យុវជន នៅពេលដែលយុវជនជាច្រើនបានចូលរួមជាមួយគណបក្សលោក។
លោកជួន សុវណ្ណ ស្នងការនគរបាលរាជធានីភ្នំពេញ បានប្រាប់ភ្នំពេញ
ប៉ុស្តិ៍ថា
វាមានភាពស្មុគស្មាញមួយចំនួនខណៈកំពុងមានយុទ្ធនាការឃោសនាបោះឆ្នោត
នាពេលបច្ចុប្បន្ននេះ ព្រោះគណបក្សនយោបាយមួយចំនួន មិនគោរពច្បាប់
និងបទប្បញ្ញត្តិផ្សេងៗ ជាពិសេសពាក់ព័ន្ធនឹងទីតាំងប្រមូលផ្តុំ
និងទិសដៅហែ។ លោកបន្តថា ពាក់ព័ន្ធនឹងករណីយុវជន
ដែលមិនទាន់គ្រប់អាយុបោះឆ្នោត
ហើយចូលរួមការប្រមូលផ្តុំដង្ហែក្បួនគឺជាបញ្ហាស្មុញស្មាញធំមួយ
សម្រាប់នគរបាល«ពួកគេបើកបរគ្មានសណ្តាប់ធ្នាប់
និងបំពានលើច្បាប់ចរាចរណ៍»។
យ៉ាងណាក៏ដោយ លោកកែម ឡី អ្នកវិភាគនយោបាយឯករាជ្យ
បានចាត់ទុកការចូលរួមរបស់យុវជន ថាជាការល្អប្រសើរ។
លោកបានមានប្រសាសន៍ថា៖«កាលពី ១០-២០
ឆ្នាំមុនក្រុមយុវជនដែលគាំទ្រគណបក្សប្រឆាំង
មានការលាក់មុខលាក់មាត់ភ័យខ្លាច។ ប៉ុន្តែឥឡូវនេះ
ពួកគេបានចូលរួមដោយបើកចំហ»។
លោកបញ្ជាក់ថា៖«ការចូលរួមយ៉ាងច្រើនរបស់យុវជនចង់មិនចង់
នឹងធ្វើឲ្យលទ្ធផលនៃការបោះឆ្នោតលើកនេះ
មានការប្រែប្រួលយ៉ាងខ្លាំង»។ បើតាមលោក កែម ឡី
ការចូលរួមយ៉ាងច្រើនរបស់យុវជនជាមួយគណបក្សនយោបាយលើកនេះ
គឺមួយផ្នែកធំ តាមរយៈបណ្តាញព័ត៌មានសង្គមហ្វេសប៊ុក
ដែលពួកគេអាចទាក់ទងចែករំលែកព័ត៌មានឲ្យគ្នា
និងទទួលបានព័ត៌មានផ្សេងៗឆាប់រហ័ស៕ PS
ប្រភពពី៖ Cambodiapage 
No comments:
Post a Comment