រាជធានីភ្នំពេញ ៖ តាមការសង្កេតជាក់ស្តែង
របស់មន្ត្រីជាន់ខ្ពស់មួយរូប បានបង្ហើបឲ្យដឹងថា កាស៊ីណូ
ណាហ្គាវើល មិនត្រឹមតែជាពិភពបនល្បែងស៊ីសង
ប្រមូលលុយពីអ្នកញៀនល្បែង ស៊ីសងជនជាតិខ្មែរប៉ុណ្ណោះទេ
ប៉ុន្តែវាជាកន្លែងសម្រាប់ នារីក្មេងៗស្រស់ស្អាត
មួយចំនួនទៅស្វែងរកសេវាក្រៅប្រព័ន្ធ ដែល
គេបានចំណាយលុយ បន្តិចបន្តួចទៅលេងល្បែងនៅទីនោះ ដើម្បីទាក់បុរសៗ
ដែលទៅលេងល្បែងស៊ីសង ពីព្រោះគេដឹងថា បុរសៗដែលញៀនល្បែងនៅទីនោះ
ភាគច្រើនសុទ្ធតែជា អ្នកមានលុយ និងជាមន្ត្រី នៅក្នុងជួររដ្ឋាភិបាល។
ភ្ញៀវដែលចេញចូល ទ្បើងទៅជាន់ខាងលើនៃ អគារកាស៊ីណូ ណាហ្គាវើល
សុទ្ធតែបានឃើញ អ្នកលេងល្បែងនៅជាន់ផ្ទាល់ដី
គឺមានទាំងខ្មែរនិងបរទេស ហើយអ្វីដែលគួរឲ្យចាប់អារម្មណ៍នោះ
ស្ត្រីវ័យប្រហែលជាង ៤០ឆ្នាំម្នាក់ ទំនងជាអ្នកមានប្រាក់ស្តុកស្តម
អង្គុយនៅខាងមុខទូហ្គេម អេទ្បិចត្រូនិច ជាមួយមិត្តភក្តិរបស់គាត់
ពីរ-បី នាក់ទៀត នៅពេលគាត់ចាញ់ល្បែងស្ពឹកមុខ
គាត់បានយកដៃទះទូហ្គេម អេទ្បិចត្រូនិចនោះ ហើយបានលាន់មាត់ថា
«ចាញ់ទៀតហើយ…!»។
នៅកាស៊ីណូ ណាហ្គាវើល ជាពិភពល្បែងស៊ីសង យ៉ាងសម្បូរបែប
គឺមាននៅជាន់ផ្ទាល់ដី និងបន្ទប់ពិសេសនៅជាន់លើ
សម្រាប់បំពេញតម្រូវការ ឲ្យមន្ត្រីមួយចំនួន ដែលនិយមយកកាស៊ីណូ
ធ្វើជាប៊ុយរ៉ូ កម្សាន្តសម្បាយ។ ដូចដែលបុរសម្នាក់ជាជនជាតិខ្មែរ
ដែលបានដើរចេញពីកន្លែង លេងល្បែងនៅជាន់ផ្ទាល់ដី បានសារភាពថា
យូៗម្តងគាត់តែងតែមកលេងល្បែង នៅកាស៊ីណូណាហ្គាវើល
ជាពិសេសនៅពេលទំនេរពីការងារ និងមានអារម្មណ៍តប់ប្រមល់
ប៉ុន្តែលេងមិនដែលឈ្នះនោះទេ គឺចាញ់អស់គូថខោ តែរហូត។
ក្រុមហ៊ុនកាស៊ីណូ ណាហ្គាវើល របស់ជនជាតិម៉ាឡេស៊ី ឈ្មោះ តាន់ស្រ៊ី
ចិនលិបគឿង បានបង់ពន្ធចូលរដ្ឋតិចតួចបំផុត
ព្រោះកន្លងមកគេសង្កេតឃើញប្រាក់ចំណូលរបស់កាស៊ីណូជាច្រើនកន្លែង
បានកើនឡើង រីឯប្រាក់ចំណូល ដែលបានមកពីល្បែងស៊ីសង របស់កាស៊ីណូណាហ្គា
នៅតែតិចតួច មិនមានតុល្យភាពទៅនឹង ការប្រកាសពីប្រាក់ចំណូល
ដ៏ច្រើនសន្ធឹកសន្ធាប់របស់ម្ចាស់កាស៊ីណូនោះទេ។ ក្រុមហ៊ុនកាស៊ីណូ
ណាហ្គាវើល បានអួតអាងថា ប្រាក់ចំណូលរបស់ពួកគេ
បានមកដោយសារកំណើនទេសចរណ៍ និងស្ថិរភាពនយោបាយក្នុងប្រទេសកម្ពុជា។
ការវិនិយោគល្បែងស៊ីសង នៅតាមកាស៊ីណូ
បើតាមគោលការណ៍របស់រាជរដ្ឋាភិបាល គឺកំណត់ឲ្យតែជនបរទេសប៉ុណ្ណោះ
ចូលលេងល្បែងស៊ីសង ប៉ុន្តែភាពជាក់ស្តែងនៅក្នុង កាស៊ីណូ ណាហ្គាវើល
គេសង្កេតឃើញមានពលរដ្ឋខ្មែរ ប្រហែល ៩០ភាគរយ បានចូលទៅលេងល្បែងស៊ីសង
យ៉ាងអនាធិបតេយ្យ ហើយប្រាក់ចំណេញដែលបានកើនឡើង ជាលំដាប់របស់ក្រុមហ៊ុន
កាស៊ីណូ ណាហ្គាវើល ច្បាស់ណាស់ដែលថា បានមកពីក្រុមអ្នកញៀនល្បែង
ជាជនជាតិខ្មែរ ដែលចាញ់អស់គូថខោនោះឯង ដូចជាប៉ុន្មានខែមុននេះ
មានការភ្ញាក់ផ្អើលចំពោះម្ចាស់ស្តារម៉ាត ធំៗចំនួន៣កន្លែង
ដែលចាញ់ល្បែងឡុងចុង រហូតបិទហាង។
កាស៊ីណូ ណាហ្គាវើល បានបើកធ្វើអាជីវកម្មនៅកណ្តាល
រាជធានីភ្នំពេញតែម្នាក់ឯង បន្ទាប់ពីរាជរដ្ឋាភិបាលកម្ពុជា
បានបិទអាជីវកម្មស្លុតម៉ាស៊ីន និងកាស៊ីណូតូចតាចរាប់រយកន្លែង
ហើយកាស៊ីណូដទៃទៀត ត្រូវបានបញ្ជាឲ្យសាងសង់ឆ្ងាយ ពីរាជធានីភ្នំពេញ
យ៉ាងហោចណាស់២០០ គីឡូម៉ែត្រ ហើយភាគច្រើនទីតាំងកាស៊ីណូ
មានតែនៅតាមព្រំប្រទល់ដែន គឺបើកសម្រាប់តែក្រុមអ្នកញៀនល្បែង
ដែលជាជនជាតិបរទេសតែប៉ុណ្ណោះ ដូច្នេះកាស៊ីណូ ណាហ្គាវើល
គ្រប់ទឹកក្នុងការប្រមូលលុយ ពីអ្នកញៀនល្បែងស៊ីសង
នៅកណ្តាលរាជធានីភ្នំ ពេញ។
នៅក្នុងកាស៊ីណូ ណាហ្គាវើល នេះផងដែរ គេសង្កេតឃើញមានអ្នករកស៊ី
បញ្ចាំទ្រព្យជាជនជាតិខ្មែរ រាប់សិបកន្លែង
មានទាំងក្នុងនិងក្រៅកាស៊ីណូ អាចបញ្ជាក់បានថា នៅក្នុងកាស៊ីណូ
ណាហ្គាវើល មានជនជាតិខ្មែរចូលលេង ច្រើនសន្ធឹកសន្ធាប់ដែលពេលខ្លះមាន
ទាំងយុវវ័យ អ្នកជំនួញ មន្ត្រីរាជការ គេមិនដែលឃើញសមត្ថកិច្ច
ដែលយាមប្រចាំការនៅក្នុងកាស៊ីណូ ណាហ្គាវើល ចាត់វិធានការទប់ស្កាត់
ជនជាតិខ្មែរទាំងនោះ ឲ្យស្របតាមបទបញ្ជា របស់រាជរដ្ឋាភិបាលម្តងណាឡើយ។
ទីតាំងកាស៊ីណូ ណាហ្គាវើល នេះផងដែរ ជារឿយៗគេសង្កេតឃើញ
មានអ្នកធ្វើអត្តឃាតដោយសារ ចាញ់ល្បែងស៊ីសង តាមរយៈការលោតសម្លាប់ខ្លួន
មានទាំងជនជាតិខ្មែរ និងបរទេស ហើយតាមធម្មតា អ្នកដែលញៀនល្បែងស៊ីសង
នៅក្នុងកាស៊ីណូ ណាហ្គាវើល ត្រូវបានគេពង្វក់ស្មារតី
ចូលលេងមិនចង់ចេញវិញទេ ហើយនៅពេលមានលុយច្រើនក្នុងដៃ
គេធ្វើឲ្យរំភើបរីករាយយកលុយទៅដូរ ជាកាក់ដែលធ្វើពី ក្រដាស
នាំឲ្យមនុស្សយកទៅភ្នាល់ ក្នុងការលេងល្បែង ដោយគ្មានស្តាយស្រណោះ។
ពេលខ្លះទៀត ក្រុមអ្នកជំនាញបច្ចេកទេស ដែលប្រចាំការនៅក្នុង កាស៊ីណូ
ណាហ្គាវើល ប្រសិនបើសង្កេតឃើញម៉ូយថ្មី
គឺគេសៀរ៉េម៉ាស៊ីនឲ្យអតិថិជនឈ្នះ ដើម្បីមានការរំភើបចិត្ត
ហើយក្រោយមក គេក៏សៀរ៉េម៉ាស៊ីន ឲ្យស៊ីអស់គូថខោទៅវិញ។
នៅបណ្តាប្រទេសដទៃ គេមានគណៈកម្មការពិសេស
ត្រួតពិនិត្យប្រតិបត្តិការរបស់កាស៊ីណូ យ៉ាងយកចិត្តទុកដាក់
ទាំងផ្នែកបច្ចេកទេស និងសេវាកម្ម ហើយគេដាក់កំហិតឲ្យ ម្ចាស់កាស៊ីណូ
មានឱកាសកោរអតិថិជន របស់ខ្លួនតាមម៉ាស៊ីន ឬបច្ចេកទេសប្រមាណ
៧ភាគរយប៉ុណ្ណោះ បើមិនដូច្នេះទេ នឹងត្រូវពិន័យ។
ប៉ុន្តែសម្រាប់ប្រតិបត្តិការ នៅតាមកាស៊ីណូ ក្នុងប្រទេសកម្ពុជា
នាពេលបច្ចុប្បន្ននេះ ម្ចាស់កាស៊ីណូ អាចធ្វើអ្វីៗតាមតែអំពើចិត្ត
គឺគេសៀរ៉េម៉ាស៊ីន ដើម្បីស៊ីអតិថិជនខ្លួនឯងដល់ទៅ ៧០ភាគរយឯណោះ
ដូច្នេះឱកាសឈ្នះស្ពាយលុយទៅផ្ទះវិញ មានតែ៣០ភាគរយប៉ុណ្ណោះ។
ក្រុមហ៊ុនកាស៊ីណូ ណាហ្គាវើល បានកោរអតិថិជនខ្លួនឯងអស់គូថខោ
សឹងរាប់ភ្លេចទៅហើយ ទើបក្រុមហ៊ុនកាស៊ីណូ មួយនេះ
ទទួលបានប្រាក់ចំណេញកើនឡើង ពីមួយឆ្នាំទៅមួយឆ្នាំ
ប៉ុន្តែមានការបង់ពន្ធជូនរដ្ឋ ក្នុងកម្រិតតិចតួចប៉ុណ្ណោះ ៕
No comments:
Post a Comment