Khmervital ខ្មែរវ៉ាយថល: July 2013

Sunday, July 28, 2013

អង្គការសង្គមស៊ីវិលលើកឡើងពីភាពមិនប្រក្រតីពីបន្ទប់ស្ថានការណ៍បោះឆ្នោត

ដោយ ញឹម សុផល

សកម្មភាពអង្គការសង្គមស៊ីវិលនៅក្នុងបន្ទប់ស្ថានការណ៍បោះឆ្នោតនៃអង្គការ ខុមហ្រ្វែល

ខណៈដែលការបោះឆ្នោតកំពុងតែប្រព្រឹត្តទៅនៅទូទាំងប្រទេស អ្នកអង្កេតការណ៍បោះឆ្នោត ដែល គជប បានប្រកាសកាលពីម្សិលមិញថា មានចំនួនសរុបប្រមាណ ៤ម៉ឺន៤៥៦នាក់ នោះ កំពុងតែតាមឃ្លាំមើលដំណើរការបោះឆ្នោតនេះយ៉ាងយកចិត្តទុកដាក់។ ការសង្កេតការណ៍បោះឆ្នោត ក្រៅតែពីធ្វើឡើងនៅតាមការិយាល័យបោះឆ្នោតហើយ ក៏មានផងដែរនៅឯបន្ទប់ស្ថានការណ៍ថ្ងៃបោះឆ្នោត ឯទីស្នាក់ការអង្គការខុមហ្វ្រែល។ ជាកន្លែងរាយការណ៍ព័ត៌មាន ឬភាពមិនប្រក្រតីផ្សេងៗ ពីអ្នកសង្កេតការណ៍បោះឆ្នោតនៅតាមខេត្តនានា ផ្ដល់ជាបន្ទាន់ មកបន្ទប់ស្ថានការណ៍ថ្ងៃបោះឆ្នោត ដែលមានក្រុមអង្គការជាង៣០ កំពុងតែរង់ចាំទទួលនៅទីនោះ។

ក្រុមមន្ត្រីអង្គការសង្គមស៊ីវិល ឃ្លាំមើលបោះឆ្នោត បានប្រមូលផ្តុំគ្នានៅថ្ងៃបោះឆ្នោត ទី២៨
កក្កដានេះនៅទីស្នាក់ការអង្គការឃ្លាំមើលការបោះឆ្នោត ខុមហ្វ្រែល នៅទីក្រុងភ្នំពេញ បន្ទាប់ពីការបោះឆ្នោត បានដំណើរការរយៈពេល ជាង៣ម៉ោង។
នៅក្នុងបន្ទប់វិភាគស្ថានការណ៍បោះឆ្នោត មេដឹកនាំអង្គការសង្គមស៊ីវិល ភ្នាក់ងារ
សង្កេតការណ៍របស់អង្គការ បានរៀបរ៉ាប់ពីភាពមិនប្រក្រតីមួយចំនួនដែលក្រុមអ្នកឃ្លាំមើល
បានរាយការណ៍ដោយផ្ទាល់និងតាមប្រព័ន្ធ Hotline ពីតាមស្ថានីយ៍បោះឆ្នោតនានានៅទូទាំង
ប្រទេស។

លោក យង់ គឹមអេង, នាយកប្រតិបត្តិមជ្ឈមណ្ឌលប្រជាពលរដ្ឋដើម្បីអភិវឌ្ឍន៍និងសន្តិភាព និងជាសមាជិកគណៈកម្មាធិការនាយកខុមហ្វ្រែល បានបំពេញតួនាទីជាអ្នកសម្របសម្រួល
ដោយលោកអនុញ្ញាតឲ្យបណ្តាញអ្នកសង្កេតការណ៍អង្គការក្រៅរដ្ឋាភិបាលឡើងរាយការណ៍
អង្គការក្រៅរដ្ឋាភិបាលឡើងរាយការណ៍នូវបញ្ហាអវិជ្ជមាន ដែលបានកើតឡើង។

ក្នុងនោះមានបញ្ហាបាត់ឈ្មោះ ឬរកឈ្មោះមិនឃើញនៅក្នុងបញ្ជីរបោះឆ្នោត មានអ្នកទៅ
បោះឆ្នោតជំនួសអ្នកដទៃយ៉ាងឆាប់រហ័សបន្ទាប់ពីការិយាល័យបើកទ្វារ ប្រព័ន្ធទូរស័ព្ទ Hotline ដើម្បីសុំអន្តរាគមន៍ពីគណៈកម្មាធិការជាតិ រៀបចំការបោះឆ្នោតនៅពេលមានបញ្ហាមិនអាចទាក់ទងបាន បញ្ហាកង្វះខាតឯកសារបោះឆ្នោត។ល។និង។ល។

ក្រុមអង្គការសង្គមស៊ីវិល បន្តលើកឡើងបណ្តើរទទួលទូរស័ព្ទពីភ្នាក់ងាររបស់ពួកគេនៅតាម
បណ្តារស្ថានីយ៍បោះឆ្នោតដែលបានរាយាការណ៍ចូលជាបន្តបន្ទាប់បណ្តើរ។ ដោយមិនបង្អង់យូរ មន្ត្រីអង្គការសង្គមស៊ីវិល បានរាយការណ៍ផងដែរពីការតស៊ូរបស់យុវជន ក្នុងការស្វែងរក
ឈ្មោះរបស់ពួកគេដែលបាត់ឬរំកិលទៅនៅការិយាល័យផ្សេង ខុសពីមនុស្សចាស់មួយចំនួន
ដែលវិលទៅផ្ទះវិញ នៅពេលដែលរកឈ្មោះមិនឃើញ។

ការប្រទូសរាយគ្នារវាងជនជាតិខ្មែរ និងជនជាតិវៀតណាមដោយសារតែការរារាំងរបស់ជនជាតិខ្មែរនៅខេត្តកណ្តាល មិនឲ្យវៀតណាមចូលបោះឆ្នោត។ អំពើហឹង្សារក៏បាន
កើតឡើងផងដែរនៅមណ្ឌលបោះឆ្នោតមួយចំនួន ព្រមទាំងមានការឃាត់ខ្លួនអ្នកតវ៉ាដោយអាជ្ញធរការពារបរិវេណស្ថានីយ៍បោះឆ្នោត, នេះបើតាមការឲ្យដឹងពីអ្នកសង្កេតការណ៍បោះឆ្នោតនៅក្នុងបន្ទប់វិភាគស្ថានការណ៍បោះឆ្នោត។

លោក នី ចរិយា, ប្រធានផ្នែកអង្កេតសមាគមការពារសិទ្ធិមនុស្សអាដហុក បានថ្លែងថា បរិយាកាសបោះឆ្នោតនៅព្រឹកនេះ គិតមកទល់ត្រឹមម៉ោង ១០ ពិតជាមានការប៉ះពាល់ដល់តម្លៃនៃការបោះឆ្នោត ដោយលោកលើកឡើង ៣ចំណុច គឺគុណភាពនៃសម្ភារៈបំរើដល់ការ
បោះឆ្នោត ការរៀបចំទូទៅនិងមានការទាក់ទងទៅហ្នឹងអាជ្ញាធរមូលដ្ឋានផងដែរ។
ដោយសារតែមានភាពមមាញឹកខ្លាំង មន្ត្រី គ.ជ.ប នៅមិនទាន់មានអត្ថាធិប្បាយណាមួយនៅឡើយទេ តបទៅហ្នឹងការឡើទេ តបទៅហ្នឹងការលើកឡើងរបស់អង្គការសង្គមស៊ីវិល
ទាំងនេះ។
ប្រភពពី៖ ខេមរភាសា

ប្រជាពលរដ្ឋសំណូមពរឲ្យគ្រប់គណបក្សនយោបាយទាំងអស់ប្រកាន់នូវគោលជំហរអហិង្សា ទោះបីជាត្រូវចាញ់ឬឈ្នះក៏ដោយ

រាជធានីភ្នំពេញ ៖ ថ្ងៃទី២៨ ខែកក្កដា ឆ្នាំ២០១៣ គឺជាពេលវេលាដ៏ពិសេសមួយ ដែលប្រជាពលរដ្ឋខ្មែរទាំងអស់បាននាំគ្នាប្រើសិទ្ធិក្នុងនាមជាប្រជាពលរដ្ឋដើម្បីទៅបោះឆ្នោតធ្វើការសម្រេចចិត្តជ្រើសតាំងតំណាងរាស្ត្រ អាណត្តិទី៥ ដើម្បីដឹកនាំកសាង និងអភិវឌ្ឍន៍ មាតុភូមិកម្ពុជាបន្តរយៈពេល៥ឆ្នាំខាងមុខទៀត។

នៅក្នុងព្រឹកនេះដែរ គេសង្កេតឃើញនៅតាមមណ្ឌលបោះឆ្នោតនីមួយៗមានប្រជាពលរដ្ឋជាច្រើនបាននាំគ្នាឈរតម្រង់ជួរខាងមុខការិយាល័យបោះឆ្នោត ដើម្បីត្រៀមខ្លួនក្នុងការចូលទៅគូសសន្លឹកឆ្នោត នៅក្នុងការិយាល័យ ក្នុងការជ្រើសតាំងគណបក្សនយោបាយណាមួយដែលពួកគេពេញចិត្ត និងជឿជាក់ថាអាចដឹកនាំនាវាកម្ពុជាឆ្ពោះលើផ្លូវអភិវឌ្ឍន៍ មានស្ថិរភាព និងសុខសន្តិភាព។

នៅក្នុងការបោះឆ្នោតជ្រើសតាំងតំណាងរាស្ត្រអាណត្តិទី៥នេះផងដែរ គឺមានគណបក្សចំនួន៨បានចូលរួមក្នុងការប្រកួតប្រជែងឈរឈ្មោះបោះឆ្នោត។ ប៉ុន្តែយើងសង្កេតឃើញមានតែគណបក្សធំៗចំនួន២ប៉ុណ្ណោះ ដែលមានសន្ទុះនៃការគាំទ្រពីប្រជាពលរដ្ឋដ៏ច្រើនប្រហាក់ប្រហែលគ្នា នោះគឺគណបក្សប្រជាជនកម្ពុជា និងគណបក្សសង្គ្រោះជាតិ។ គណបក្សទាំង២នេះ កំពុងក្លាយជាជម្រើសដ៏សែនពិបាកសម្រាប់ប្រជាពលរដ្ឋទូទៅ ព្រោះគណបក្សប្រជាជនកម្ពុជា គឺជាគណបក្សដែលបានគ្រប់គ្រងអំណាចនិងដឹកនាំប្រទេសកម្ពុជាអស់រយៈពេលជាយូរឆ្នាំ។ ចំណែកគណបក្សសង្គ្រោះជាតិ គឺជាគណបក្សមួយដែលរួមគ្នាបង្កើតឡើងរវាងគណបក្ស សម រង្ស៊ី និងគណបក្សសិទ្ធិមនុស្ស ដែលធ្វើឲ្យគណបក្សមួយនេះក្លាយជាគណបក្សប្រឆាំងដ៏មានប្រជាប្រិយភាពបំផុត។

គួររំលឹកផងដែរថា ក្នុងអំឡុងពេលយុទ្ធនាការឃោសនារកសំឡេងនាពេលកន្លងមក គឺគណបក្សធំៗទាំង២នេះ បានបង្ហាញនូវសក្តានុពលរៀងៗខ្លួន ដោយខាងគណបក្សនីមួយៗមានមនុស្សចូលរួមហែក្បួនឃោសនាយ៉ាងច្រើនកុះករដូចគ្នា រហូតឈានដល់ការប្រើអំពើហិង្សាដាក់គ្នាទៀតផង។ ប៉ុន្តែអ្វីដែលប្រជាពលរដ្ឋចង់បានពិតប្រាកដនោះ គឺសុខសន្តិភាព ស្ថិរភាព មិនមែនជាការប្រើអំពើហិង្សាដាក់គ្នានោះទេ ព្រោះប្រជាពលរដ្ឋខ្មែរជាច្រើនបានធ្លាប់ហែលឆ្លងកាត់នូវសង្គ្រាមស៊ីវិលដ៏រ៉ាំរ៉ៃជាច្រើនឆ្នាំមកហើយ ដូច្នេះប្រជាពលរដ្ឋមិនចង់ជួបនូវទិដ្ឋភាពនៃការបែកបាក់ក្រុមគ្រួសារ ព្រាត់ប្រពន្ធ ព្រាត់កូនទៀតនោះទេ។

បើតាមអ៊ុំស្រីម្នាក់ឈ្មោះ រស់ សុខា អាយុ៦៣ឆ្នាំ ដែលកំពុងឈរតម្រង់ជួរនៅពីមុខការិយាល័យបោះឆ្នោតបានឲ្យដឹងថា អ៊ុំស្រីសង្ឃឹមថា ទោះបីជាគណបក្សណាចាញ់ឬឈ្នះក៏ដោយ សូមកុំឲ្យមានកើតអំពើហិង្សា ឬជម្លោះដាក់គ្នាឲ្យសោះ សូមឲ្យគ្រប់គណបក្សនយោបាយទាំងអស់ប្រកាន់នូវជំហរអហិង្សា មុននឹងធ្វើអ្វីមួយសូមគិតពីសុខទុក្ខរបស់ប្រជារាស្ត្រជាធំ ព្រោះប្រសិនបើមានសង្គ្រាម ឬភាពវឹកវរណាមួយកើតឡើង អ្នកដែលរងទុក្ខវេទនានោះគឺប្រជារាស្ត្រខ្មែរ។ ដូចពាក្យចាស់លោកពោលថា ដំរីជល់គ្នា តែស្រមោចជាអ្នកស្លាប់៕ ដោយ : បញ្ញា

ប្រភពពី៖ វត្តភ្នំ

Saturday, July 27, 2013

ខុមហ្វ្រែលរកឃើញថា ទឹកខ្មៅជ្រលក់ដៃអ្នកបោះឆ្នោត អាចលុបលាងបានទាំងស្រុង

លោកគល់ បញ្ញា នៅក្នុងសន្និសីទកាសែតស្ដីពី «ការព្រួយបារម្ភពីគុណភាពទឹកខ្មៅជ្រលក់ដៃ និងបញ្ជីឈ្មោះអ្នកបោះឆ្នោត» កាលពីព្រឹកថ្ងៃទី២៧ កក្កដា ឆ្នាំ២០១៣

RFI/Im Rachna

ដោយ អ៊ឹម រចនា
ក្នុងសន្និសីទកាសែតកាលពីព្រឹកមិញ នៅទីស្នាក់ការខុមហ្វ្រែល ស្ដីពី «ការព្រួយបារម្ភពីគុណភាពទឹកខ្មៅជ្រលក់ដៃ និងបញ្ជីឈ្មោះអ្នកបោះឆ្នោត» លោកគល់ បញ្ញា នាយកប្រតិបត្តិអង្គការ អង្កេតការណ៍បោះឆ្នោតឲ្យដឹងថា លទ្ធផលនៃការធ្វើតេស្តន៍សាកល្បងគុណភាពទឹកខ្មៅជ្រលក់ដៃអ្នកបោះ ឆ្នោត បង្ហាញឲ្យឃើញថា ទឹកខ្មៅជ្រលក់ដៃអ្នកបោះឆ្នោត គឺអាច
លុបលាង
បានទាំងស្រុង។

ខុមហ្វ្រែល ឲ្យដឹងកាលពីព្រឹកថ្ងៃទី២៧ កក្កដា នេះថា ខ្លួនបានសាកល្បងលុបជម្រះទឹកខ្មៅជ្រលក់ដៃ ដែលគណៈកម្មាធិការជាតិរៀបចំការបោះឆ្នោត ហៅកាត់ថា គជប នឹងយកទៅប្រើប្រាស់ជ្រលក់ចង្អុលដៃអ្នកបោះឆ្នោត សម្រាប់ការបោះឆ្នោតជ្រើសតាំងតំណាងរាស្ត្រឆ្នាំ២០១៣។ ជាលទ្ធផល ខុមហ្វ្រែលសង្កេតឃើញថា ទឹកខ្មៅដែលជ្រលក់នៅទីស្នាក់ការ គជប អាចលុបចេញបានទាំងស្រុង ៣ម៉ោងក្រោយពីពេលជ្រលក់។
បញ្ហាគុណភាពទឹកខ្មៅជ្រលក់ដៃដែលអាចលុបលាងជ្រះនេះ បានក្លាយទៅជាការព្រួយបារម្ភ មួយថ្មី សម្រាប់សម្ព័ន្ធអង្គការសង្គមស៊ីវិលអង្កេតការណ៍បោះឆ្នោត។ បើតាមលោក គល់ បញ្ញា នាយកប្រតិបត្តិអង្គការខុមហ្វ្រែល ទឹកខ្មៅជ្រលក់ដៃដែលអាចលុបលាងជ្រះនេះ នឹងផ្ដល់ឱកាសដល់ជនទុច្ចរិតមួយចំនួន ដែលមានបំណងបន្លំបោះឆ្នោតពីរបីដង។ ការបោះឆ្នោតពីរ បីដងនេះ ត្រូវបានលោកអះអាងថា អាចធ្វើទៅបាន ដោយសារតែបញ្ជីឈ្មោះអ្នកបោះឆ្នោតសព្វថ្ងៃមានឈ្មោះស្ទួនជា ច្រើន។

ទាក់ទិននឹងបញ្ហានេះ លោក ទេព នីថា អគ្គលេខាធិការគណៈកម្មាធិការជាតិរៀបចំការបោះឆ្នោតបានបញ្ជាក់ប្រាប់ វិទ្យុបារាំង RFI ថា ទឹកខ្មៅនេះ គឺជាទឹកខ្មៅដែលខាងឥណ្ឌាផ្ដល់ឲ្យ ហើយដែលកម្ពុជា ធ្លាប់ទិញយកមកប្រើប្រាស់នៅក្នុងការបោះឆ្នោតមុនៗដែរ។

ដើម្បីឆ្លើយតបទៅនឹងបញ្ហាខាងលើ លោកទេព នីថា ឲ្យដឹងថា គជប នឹងរៀបចំសន្និសីទកាសែតមួយ នៅម៉ោង៤រសៀល ថ្ងៃសៅរ៍ ទី២៧កក្កដា ដើម្បីឲ្យប្រជាពលរដ្ឋអ្នកបោះឆ្នោត មានទំនុកចិត្តលើការរៀបចំរបស់ គជប លើទឹកខ្មៅ ក៏ដូចជាបញ្ជីឈ្មោះបោះឆ្នោត៕
ប្រភពពី៖ ខេមរភាសា

Thursday, July 25, 2013

គ.ជ.ប ព្រមានវិទ្យុ ABC ផ្សាយញុះញង់ និងបំភិតបំភ័យអ្នកបោះឆ្នោត

ភ្នំពេញៈ គណៈកម្មាធិការជាតិរៀបចំការបោះឆ្នោត (គ.ជ.ប.) បានចេញលិខិតព្រមានមួយដល់ម្ចាស់ស្ថានីយវិទ្យុ ABC ឲ្យបញ្ឈប់ការផ្សាយព័ត៌មានទាំងឡាយណា ដែលមានចរិតញុះញង់ បំភិតបំភ័យអ្នកបោះឆ្នោតដែលជាការបំពុលបរិយាកាស អំពីការបោះឆ្នោត ចាប់ពីពេលនេះជាបន្ទាន់។

ការព្រមាននេះបានធ្វើឡើង បន្ទាប់ពីកម្មវិធីស្ថានីយវិទ្យុ ABC មួយរបស់ លោកសេង ប៊ុនវ៉េង ហៅអាចារ្យអេ ដែលបាននិយាយក្នុងកម្មវិធីរបស់ខ្លួនផ្សាយផ្ទាល់រៀងរាល់ព្រឹក តាមរលកធាតុអាកាស FM 107.5 MHz ថា ប្រសិនបើគណបក្សប្រឆាំងឈ្នះឆ្នោត ក្រុមយោធាដែលគាំទ្រគណបក្សកាន់អំណាច នឹងងើបឡើងបះបោរជាមិនខាន។

លោកនិយាយថា «កងទ័ពកម្ពុជាដែលស្មោះត្រង់នឹងគណបក្សកាន់អំណាច នឹងងើបបះបោរប្រសិនបើគណបក្សសង្គ្រោះជាតិរបស់លោកសម រង្ស៊ី និងលោក កឹម សុខា ឈ្នះឆ្នោត នៅថ្ងៃទី២៨ កក្កដាខាងមុខនេះ»។

ក្នុងលិខិតព្រមានរបស់ គ.ជ.ប បានលើកឡើងថា បើនៅតែបន្តផ្សាយព័ត៌មានបែបនេះទៀត គ.ជ.ប. នឹងស្នើទៅក្រសួងព័ត៌មាន ឲ្យផ្អាកការផ្សាយរបស់ស្ថានីយវិទ្យុនេះជាបណ្តោះអាសន្ន។

គ. ជ.ប. បានបញ្ជាក់ថា ការផ្សព្វផ្សាយរបស់វិទ្យុ

ABC FM 107.5 MHz ជាការផ្សព្វផ្សាយរំលោភទៅនឹងច្បាប់

បទបញ្ជា និងនីតិវិធី សម្រាប់ការបោះឆ្នោតជ្រើសតាំងតំណាងរាស្ត្រ

និងគោលការណ៍សម្រាប់ប្រព័ន្ធផ្សព្វផ្សាយព័ត៌មាន។

សូមបញ្ជាក់ថា មន្ត្រី គ.ជ.ប. បានធ្វើការទំនាក់ទំនងតាមទូរស័ព្ទ

ដើម្បីឲ្យបញ្ឈប់ការផ្សព្វផ្សាយព័ត៌មានបែបនេះ ប៉ុន្តែវិទ្យុនេះ

នៅតែធ្វើការផ្សព្វផ្សាយដដែល។

យ៉ាងណាក៏ដោយ កម្មវិធីវិទ្យុរបស់លោកសេង ប៊ុនវ៉េង

ហៅអាចារ្យអេ មិនបានផ្សាយនៅព្រឹកថ្ងៃព្រហស្បតិ៍នេះទេ។

ប្រភពពី៖ ភ្នំពេញប៉ុស្ដិ៍

ក្រុមប្រឹក្សាធម្មនុញ្ញគឺជាច្រកចេញចុងក្រោយសម្រាប់លោក សម រង្ស៊ី ឈរឈ្មោះតំណាងរាស្ត្រ

វ៉ាស៊ីនតោន — ក្រុមអ្នកជំនាញខាងច្បាប់និងការបោះឆ្នោតស្នើឡើងថា មធ្យោបាយដ៏សំខាន់មួយទៀតដែលអាចធ្វើបានសម្រាប់លោក សម រង្ស៊ី ប្រធានគណបក្សសង្គ្រោះជាតិដើម្បីមានសិទ្ធិចូលរួមបោះឆ្នោតនៅថ្ងៃ អាទិត្យទី២៨ ខែកក្កដានេះបានគឺការស្នើសុំអន្តរាគមន៍ពីក្រុមប្រឹក្សាធម្មនុញ្ញ ឱ្យពិនិត្យមើលលើការបដិសេធរបស់គណៈកម្មាធិការជាតិរៀបចំការបោះឆ្នោត ក្នុងការចុះបញ្ជីបេក្ខជនឈរឈ្មោះតំណាងរាស្រ្តនិងសុំសិទ្ធិ បោះឆ្នោត។

កាលពីថ្ងៃច័ន្ទគណៈកម្មាធិការជាតិរៀបចំការបោះឆ្នោតបានបដិសេធចោល សំណើរបស់លោក សម រង្ស៊ី សុំចុះឈ្មោះបោះឆ្នោតនិងឈរឈ្មោះតំណាងរាស្រ្តនៅមណ្ឌលខេត្តកណ្តាល បន្ទាប់ពីឈ្មោះលោកត្រូវបានអាជ្ញាធរលុបចោលដោយសារលោកត្រូវបាន តុលាការកាត់ទោស១១ឆ្នាំទាក់ទងនឹងការដកតម្រុយបង្គោលព្រំដែននិង ផ្សាយឯកសារព្រំដែន។

លោក សុខ សំអឿន នាយកប្រតិបត្តិនៃក្រុមអ្នកច្បាប់ការពារសិទ្ធិកម្ពុជាបានបញ្ជាក់ ថាករណីនេះអាចបូកបញ្ជូលគ្នារវាងឆន្ទៈរបស់មេដឹកនាំរដ្ឋាភិបាលដោយ មានការចរចាសម្របសម្រួលនិងត្រូវប្តឹងទៅក្រុមប្រឹក្សាធម្មនុញ្ញឱ្យ សើរើពីការលុបឈ្មោះរបស់លោកសម រង្ស៊ីក្នុងពេលកន្លងមកដោយអាជ្ញាធរមូលដ្ឋានគឺធ្វើឡើងដោយខុស ច្បាប់។

លោកនិយាយថា៖ «ព្រោះឥឡូវគាត់មានសិទ្ធិបោះឆ្នោតធម្មតាហើយតែបញ្ហាវានៅត្រង់ ច្បាប់បោះឆ្នោតដែលគេតម្រូវឱ្យចុះបញ្ជីបេក្ខជនប៉ុន្មានខែមុនការ បោះឆ្នោតឥឡូវយើងហួសកំណត់ហ្នឹងហើយដល់ពេលបោះឆ្នោតគិតថាមិនអាច បានតែម្តងលើកលែងតែក្រុមប្រឹក្សាធម្មនុញ្ញ គេសម្រេចថាការលុបឈ្មោះបញ្ជីដែលជាការសម្រេចរបស់ក្រុម ប្រឹក្សាឃុំពីកាលមុនវាអត់ត្រឹមត្រូវទើបអាចមានផ្លូវបាន»។

លោក សុក សំអឿន បានបន្ថែមទៀតថាលោកមើលឃើញថាការលុបឈ្មោះកន្លងមកគឺពិតជាមិន ត្រឹមត្រូវតាមច្បាប់ទេ៖ «ប៉ុន្តែតាមពិតសិទ្ធិបោះឆ្នោតគាត់អត់ត្រូវបាត់បង់ទេបើយើងគិត តាមផ្លូវច្បាប់ព្រោះ ការបាត់បង់សិទ្ធិឈរឈ្មោះបោះឆ្នោតហ្នឹងគឺបាត់បង់លុះត្រាតែ តុលាការសម្រេចដាក់ក្នុងសាលក្រមថាអ្នកឯងបាត់សិទ្ធិពលរដ្ឋ»។

លោកបានបន្ថែមថាសាលក្រមដែលតុលាការសម្រេចកន្លងមកមិនបានសម្រេចដល់ចំណុចនេះទេ។

លោក អ៊ូ វីរៈប្រធានមជ្ឈមណ្ឌលសិទ្ធិមនុស្សកម្ពុជាក៏យល់ស្របដែរថាផ្លូវនៃ ក្រុមប្រឹក្សាធម្មនុញ្ញគឺជាជម្រើសមួយព្រោះស្ថាប័ននេះអាចបកស្រាយ ច្បាប់និងសម្រេចថាការសម្រេចកន្លងមករបស់គ.ជ.បឬរបស់ថ្នាក់មូល ដ្ឋានមានភាពស្របតាមផ្លូវច្បាប់ឬមិនស្រប។

លោកនិយាយថា៖ «ខ្ញុំមើលទៅមានតែច្រកហ្នឹងមួយគត់មុនពេលបោះឆ្នោតដើម្បីស្នើសុំ ដាក់លោកសម រង្ស៊ីជាបេក្ខភាពហើយដើម្បីស្នើសុំទៅកើតទាល់តែធ្វើដោយប្រធានសភា នាយករដ្ឋមន្ត្រី ឬក៏១០ភាគរយឡើងទៅនៃសមាជិកសភាបានន័យថាសភា១៣រូបឬមួយក៏ ព្រះមហាក្សត្រ។ អញ្ចឹងបើសិនជាខ្ញុំមើលពីស្ថានភាពនយោបាយប្រទេសកម្ពុជាខ្ញុំមើលទៅ មានតែឆន្ទៈនយោបាយរបស់លោកហ៊ុន សែនដែលជាអ្នកស្នើឬក៏ព្រះមហាក្សត្រជាអ្នកស្នើ។ ខ្ញុំមើលទៅជាជម្រើសមួយអាចទៅរួចក្នុងន័យមួយបង្រួបបង្រួមជាតិ»។

អ្នកវិភាគយល់ថាកូនសោរសំខាន់នៅពេលនេះស្ថិតនៅលើលោកហ៊ុន សែនតែមួយគត់ព្រោះ ពេលបច្ចុប្បន្ននេះគណបក្សប្រឆាំងបានបាត់បង់សមាជិកភាពជាអ្នកតំណាង រាស្ត្រអស់ហើយគឺនៅសល់តែគណបក្សប្រជាជនកម្ពុជាស្ទើរតែទាំងអស់ហើយ សភាជាតិក៏កំពុងស្ថិតក្នុងដំណាក់កាលអន្តរកាលទៀត។

លោក ហ៊ុន សែន គឺជាអ្នកដែលត្រូវចាក់សោរនេះដើម្បីទម្លាយឧបសគ្គដោយសារព្រះ មហាក្សត្រអាចនឹងមិនលូកលាន់កិច្ចការនេះច្រើនពេកទេ។ នេះបើតាមការបញ្ជាក់របស់លោកបណ្ឌិត ឡៅ ម៉ុងហៃ អ្នកវិភាគឯករាជ្យ។

លោកពន្យល់ថា៖ «មានតែការប្តឹងសេចក្តីសម្រេចរបស់គជបទៅក្រុមប្រឹក្សាធម្មនុញ្ញទៅ។ ខ្ញុំថាអាចធ្វើអញ្ចឹងបានហើយថាតើក្រុមប្រឹក្សាធម្មនុញ្ញទទួលឬមិន ទទួល។ ខ្ញុំថារឿងនេះមិនត្រឹមតែការលើកលែងទោសដែលធ្វើឱ្យលោក សម រង្ស៊ី អត់មានទោសអ្វីទាំងអស់ដូច្នេះគាត់មានសិទ្ធិពេញលេញទាំងអស់»។

លោកបានបន្ថែមថាវាកាន់តែងាយស្រួលទៅទៀតដោយសារលោកសម រង្ស៊ីត្រូវបានលើកលែងទោសដោយផ្អែកលើការកាត់ក្តី ខុសរបស់តុលាការនិងការសម្របសម្រួលមួយដើម្បីឱ្យបានស្ថិរភាពប្រទេស ជាតិគឺមិនមែនជាមនុស្សដែលមានទោសនោះទេដែលធ្វើឱ្យការផ្តល់ បុព្វសិទ្ធិឱ្យមកគាត់វិញកាន់តែងាយស្រួល។

លោកបកស្រាយថា៖ «បើសិនជាលោកសម រង្ស៊ីគាត់សុំព្រះមហាក្សត្រសុំលើកលែងទោសឱ្យគាត់ឈរលើមូលដ្ឋានថា តុលាការហ្នឹងអត់ត្រឹមត្រូវអយុត្តិធម៌ចំពោះគាត់គាត់អត់បាន ប្រព្រឹត្តខុសអីទេនោះគាត់ជាអ្នករួចខ្លួនតាំងពីពេលនោះមកគឺ អត់មានទោសទេហើយដាក់ទោសគាត់នោះ គឺគេអាចថាជាកំហុសខាងតុលាការហើយការខកខានមិនបានចុះ ឈ្មោះ នេះមិនមែនខុសគាត់ដែរដូច្នេះត្រូវតែឱ្យគាត់បានចុះធម្មតាឡើងវិញ ហើយក៏ឈរឈ្មោះដូចដែលពលរដ្ឋអត់មានទោសអញ្ចឹងទៅ»។

ក្រុមប្រឹក្សាធម្មនុញ្ញជាស្ថាប័នមួយដែលបង្កើតឡើងដើម្បីធានានូវ ការគោរពអនុវត្តរដ្ឋធម្មនុញ្ញហើយក៏ជាអ្នកបកស្រាយនិងរដ្ឋ ធម្មនុញ្ញនិងច្បាប់ដែលរដ្ឋសភានិងព្រឹទ្ធសភាបានអនុម័ត។ ស្ថាប័ននេះក៏មានសមត្ថភាពក្នុងការពិនិត្យមើលនិងសម្រេចលើបណ្តឹង ទាក់ទងទៅនឹងការបោះឆ្នោតនៃសមាជិកសភានិងការបោះឆ្នោតព្រឹទ្ធសភា ផងដែរ។

រហូតមកដល់ពេលនេះគណបក្សសង្គ្រោះជាតិនៅមិនទាន់បានចូលតាមច្រក នេះនៅឡើយទេដោយកំពុងតែស្នើសុំឱ្យរដ្ឋសភាជាតិផ្តល់អភ័យឯកសិទ្ធិ ដល់លោក សម រង្ស៊ី វិញបន្ទាប់ពីបានបាត់បង់ដោយសារត្រូវព្យួរដើម្បីមកប្រឈមមុខនឹង តុលាការរឿងដកតម្រុយបង្គោលព្រំដែន។

លោក សម រង្ស៊ី បានសរសេរលិខិតពីរក្នុងថ្ងៃតែមួយកាលពីថ្ងៃអង្គារទី២៣ស្នើសុំ ឱ្យលោក ហេង សំរិនប្រធានសភាជាតិផ្តល់សុពលភាពអភ័យឯកសិទ្ធិអ្នកតំណាងរាស្រ្តដល់ លោកវិញហើយក៏បានស្នើសុំឱ្យលោកអ៊ឹម សួស្តីប្រធានគណៈកម្មាធិការជាតិរៀបចំការបោះឆ្នោតពិនិត្យឡើងវិញក្នុង ការបញ្ចូលឈ្មោះលោកក្នុងបញ្ជីអ្នកបោះឆ្នោតជាផ្លូវការនិងក្នុង បញ្ជីបេក្ខជនឈរឈ្មោះបោះឆ្នោត។

លោក យឹម សុវណ្ណ ប្រធានប្រតិបត្តិគណបក្សសង្គ្រោះជាតិបានបញ្ជាក់អំពីជម្រើសនោះថា៖ «ជាតំណាងរាស្ត្រមានន័យថាគាត់អត់មានទោសពៃរអ្វី ទៀតទេបើគាត់ទទួលបាននូវសិទ្ធិនិងបុព្វសិទ្ធិរបស់គាត់ត្រឡប់មក វិញហើយមានន័យថាគជបត្រូវតែចុះឈ្មោះ គាត់ក្នុងបញ្ជី អ្នកបោះឆ្នោតពីព្រោះលុបគឺលុបក្នុងហេតុផលគាត់ជាប់ទោសអញ្ចឹងបើ ឥឡូវគាត់មិនមានទោសនោះត្រូវតែបានឈ្មោះរបស់គាត់ក្នុងបញ្ជីអ្នក បោះឆ្នោតឡើងវិញ»។

មន្ត្រីជាន់ខ្ពស់រដ្ឋាភិបាលម្នាក់ដែលសុំមិនបញ្ចេញឈ្មោះបាន ប្រាប់វីអូអេថាមធ្យោបាយឆ្លងតាមសភាជាតិក៏ជាជម្រើសដ៏ប្រសើរមួយហើយ ការចរចានយោបាយជាការជៀសមិនរួចដោយភាគីទាំងលោកសម រង្ស៊ីនិងលោកហ៊ុន សែនត្រូវបន្ទន់ឥរិយាបទមករកគ្នាជាថ្មីម្តងទៀតដើម្បី ប្រយោជន៍ជាតិ។

ពេលវេលាបានខិតកាន់តែខ្លីសម្រាប់ការឈរឈ្មោះរបស់លោក សម រង្ស៊ីដែលត្រូវសម្រេចកិច្ចការនេះឱ្យទាន់ពេលបោះឆ្នោតជាតិនៅ ថ្ងៃអាទិត្យ ទី២៨ខែកក្កដានេះ៕

ប្រភពពី៖ ខេមបូឌាផេក

Wednesday, July 24, 2013

អ្នកធ្វើដំណើរជប៉ុនជាង ៤០នាក់រុញរថភ្លើងទម្ងន់ ៣២តោនដើម្បីសង្គ្រោះជីវិតស្ត្រីម្នាក់

ជារឿងដ៏អស្ចារ្យមិនគួរឲ្យជឿដែលអ្នកធ្វើដំណើរជប៉ុនជាច្រើននាក់បានចាប់ដៃរុញទូរថភ្លើងទម្ងន់ ៣២ តោនចេញពីកន្លែងឡើងជិះដើម្បីជួយសង្គ្រោះស្ត្រីម្នាក់ដែលធ្លាក់ចុះទៅក្នុងចន្លោះរថភ្លើង ខណៈកន្លែងរង់ចាំមមាញឹកខ្លាំង។

ស្ត្រីម្នាក់ដែលមានអាយុប្រហែល ៣០ ឆ្នាំបានរអិលជើងធ្លាក់ចូលចន្លោះរវាងរថភ្លើង និងកន្លែងរង់ចាំជិះដែលមានចន្លោះប្រហែល ២០ ស.ម នៅស្ថានីយ JR Minami-Urawa ភាគខាងជើងទីក្រុងតូក្យូ។

អ្នកដំណើរនាំគ្នារុញរថភ្លើងដើម្បីជួយសង្គ្រោះស្ត្រីរងគ្រោះ

ជាសំណាងល្អស្ត្រីរងគ្រោះត្រូវបានសង្គ្រោះដោយជោគជ័យ និងគ្មានបញ្ហាអ្វីទាំងអស់ បន្ទាប់ពីអ្នកដំណើរប្រហែល ៤០ នាក់ និងមន្ត្រីស្ថានីយបាននាំគ្នារុញទូរថភ្លើងឲ្យចេញឆ្ងាយពីវេទិការង់ចាំបន្តិចដែលអាចឲ្យនាងដោះខ្លួនចេញមកវិញបាន។

អាន៖ ធ្លាប់ទេ ទុយនុយម៉ាបេន គ្មានលុយក្នុងហោប៉ៅ?

ក្រោយពីការជួយសង្គ្រោះដ៏ជោគជ័យ អ្នកចាំជិះរថភ្លើងបាននាំគ្នាហ៊ោអបអរដោយក្ដីរីករាយ។

នេះអាចចាត់ទុកថា ឧទាហរណ៍ដ៏ល្អមួយដែលបង្ហាញថា សាមគ្គីភាពរបស់មនុស្សអាចសម្រេចគ្រប់កិច្ចការបាន។

ប្រភពពី៖ Sabay

Tuesday, July 23, 2013

ឥរិយាបថឃោសនាគាំទ្រគណបក្សរបស់យុវជនកម្ពុជា

យុវជនគាំទ្រគណបក្សប្រជាជនកម្ពុជា និងគណបក្សសង្គ្រោះជាតិ លើដងផ្លូវម្ខាងម្នាក់ ពេលឃោសនា

©rfi

ដោយ គឹម យុទ្ធណា

ក្នុងពេលយុទ្ធនាការឃោសនាបោះឆ្នោតដែលកំពុងតែប្រព្រឹត្តទៅនៅពេលនេះហើយដែលនឹងត្រូវបញ្ចប់នៅចុងសប្តាហ៍នេះ នោះគេប្រាកដជាមានការភ្ញាក់ផ្អើលយ៉ាងខ្លាំងនៅពេលដែលឃើញសន្ទុះរបស់យុវជនកម្ពុជាមានភាពផុលផុសចូលរួមដង្ហែក្បួនឃោសនានៅក្នុងគណបក្សនយោបាយដែលខ្លួនពេញចិត្ត ដោយភាពសប្បាយរីករាយ ដោយស្ម័គ្រចិត្ត ដោយសាមគ្គីភាព។ល។ ប៉ុន្តែគេក៏សង្កេតឃើញមានផងដែរនូវឥរិយាបថមិនសមរម្យរបស់យុវជនគណបក្សមួយចំនួន ដូចជាការជេរប្រមាថគ្នា គប់ដបទឹកសុទ្ធ និងដុំថ្មដាក់គ្នា។ ដូច្នេះដើម្បីឲ្យក្បួនឃោសនាបោះឆ្នោតមានភាពរលូន និងមានភាពថ្លៃថ្នូររហូតដល់ថ្ងៃបញ្ចប់នោះ តើយុវជនគួរប្រកាន់ឥរិយាបថដូចម្តេចខ្លះ?

ខណៈដែលយុទ្ធនាការឃោសនាបោះឆ្នោតកាន់តែខិតជិតដល់ថ្ងៃបញ្ចប់នោះគេសង្កេតឃើញសន្ទុះនៃការចូលរួមឃោសនាឲ្យគណបក្សនយោបាយរបស់យុវជនមានការកើនឡើងជាខ្លាំង ជាក់ស្តែងគេអាចមើលឃើញចលនាចូលរួមឃោសនារបស់យុវជននៅក្នុងគណបក្សចំនួនពីរធំៗ នោះគឺគណបក្សប្រជាជនកម្ពុជានិងគណបក្សសង្គ្រោះជាតិហាក់មានសកម្មភាពខ្លាំងក្លា កាលពីចុងសប្តាហ៍កន្លងទៅនេះ។

នៅតាមដងវិថីនានាក្នុងទីក្រុងភ្នំពេញ និងនៅតាមទីសាធារណៈមួយចំនួនគេសង្កេតឃើញយុវជនទាំងប្រុសទាំងស្រីបានចូលរួមដង្ហែក្បួនឃោសនាឲ្យគណបក្សនយោបាយដែលខ្លួនពេញចិត្ត។ យុវជនទាំងអស់នោះបានចំណាយពេលវេលារបស់ខ្លួនចូលរួមដង្ហែក្បួនឃោសនាដោយក្តីសប្បាយរីករាយ ស្ម័គ្រចិត្តសាមគ្គីភាព មិត្តភាព និងភាតរភាពគួរឲ្យកោតសរសើរ ដោយខ្លះស្រែកហ៊ោរកញ្ជៀវ ខ្លះទៀតកាន់ឧគ្ឃោសនស័ព្ទបន្លឺសំឡេងលាន់អឺងកករំពងក្បួនឃោសនា អ្នកខ្លះក៏កាន់ទង់ជាតិឬទង់បក្សគ្រវីចុះឡើង និងមានផងដែរលើកដៃជាសញ្ញាគាំទ្រលេងរៀងរបស់គណបក្សដែលខ្លួនស្រឡាញ់។

យ៉ាងណាក៏ដោយ គេក៏កត់សម្គាល់ឃើញមានផងដែរនូវឥរិយាបថមិនទំនងមួយចំនួនរបស់យុវជនរបស់គណបក្សនយោបាយទាំងអស់នោះនៅក្នុងពេលដង្ហែក្បួនឃោសនា ដូចជាការប្រើអំពើហិង្សាវាយតប់គ្នាក្នុងជម្លោះហែក្បួនរហូតដល់មានការបាញ់បោះសម្លុតគំរាមគ្នា គប់ដបទឹកសុទ្ធ និងដុំថ្មដាក់គ្នា ការស្រែកជេរប្រមាថគ្នាទៅវិញទៅមកដោយពាក្យអសុរសផ្សេងៗ ក៏ដូចជាភាពអសណ្តាប់ធ្នាប់ក្នុងការហែក្បួនឃោសនាជាដើម។ ពិតហើយថាសកម្មភាពមិនល្អទាំងនេះបានធ្វើឲ្យរំខានដល់អ្នកធ្វើដំណើរកំពុងធ្វើចរាចរលើដងផ្លូវក៏ដូចជាបានធ្វើឲ្យបាត់បង់ភាពថ្លៃថ្នូរ មិនត្រឹមតែចំពោះយុវជនខ្លួនឯងនោះទេ តែវាក៏បានធ្វើឲ្យមានភាពអាប់ឱនផងដែរចំពោះគណបក្សនយោបាយដែលខ្លួនគាំទ្រនោះពិសេសទៀតនោះទទួលការវាយតម្លៃមិនល្អពីមហាជនដែលបានមើលឃើញពីសកម្មភាពមិនល្អទាំងអស់នេះ។

ពិតណាស់ថានោះវាជាសិទ្ធិផ្ទាល់ខ្លួនរបស់យុវជននៅក្នុងការគាំទ្រ និងចូលរួមក្នុងសកម្មភាពនយោបាយដែលខ្លួនពេញចិត្ត ហើយវាជាការបង្ហាញនូវឆន្ទៈរបស់ពួកគេក្នុងការចូលរួមចំណែកការយកចិត្តទុកដាក់ និងការព្រួយបារម្ភអំពីជោគវាសនាអនាគតប្រទេសជាតិរបស់ពួកគេផងដែរ។ ប៉ុន្តែតើវាមិនជាការល្អទេឬ បើយុវជនសម្តែងនូវឥរិយាបថគាំទ្រល្អៗចំពោះខ្លួនឯង ចំពោះបក្សនយោបាយដែលខ្លួនគាំទ្រ និងចំពោះគណបក្សនយោបាយដទៃនោះ?

ជាការពិតការប្រើពាក្យអសុរស ឬជេរគ្នា ការប្រើពាក្យសំដីឌឺដង គប់ដបទឹកសុទ្ធឬដុំថ្មផ្សេងៗដាក់គ្នា និងការធ្វើឲ្យខូចសណ្តាប់ធ្នាប់ចរាចរណ៍ ឬជួនកាលបង្កឲ្យមានអំពើហិង្សាកើតឡើងនោះ វាជាការបង្ហាញនូវរូបភាពមួយដែលអាចបញ្ជាក់ឲ្យឃើញថាក្បួនយុទ្ធនាការឃោសនាបោះឆ្នោតមានអាប់អួរ។ ម្យ៉ាងវិញទៀតវា ក៏ធ្វើអោយប៉ះពាល់ដល់តម្លៃយុវជនផ្សេងៗទៀតក្នុងបក្សរបស់ខ្លួនដែលកំពុងគាំទ្រនោះពិសេសអាចទទួលការសន្និដា្ឋនពីមហាជនថាយុវជនគាំទ្របក្សនយោបាយទាំងនោះ ជាមនុស្សមិនល្អដែលប្រការនេះវាអាចធ្វើឲ្យប្រជាប្រិយភាពរបស់គណបក្សធ្លាក់ចុះផងដែរតាមរយៈសកម្មភាពមិនល្អទាំងអស់នេះ។

ដូច្នេះផ្ទុយពីសកម្មភាព និងការសម្តែងឥរិយាបថមិនល្អដូចរៀបរាប់ខាងលើយុវជនគួរតែប្រកាន់ភ្ជាប់នូវការចូលរួមដង្ហែក្បួនឃោសនាដោយភាពថ្លៃថ្នូរ និងដោយការទទួលខុសត្រូវដែលប្រការនេះវានឹងផ្តល់តម្លៃយុវជនខ្លួនឯង ក៏ដូចជាលើកប្រជាប្រិយភាពដល់គណបក្សដែលខ្លួនគាំទ្រផងដែរ។

សរុបសេចក្តីមកវិញការចូលរួមឃោសនាជាការចាំបាច់ពីសំណាក់យុវជន ប៉ុន្តែយុវជនមិនគួរបង្វែរទិដ្ឋភាពការឃោសនាមកជាការប្រើពាក្យមិនល្អ ឬអំពើហិង្សាដាក់គ្នានោះឡើយ។ ពីព្រោះការចូលរួមឃោសនា ឬគាំទ្របក្សណាមួយនោះវាគឺជាទស្សនៈនៃការយល់ឃើញ និងជាការអោយតម្លៃពីសំណាក់យុវជនចំពោះគោលនយោបាយនៃគណបក្សនីមួយៗដែលខ្លួនស្រលាញ់ និងគាំទ្ររៀងៗខ្លួនតែប៉ុណ្ណោះ។ វាមិនមែនជាវេទិកាដែលគូសត្រូវត្រូវបង្ហួតនិងប្រយុទ្ធគ្នានៅលើទីលានសមរភូមិនោះឡើយ។ ផ្ទុយទៅវិញវាគ្រាន់តែជាយុទ្ធនាការដើម្បីផ្សព្វផ្សាយគោលនយោបាយរបស់បក្សតែប៉ុណ្ណោះ។ ហើយគួរតែយល់ថាក្នុងគោលនយោបាយនៃគណបក្សនីមួយៗគឺមានគោលដៅតែមួយគត់គឺបម្រើប្រយោជន៍ដល់ប្រជាពលរដ្ឋនិងអភិវឌ្ឍជាតិដូចគ្នា។

ប្រភពពី៖ ខេមរភាសា

អង្គការតម្លាភាពបង្ហាញពីស្ថានភាពមិនប្រក្រតីមួយចំនួនក្នុងពេលយុទ្ធនាការឃោសនាបោះឆ្នោត

អង្គការតម្លាភាពកម្ពុជាផ្សព្វផ្សាយនៅថ្ងៃទី១ធ្នូឆ្នាំ២០១១ចំណាត់ថ្នាក់កម្ពុជាផ្នែកអំពើពុករលួយ

ដោយ ជា ប៊ុនធឿន

ក្នុងរយៈពេលយុទ្ធនាការប្រមាណជាង២៥ថ្ងៃកន្លងមកនេះ អង្គការតម្លាភាពបានសង្កេតឃើញថាមានភាពល្អប្រសើរជាងមុនៗ មួយចំនួន និងទន្ទឹមនឹងនេះដែរក៏មានភាពមិនប្រក្រតីមួយចំនួនបានកើតមានឡើង ក្នុងកំឡុងពេលយុទ្ធនាការបោះឆ្នោត ដែល ជាហេតុធ្វើឱ្យអង្គការខាងលើមានការព្រួយបារម្ភក្នុងការប៉ះពាល់ដល់ ដំណើរការបោះឆ្នោតដោយសេរី។

អង្គការតម្លាភាពកម្ពុជាបានសំដែងការព្រួយបារម្ភអំពីភាពមិន ប្រក្រតីមួយចំនួន ជុំវិញយុទ្ទនាការឃោសនាបោះឆ្នោត និងរឿងលោក សម រង្ស៊ី មិនមានសិទ្ធិចុះឈ្មោះ និងឈរឈ្មោះបោះឆ្នោតបាន។

នៅក្នុងសេចក្ដីថ្លែងការណ៍មួយរបស់អង្គការតម្លាភាពកម្ពុជា ដែលបានចេញផ្សាយនាថ្ងៃអង្គារទី២៣ កក្កដានេះ បានបង្ហាញថាស្ថានភាពក្នុងកំឡុងយុទ្ធនាការបោះឆ្នោតក្នុងកំឡុង ពេលជាង៤សប្តាហ៍កន្លងមកនេះ បានបង្ហាញថា មានភាពមិនប្រក្រតីចំនួន២ ដែលអង្គការបានចាត់ទុកថាជាការគំរាមកំហែងផ្នែកនយោបាយនៅតែបន្តជា បញ្ហាប្រឈមមុខ។

កាលពីថ្ងៃទី៥ កក្កដាមានការបាញ់កាំភ្លើងឡើងទៅលើមួយដោយមន្ត្រីយោធា ទៅលើក្បួនដង្ហែរបស់គណបក្សប្រឆាំងក្នុងរាជធានីភ្នំពេញ។ ហើយកាលពីថ្ងៃទី២០ កក្កដាកន្លងទៅ មានជនមិនស្គាល់មុខម្នាក់ត្រូវបានគេចោទថាបានបាញ់ទៅលើ ទីស្នាក់ការគណបក្សសង្គ្រោះជាតិមួយថ្ងៃបន្ទាប់ពីការវិលត្រឡប់មក វិញរបស់លោក សម រង្ស៊ី។

ជាងនេះទៅទៀត អង្គការខាងលើបានលើកឡើងបន្តថា ភាពមិនប្រក្រតីបានកើតឡើងមានមួយចំនួនទៀតដែរ ដូចជាការរកមិនឃើញឈ្មោះក្នុងបញ្ជីឈ្មោះអ្នកបោះឆ្នោត ការទិញទឹកចិត្តប្រជាពលរដ្ឋពីសំណាក់មន្ត្រីបក្សនយោបាយផ្សេងៗ អំពើហិង្សាលើសកម្មជនគណបក្សនយោបាយ និងប្រជាពលរដ្ឋ មន្ត្រីសាធារណៈឃោសនាបោះឆ្នោតក្នុងម៉ោងការងារ ការប្រើប្រាស់សម្បត្តិរដ្ឋ ការបំផ្លាញស្លាកគណបក្ស និងការរំខានដល់យុទ្ធនាការបោះឆ្នោតជាដើម។

នៅក្នុងនោះដែរអង្គការតម្លាភាពកម្ពុជា ក៏បានលើកឡើងដែរថា មានការលំអៀងក្នុងការផ្សព្វផ្សាយពីសំណាក់ ស្ថានីយ៍ទូរទស្សន៍ឯកជនមួយចំនួន ទាក់ទងនឹងការរាយការណ៍ព័ត៌មានសម្រាប់យុទ្ធនាការឃោសនារកសន្លឹក ឆ្នោត។ ដោយគេបានរកឃើញថាមានការការផ្សាយលំអៀងទៅរកគណបក្សកាន់អំណាច។

អង្គការតម្លាភាព បានអំពាវនាវឱ្យរដ្ឋាភិបាលនិង គណៈកម្មាធិការជាតិរៀបចំការបោះឆ្នោតគ.ជ.ប. ផ្ដល់ការធានាថាវិទ្យុ FM ក្នុងស្រុកទាំងអស់ត្រូវបានអនុញ្ញាតឱ្យធ្វើការផ្សព្វផ្សាយបន្តនូវ ព័ត៌មានរបស់ទាក់ទងនឹងការបោះឆ្នោតរបស់វិទ្យុបរទេសមួយចំនួន ផងដែរ។

ក្នុងសេចក្តីថ្លែងការណ៍ដដែល អង្គការបានអំពាវនាវដល់គណបក្សនយោបាយទាំងអស់ ឱ្យអនុវត្តយុទ្ធសាស្ត្រប្រកបដោយប្រសិទ្ធិភាព ជៀសវាងរាល់អំពើហិង្សានានា ដែលអាចកើតមានឡើងក្នុងកំឡុងពេលយុទ្ធនាការរកសំឡេងឆ្នោត។ ដោយលោក ព្រាប កុល នាយកប្រតិបត្តិនៃអង្គការតម្លាភាពកម្ពុជាយល់ថាគ្មានអ្វីជាអាថ៌ កំបាំងទេ ក្នុងដំណើរការបោះឆ្នោតបែបលទ្ធិប្រជាធិបតេយ្យ លើកលែងតែការគូសសន្លឹកឆ្នោតតែប៉ុណ្ណោះ។ ប្រភពពី៖ ខេមរភាសា

ក្រុមវាយលុកតាមអ៊ីនធើរណិត Anonymous Cambodia លួចទិន្នន័យរបស់គ.ជ.ប ចែកចាយដល់សាធារណៈអំពីបញ្ជីឈ្មោះអ្នកបោះឆ្នោតវៀតណាម

រូបសញ្ញានៃក្រុមវាយលុកតាមអ៊ីនធើរណិត Anonymous Hackers

ថ្មីៗនេះវ៉ិបសាយថ៍របស់ គណៈកម្មាធិការជាតិរៀបចំការបោះឆ្នោតដែលមាន អាសយដ្ឋាន voterlist.org.kh ដែលជាវ៉ិបសាយថ៍កម្មវិធីស្វែងរកឈ្មោះអ្នកបោះឆ្នោតនៅក្នុងបញ្ជី បោះឆ្នោត ត្រូវបានក្រុមអ្នកវាយលុយតាមអ៊ីនធើរណិត ដែលហៅថា Hackers មានឈ្មោះថា Anonymous Cambodia បានលួចវាយលុកចូល និងបានបញ្ចេញទិន្នន័យអ្នកបោះឆ្នោតទាំងអស់ដាក់ជាសាធារណៈឲ្យ បណ្ដាជនអាចទាញយកបាន។

ក្រុម Hacker Anonymous Cambodia នេះក៏បានដាក់សាររបស់ខ្លួនតាមទំព័រមួយនៅលើវ៉ិបសាយថ៍របស់គ.ជ.ប នេះផងដែរបញ្ចេញឲ្យដឹងអំពីបំណងរបស់ខ្លួនដែលបានវាយលុកចូល វ៉ិបសាយថ៍នេះ។ ក្នុងនោះពួក Anonymous Cambodia បានលើកឡើងថា ពួកគេទទួលបាននូវឯកសារជាច្រើនដែលអាជ្ញាធររៀបចំការបោះឆ្នោត មិនចង់ឲ្យសាធារណៈជនដឹង។ ឯកសារទាំងនោះបញ្ជាក់ថា គណៈកម្មាធិការជាតិរៀបចំការបោះឆ្នោតកំពុងអនុញ្ញាតឲ្យជនអន្ដោ ប្រវេសន៍វៀតណាមមានសិទ្ធិបោះឆ្នោតនៅក្នុងប្រទេសកម្ពុជា។ ទិន្នន័យឯកសារ backup ទាំងនោះមានទំហំជាង ២GB នៅលើប្រព័ន្ធវ៉ិបសាយថ៍បញ្ជីឈ្មោះបោះឆ្នោត ដែលមានឈ្មោះជនជាតិវៀតណាមចម្លែកៗជាច្រើន។
វិទ្យុ អូស្រ្ដាលីបានឃើញទំព័រនេះ នៅលើវ៉ិបសាយថ៍ voterlist.org.kh របស់គ.ជ.ប ហើយបានទាញយកឯកសារទាំងនោះមកមើលដើម្បីជាការបញ្ជាក់។ ប៉ុន្ដែដោយសារទិន្នន័យច្រើនដល់ទៅជាង ២GB ហើយមានឈ្មោះអ្នកបោះឆ្នោតដល់ទៅជាង៩លាន ៦សែននាក់នោះ។ វិទ្យុអូស្រ្ដាលីមិនមានពេលគ្រប់គ្រាន់ដើម្បីពិនិត្យមើលឯកសារ បញ្ជីឈ្មោះអ្នកបោះឆ្នោតទាំងអស់បាននោះទេ។ ប៉ុន្ដែនៅក្នុងឯកសារបញ្ជីឈ្មោះអ្នកបោះឆ្នោតមួយនៅការិយាល័យបោះ ឆ្នោតនៅសាលារៀនភូមិទី៧ ក្នុងសង្កាត់ចុងឃ្នៀស នៅមណ្ឌលខេត្ដសៀមរាប ឃើញមានឈ្មោះអ្នកបោះឆ្នោតជាច្រើនដែលមានត្រកូល និងឈ្មោះមិនមែនខ្មែរ ដូចជាត្រកូលង្វៀង, ត្រកូល ត្រឹង, ត្រកូល យ៉, និងត្រកូលឡេ ជាដើម។
យ៉ាង ណាក៏ដោយតាមប្រសាសន៍របស់លោក ទេព នីថា អគ្គលេខាធិការនៃគ.ជ.ប ហាក់មិនមានការបារម្ភជុំវិញរឿងនេះ ហើយបានប្រាប់វិទ្យុអូស្រ្ដាលីឲ្យដឹងដូចតទៅ។
(សំឡេង ទេព នីថា)
សូម ជម្រាបថា ឯកសារ Files ដែលវិទ្យុអូស្រ្ដាលីទទួលបាន គឺមិនត្រឹមតែឯកសារ PDF ដែលមានត្រាគ.ជ.ប ប៉ុណ្ណោះនោះទេ ប៉ុន្ដែថែមទាំង Files របស់ Web Server ទៀតផងដែលអាចបញ្ជាក់ថា ក្រុម Hacker Anonymous នោះបានទាញយកទិន្នន័យពីវ៉ិបសាយថ៍ voterlist.org.kh ទាំងអស់នោះមែន។ យ៉ាងណាក៏ដោយវិទ្យុអូស្រ្ដាលីមិនអាចដឹងថា តើវ៉ិបសាយថ៍ voterlist.org.kh នេះត្រូវបានក្រុម Hacker Anonymous Cambodia លួចចូលនៅពេលណាទេ។ ប៉ុន្ដែនៅក្នុងកាសែតក្នុងស្រុកមួយជាភាសាអង់គ្លេសបានឲ្យដឹងថា ក្រុម Anonymous Cambodia នេះបានលួចចូលនៅក្នុងដើមខែកក្កដានេះ ហើយដាក់ចែកចាយជាសាធារណៈឲ្យបណ្ដាជនបានដឹង។
សូម ជម្រាបថា ក្រុមនេះហាក់មាននិន្នាការស្រដៀងគ្នាទៅនឹងក្រុម Wikileaks អន្ដរជាតិដែលលួចបញ្ចេញទិន្នន័យសម្ងាត់ៗរបស់បណ្ដារដ្ឋាភិបាលក្នុង ពិភពលោកក្នុងគោលបំណងធានាឲ្យបាននូវយុត្ដិធម៌សង្គម។ ក្រុម Anonymous Cambodia នេះក៏បានឲ្យដឹងដែរថា ពួកគេកំពុងតែតាមដានឃ្លាំមើលបញ្ហាសកម្មភាពពុករលួយនៅក្នុងជួរ រដ្ឋាភិបាលកម្ពុជា និងនៅក្នុងក្រុមហ៊ុនសហគ្រាសកម្ពុជា។ យ៉ាងណាក៏ដោយក្រុម Hacker Anonymous Cambodia នេះបានដាក់ឈ្មោះប្រតិបត្ដិការវាយលុករបស់ខ្លួនលើកនេះលើវ៉ិបសាយថ៍ គ.ជ.ប ថាជាប្រតិបត្ដិការ Operation Radar ។ នៅក្នុងពេលថ្មីៗនេះបញ្ហាលួចចូលវាយលុកតាមប្រព័ន្ធអ៊ីនធើរណិតនៅ ក្នុងប្រទេសកម្ពុជាហាក់ដូចជាកំពុងមានការកើនឡើង៕ ប្រភពពី៖ ខ្មែរស្ថាបនា ៕ប្រភពព័ត៌មានៈ វិទ្យុអូស្រ្តាលី

សង្គ្រាមពាក្យសម្តីរបស់យុវជនស្ដីពីការបោះឆ្នោតរញ្ជួយពេញហ្វេសប៊ុក

នៅក្នុងហ្វេសប៊ុក ក៏ជាវេទិកាពិភាក្សាពីបញ្ហានយោបាយដ៏កក្រើកផងដែរ។

យុវជន ហ៊ាននិយាយ និងបញ្ចេញមតិដែលទាក់ទងទៅនឹងបញ្ហានយោបាយជាសាធារណៈ ជាពិសេសអំពីការឃោសនាបោះឆ្នោត ដោយមិនមានភាពភ័យខ្លាចនោះទេ។ បើប្រៀបធៀបទៅនឹងកាលពីប៉ុន្មានឆ្នាំមុនវិញ វាពិតជាខុសគ្នាខ្លាំង។

ជាក់ស្តែង គេហទំព័រហ្វេកប៊ុករបស់ I love Cambodia Hot News បានបង្ហោះរូបយុវតីពីររូប ដែលម្នាក់នៅឆ្វេងដៃពាក់មួកដាក់ស្លាកសញ្ញាគណបក្ស ប្រជាជនកម្ពុជាហើយកញ្ញាម្នាក់ទៀតដាក់ស្លាកសញ្ញាគណបក្សសង្គ្រោះ ជាតិ ព្រមទាំងអមដោយអក្សរធំៗថា «ស្អាតដូចគ្នាយកមួយណា?»។

នៅក្នុងនោះ ShokryVsChakrya បានសរសេរសសើរគណបក្សប្រជាជនថា៖ «៤ អ្នកដឹកនាំមានសីលធម៌»។ រីឯ BrossBremBery បញ្ចេញយោបល់ថា៖ «៤ស្អាតដោយរូបរីឯ៧ស្អាតដោយចរិយាសមសួន ខ្ញុំរើសយក៧»។

នេះគឺជាអ្វីដែលយុវជនហ៊ាន បញ្ចេញយោបល់របស់ខ្លួននៅក្នុងវិស័យនយោបាយ ហើយជ្រើសរើសយកគណបក្សដែលខ្លួនពេញចិត្ត។ ប៉ុន្តែពេលខ្លះភាពក្លាហានធ្វើឲ្យពួកគេហ៊ានប្រើពាក្យពេចន៍មិន សមរម្យដាក់គ្នា ហើយបង្កើតជារូបភាពថ្លុកផ្សេងៗ ដើម្បីផ្ចាញ់ផ្ចាលគ្នា និងជេរគ្នាទៅវិញ។ ការប្រើពាក្យថា៖ «ពួកអាខួរក្បាលយួនខ្លួនខ្មែរ ពួកនេះមិន ខុសពីសត្វអណ្តើកក្នុងស្នូកទេ ខួរក្បាលពួកអាបណ្ឌិតមួយចំនួនបានលក់ឧត្តមគតិដ៏ ងងឹតងងល់អស់ហើយមើលទៅ!»។

ពាក់ព័ន្ធ នឹងហោវាសព្ទប្រមាថគ្នានេះ លោកបណ្ឌិត សុខ ទូច ជាអ្នកវិភាគនយោបាយឯករាជ្យ និងជាសាកលវិទ្យាធិការនៃសាកលវិទ្យាល័យខេមរៈ បានឲ្យដឹងថា៖ «ប្រទេសណាក៏ជេរគ្នា វាយប្រហារគ្នាទៅវិញទៅមកដែរប៉ុន្តែការជេរគ្នាក្នុងវិស័យនយោបាយ នៅប្រទេសមួយចំនួនផ្ចាញ់ផ្ចាលគេ គឺស្របទៅតាមក្រមសីលធម៌ និងប្រើពាក្យសាមញ្ញ ចំណែកឯកម្ពុជាយើង ពួកគាត់មិនគិតនោះទេ គឺធ្វើយ៉ាងណាឲ្យតែបំបាក់ភាគីម្ខាងទៀតបានប៉ុណ្ណោះ។ ម្យ៉ាងវិញទៀត យើងក៏គ្មានច្បាប់ណាថា ការជេរគ្នាត្រូវ ឬខុសច្បាប់នោះទេ។ សង្ឃឹមថា យុវជន គិតឡើងវិញទៅលើចំណុចនេះ»។

កញ្ញា ជាតិ ចាន់សូលីនដា វ័យ ២០ឆ្នាំ ដែលជានិស្សិតឆ្នាំទីបី ផ្នែកទំនាក់ទំនងអន្តរជាតិ នៅសាកលវិទ្យាល័យខេមរៈ បាននិយាយថា៖ «យុវជនបច្ចុប្បន្នត្រូវការប្រជាធិបតេយ្យសិទ្ធិបញ្ចេញមតិ និងហ៊ានធ្វើអ្វីដែលខ្លួនគិតថា ត្រឹមត្រូវ»។

យុវតីរូបនេះ បានបន្តថា៖ «យុវជនជាច្រើនពិតជាចង់មានសំឡេងក្នុងប្រព័ន្ធសារព័ត៌មានផ្សេងៗ ប៉ុន្តែវាហាក់ដូចជាមិនអំណោយផលដល់ពួកគាត់សោះ។ ដូចនេះមានតែហ្វេសប៊ុកមួយទេ ដែលជាឱកាសបញ្ចេញនូវទស្សនៈរបស់ខ្លួន និងបានឆាប់រហ័ស»។

ការបោះឆ្នោតជាតិនៅថ្ងៃទី២៨ ខែកក្កដា ឆ្នាំ២០១៣ ខាងមុខនេះមានការចូលរួមច្រើនពីប្រជាជនកម្ពុជានៅក្នុងឆាកនយោបាយ ដោយមិនមានការចាប់បង្ខំទេ។ អ្នកដែលចូលរួមច្រើនបំផុតនោះគឺ យុវជនតែម្តង ដោយឃើញនៅពេលដង្ហែក្បួនឃោសនាបោះឆ្នោត មានសុទ្ធតែយុវជនចូលរួម។

យោងតាមសម្តីរបស់យុវជន ប៉ក់ ឧត្តម ដែលជាយុវជនស័្មគ្រចិត្តក្នុងគណបក្សមួយ បានឲ្យដឹងថា៖ «មុននឹងចូលរួមក្នុងវិស័យនយោបាយខ្ញុំតែងតែធ្វើការស្វែងយល់លើ គោលនយោបាយរបស់ប្រទេស សកម្មភាពអ្នកដឹកនាំនិងតាមដានរាល់ទិដ្ឋភាពដែលកើតឡើងនៅក្នុង ប្រទេស និងក្រៅប្រទេសផងដែរ»។

លោកបានបន្តថា៖ «បន្ទាប់ពីមានការយល់ដឹងច្រើនពីវិស័យនយោបាយខ្ញុំក៏សម្រេចចិត្ត ប្រឡូកជាមួយនឹងវា ដោយមិនចង់ក្លាយជាមនុស្សម្នាក់ដែលចាំតែដើរតាមគេ និងជឿលើតែពាក្យដែលគេនិយាយទេ។ ខ្ញុំត្រូវតែមានការសម្រេចចិត្តដោយខ្លួនឯង»។

នៅក្នុង អាណត្តិនេះ លោក ឧត្តម បានសម្រេចចិត្តចូលរួមក្នុងឆាកនយោបាយដោយគាត់បានចូលធ្វើការ ឃោសនាជាមួយយុវជនជាច្រើនទៀត ហើយក៏តែងតែមានការឆ្លើយឆ្លងគ្នារវាងយុវជនដូចគា្ននៅតាមបណ្តាញ ហ្វេសប៊ុកដែរ ដោយ សារគាត់គិតថាហ្វេសប៊ុក ជាប្រព័ន្ធផ្សព្វផ្សាយតែមួយគត់ដែលអាចនិយាយរឿងទាក់ទងនឹង នយោបាយបានទូលំទូលាយ។

លោកបណ្ឌិត សុខ ទូច បានពន្យល់ទៅលើឥទ្ធិពលអ្វីខ្លះដែលធ្វើឲ្យប្រជាជនកម្ពុជាជា ច្រើន ជាពិសេសយុវជន ចូលរួមក្នុងវិស័យនយោបាយថា៖ «ដោយសារតែភាពជឿនលឿននៃបច្ចេកវិទ្យាព័ត៌មាននៅលើកណ្តាប់ដៃរបស់ មនុស្ស។ ការធ្វើចំណាកស្រុករបស់ប្រជាពលរដ្ឋក៏ជាផ្នែកមួយដែរព្រោះគាត់ទៅ ធ្វើការស្រុកគេ គាត់ស្វែងយល់ពីស្ថានភាពនយោបាយប្រទេសគេ បានធ្វើឲ្យគាត់ត្រឡប់មកវិញនូវគំនិតថ្មីមកចែករំលែកដល់គ្រួសារ និងអ្នកនៅជុំវិញខ្លួន»។

លោក បានបន្ដថា៖ «ជាងនេះទៅទៀត ការឃើញយុវជនគ្នាឯងមានការចូលរួមសកម្មភាពសង្គមច្រើនក៏ធ្វើឲ្យ យុវជនដទៃទៀតចង់ចូលរួមដែលធ្វើឲ្យពួកគាត់ចូលរួមក្នុងឆាក នយោបាយតែម្តង»។

បច្ចុប្បន្ននៅមានប្រជាជនមួយចំនួនគិត ថា នៅពេលពាក់ព័ន្ធទៅនឹងវិស័យនយោបាយ ឬអ្នកនយោបាយពួកគាត់អាចប្រឈមទៅនឹងហានិភ័យដែលមានដូចជា អាយុជីវិត បាត់បង់ទ្រព្យសម្បត្តិ និងការជាប់គុកជាដើម។

ក្នុងរឿងនេះលោក បណ្ឌិត សុខ ទូច បានប្រាប់ឲ្យដឹងថា៖«អ្នកលួចគេក៏ត្រូវជាប់គុកដែរ ឲ្យតែប្រព្រឹត្តអំពើខុសច្បាប់ត្រូវតែប្រឈមនឹងផ្លូវច្បាប់ហើយ។ ការធ្វើនយោបាយ ឬគ្រាន់តែជាការបញ្ចេញមតិយោបល់ផ្សេងៗ ពុំមែនអ្វីដែលខុសច្បាប់ទេ។ ដូចនេះគ្មានអ្នកណាមកចេះតែចាប់ចងឡើយ។ បច្ចុប្បន្នអំណាចស្ថិតនៅលើប្រជាជន មិនមែនអ្នកណាថា ឆ្វេង គឺឆ្វេង ស្តាំ គឺស្តាំនោះទេ ប្រជាជនគាត់ចេះដឹងរួចទៅហើយ»។

ចំណែកឯលោក ឧត្តម យល់ឃើញថា វាពិតជាត្រឹមត្រូវបើលោកប្រឡូកចូលក្នុងវិស័យនយោបាយហើយវានឹង អាចមានហានិភ័យកើតឡើងប៉ុន្តែបើយុវជនទាំងអស់គិតតែពីផលប្រយោជន៍ ផ្ទាល់ខ្លួនហើយមិនក្រោកឈរឡើងបញ្ចេញមតិទេ គ្មានអ្នកណាអាចជួយប្រទេសឲ្យមានការរីកចម្រើនទេ ហើយក៏មិនអាចឈានទៅរកការអភិវឌ្ឍដែរ។

តើក្នុងនាមជាឪពុកម្តាយម្នាក់នៅពេល ដែលឃើញកូនចូលរួមក្នុង គណបក្សមួយលោក ចាន់ ប៊ុនធឿន បានឲ្យដឹងថា៖ «បើនិយាយទៅខ្ញុំពិតជាមិនចង់ឲ្យកូនចូលរួមក្នុងវិស័យនយោបាយ ប៉ុន្មានទេ ប៉ុន្តែនៅក្នុងប្រទេសប្រជាធិបតេយ្យ ខ្ញុំមិនអាចឃាត់ពួកគាត់ក្នុងការចូលរួមបញ្ចេញមតិនោះទេបើពួក គេសម្រេចចិត្តចង់ចូលរួម។

លោក ប៊ុនធឿន បន្តថា៖ «ក្មេងៗចូលចិត្តលេងហ្វេសប៊ុកណាស់ ហើយពួកគាត់ ហ៊ាននិយាយតតាំងគ្នាទៅវិញទៅមកដោយមិនខ្លាចនោះទេអាចថា មកពីគាត់មានការយល់ដឹងច្រើនពីនយោបាយ ដូចនេះគាត់មិនព្រួយបារម្ភទេ»។

បើពួកគេចាត់ទុកការប្រជែងគ្នាជាការលេងកីឡា ទោះចាញ់ ឬឈ្នះ វានៅតែជាមិត្តភក្ដិ ពិតជាមិនអាចស្អប់គ្នាបានទេ។

ដូចយុវជន ប៉ក់ ឧត្តម បានប្រាប់ថា៖ «ខ្ញុំមិនស្អប់យុវជនគណបក្សដទៃទេ។ យើងមានសិទ្ធិជ្រើសរើស និងចូលរួមគណបក្សដែលយើងពេញចិត្តនិងជឿថា គណបក្សអាចជាសសរទ្រូងជួយសង្គមបាន។ ដូចនេះ ហេតុអ្វីខ្ញុំត្រូវតែស្អប់យុវជនដូចគ្នានោះ»? ប្រភពពី៖ ខ្មែរស្ថាបនា

Sunday, July 21, 2013

គ.ជ.បនឹងប្រជុំបន្ទាន់លើសំណើសុំចុះឈ្មោះបោះឆ្នោតរបស់លោក សម រង្ស៊ី

លោក សម រង្ស៊ី ប្រធានគណបក្សសង្គ្រោះជាតិ ដាក់លិខិតមួយនៅថ្ងៃទី២១ ខែកក្កដា ទៅប្រធានគណៈកម្មាធិការជាតិរៀបចំការបោះឆ្នោត (គ.ជ.ប) ស្នើសុំឲ្យចុះឈ្មោះរូបលោកក្នុងបញ្ជីឈ្មោះអ្នកបោះឆ្នោត និងក្នុងបញ្ជីផ្លូវការបេក្ខជនឈរឈ្មោះបោះឆ្នោតជ្រើសតាំង តំណាងរាស្ត្រនីតិកាលទី៥ ថ្ងៃទី២៨ ខែកក្កដា ខាងមុខ។

ស្ដាប់ ឬ ទាញយកសំឡេង

ប្រធានគណបក្សសង្គ្រោះជាតិ លោក សម រង្ស៊ី ក្នុងកម្មវិធីកិច្ចពិភាក្សារបស់វិទ្យុអាស៊ីសេរី កាលពីយប់ថ្ងៃទី១៩ កក្កដា ឆ្នាំ២០១៣។

RFA

ប្រធានគណៈកម្មាធិការជាតិរៀបចំការបោះឆ្នោត ហៅកាត់ថា គ.ជ.ប លោក អ៊ឹម សួស្ដី មានប្រសាសន៍នៅថ្ងៃទី២១ ខែកក្កដា ថា គ.ជ.ប នឹងបើកកិច្ចប្រជុំមួយជាបន្ទាន់ នៅថ្ងៃច័ន្ទ ទី២២ ខែកក្កដា ដើម្បីពិភាក្សាលើសំណើសុំរបស់ប្រធានគណបក្សប្រឆាំងលោក សម រង្ស៊ី ដែលសុំឲ្យ គ.ជ.ប ចុះឈ្មោះរូបលោកក្នុងបញ្ជីឈ្មោះអ្នកបោះឆ្នោត៖ «ចាំប្រជុំស្អែកៗ រឿងច្រើនណាស់! ជជែកគ្នាសិន មិនមែនរឿងតែមួយទេ បាទ! ខ្ញុំទើបបានទទួលលិខិតមិញដែរ ខ្ញុំប្រជុំស្អែក»។
លោក អ៊ឹម សួស្ដី មិនបានអត្ថាធិប្បាយទេពីនីតិវិធីយ៉ាងណារបស់ គ.ជ.ប ចំពោះសំណើសុំរបស់លោក សម រង្ស៊ី បន្ទាប់ពីនីតិវិធីចុះឈ្មោះបេក្ខជនឈរឈ្មោះបោះឆ្នោតបានផុតទៅហើយ នោះ។ រីឯលោក ទេព នីថា អគ្គលេខាធិការ គ.ជ.ប បញ្ជាក់ថា សំណើរបស់លោក សម រង្ស៊ី គ.ជ.ប នឹងពិនិត្យសម្រេចទៅតាមភារកិច្ច និងសិទ្ធិអំណាចរបស់ គ.ជ.ប ដែលផ្នែកលើច្បាប់បោះឆ្នោត។
លោកប្រកាន់ជំហរថា ការសម្រេចចុះឈ្មោះលោក សម រង្ស៊ី ក្នុងបញ្ជីឈ្មោះអ្នកបោះឆ្នោត ឬយ៉ាងណានោះ គឺអាស្រ័យលើច្បាប់បោះឆ្នោតទាំងស្រុង ហើយមិនជាប់ពាក់ព័ន្ធនឹងបញ្ហានយោបាយនោះឡើយ។
នាយកប្រតិបត្តិគណៈកម្មាធិការអព្យាក្រឹតនិងយុត្តិធម៌ដើម្បីការ បោះឆ្នោតដោយសេរីនៅកម្ពុជា ហៅកាត់ថា និចហ្វិក (NICFEC) លោក ហង្ស ពុទ្ធា យល់ថា សំណើសុំរបស់លោក សម រង្ស៊ី ពិបាកក្នុងការរកស្ថានភាពផ្លូវច្បាប់ ដើម្បីបញ្ចូលរូបលោកក្នុងបញ្ជីឈ្មោះអ្នកបោះឆ្នោត។ ប៉ុន្តែមានច្រក ២សំខាន់ អាចជួយលោក សម រង្ស៊ី បាន គឺទី១ ការបកស្រាយច្បាប់ និងការអនុវត្ត និងមួយទៀត ការធ្វើវិសោធនកម្មច្បាប់បោះឆ្នោត។
លោក ហង្ស ពុទ្ធា បញ្ជាក់ថា ត្បិតមានពេលខ្លីកៀកថ្ងៃបោះឆ្នោតក្ដី តែឋិតក្នុងឆន្ទៈនយោបាយវិសោធនកម្មច្បាប់នោះអាចនឹងធ្វើទៅកើត ហើយលោក សម រង្ស៊ី នឹងមានឈ្មោះក្នុងបញ្ជីឈ្មោះអ្នកបោះឆ្នោតបាន។
លោក ហង្ស ពុទ្ធ៖ «ជានីតិវិធីចុះឈ្មោះនោះ គឺហួសទៅហើយ។ ច្រកពីរដែលខ្ញុំគិតថា អាចនឹងទៅរួច ទីមួយគឺការបកស្រាយច្បាប់ និងការអនុវត្ត។ បានន័យថា បើសិនជាច្បាប់កំណត់ថា គាត់ជាប់ទោស អ៊ីចឹងមានការលើកលែងទោស។ ប្រហែលជាមានករណីពិសេស អាចនឹងបញ្ចូលគាត់ជាបេក្ខជនបាន ហើយមួយទៀត មានតែការធ្វើវិសោធនកម្មច្បាប់។ ជាការពិតនៅសល់ពេលតែមួយសប្ដាហ៍ទៀតទេ ប៉ុន្តែវិសោធនកម្មច្បាប់ ប្រសិនជាមានឆន្ទៈទាំងអស់គ្នា គឺអាចធ្វើទៅបានហើយ»។
លោក សម រង្ស៊ី បានផ្ញើលិខិតមួយនៅថ្ងៃទី២១ ខែកក្កដា ទៅលោក អ៊ឹម សួស្តី ប្រធាន គ.ជ.ប សុំឲ្យចុះឈ្មោះរូបលោកក្នុងបញ្ជីឈ្មោះអ្នកបោះឆ្នោត និងក្នុងបញ្ជីផ្លូវការបេក្ខជនឈរឈ្មោះបោះឆ្នោតសម្រាប់មណ្ឌលខេត្ត កណ្ដាល សម្រាប់ការបោះឆ្នោតជ្រើសតាំងតំណាងរាស្ត្រនីតិកាលទី៥ ថ្ងៃទី២៨ ខែកក្កដា។
លោក សម រង្ស៊ី ប្រធានគណបក្សសង្គ្រោះជាតិ បានមកដល់កម្ពុជា នៅព្រឹកថ្ងៃទី១៩ ខែកក្កដា បន្ទាប់ពីលោកបាននិរទេសខ្លួនទៅក្រៅប្រទេសអស់រយៈពេលជាង ៤ឆ្នាំ។ ការវិលត្រឡប់របស់លោក សម រង្ស៊ី លើកនេះ គឺក្រោយពីមានការព្រះរាជទានការលើកលែងទោសពីព្រះមហាក្សត្រ៕

ប្រភពពី៖ វិទ្យុអាស៊ីសេរី

FIFA ប្រកាស់ពីតម្លៃសំបុត្រ World Cup 2014

អន្តរជាតិ៖សហព័ន្ធបាល់ទាត់ពិភពលោក FIFA បានប្រកាសឲ្យដឹងពីតម្លៃសំបុត្រសម្រាប់ចូលមើលការប្រកួត World Cup២០១៤ ខាងមុខនេះដែលសំបុត្រក៏នឹងត្រូវដាក់លក់ជាសាធារណដែរនៅថ្ងៃទី ២០ ខែសីហាខាងមុននេះគឺនៅមុនពេលដែលការប្រកួតនេះចាប់ផ្តើមលេងនៅ ថ្ងៃទី១២ ខែមិថុនា ឆ្នាំ២០១៤ ។
សំបុត្រដែលថោកបំផុតសម្រាប់ការប្រកួត World Cup២០១៤ សម្រាប់ក្រុមអ្នកគាំទ្របរទេសមានតម្លៃចាប់ពី៥៩ដុល្លារឡើងទៅ។ នេះបើតាមការអះអាងឲ្យដឹងពី FIFA ។
ដំណាក់កាលទី១នៃដំណើរការលក់សំបុត្រនេះនឹងធ្វើឡើងនៅវេលាម៉ោង១២ ថ្ងៃត្រង់ម៉ោងក្នុងប្រទេសប្រេស៊ីល (ត្រូវនឹងម៉ោង១១ ម៉ោងសាកល)ថ្ងៃទី២០ ខែសីហា។
រីឯតម្លៃសំបុត្រសម្រាប់ប្រជាពលរដ្ឋប្រេស៊ីលវិញមានចាប់ពី៩ដុល្លារឡើងទៅ។
មានសំបុត្រប្រមាណជា៣លានសន្លឹកនឹងត្រូវដាក់លក់នៅ៣ដំណាក់កាល នេះដែលដំណាក់កាលទី២ នឹងធ្វើឡើងនៅថ្ងៃទី០៨ ខែធ្នូ ឆ្នាំ២០១៣ រហូតដល់ថ្ងៃទី០១ ខែមេសា ឆ្នាំ២០១៤ ចំណែកឯដំណាក់កាលនឹងចាប់ផ្តើមលក់ចាប់ពីខែមេសា ឆ្នាំ២០១៤តទៅ៕

ប្រភពពី៖ ABC

Saturday, July 20, 2013

សយ សុភាព ពិតជាកោរសក់មែន?

បន្ទាប់ពីមានការសួរដេញដោរច្រើនពីសំណាក់មហាជនទៅលើការនិយាយ និងការវិភាគរបស់លោក សយ សុភាព ដែលជានាយកសារពត៌មានដើមអំពិល ដោយលោកបាននិយាយថា “ប្រសិនបើលោក សម រង្ស៊ី អាចវិលចូលក្នុងស្រុកខ្មែរវិញបាន ខ្ញុំនឹងកោរសក់” នោះស្រាប់តែពេលថ្មីៗចុងក្រោយនេះគេបានឃើញរូបថតរបស់លោក សយ សុភាព ពិតជាបានកោរសក់មែន។

តាមប្រភពមិនច្បាស់ការមួយចំនួនបានអោយដឹងថា លោក សយ សុភាព បានទៅកោរសក់នៅលើប្រាសាទព្រះវិហារ ដោយមានព្រះសង្ឃជាអ្នកកោរអោយលោក និងមានការចូលរួមពីប្រជាពលរដ្ឋនៅទីនោះផងដែរ។

ការកោរសក់នេះ ក៏បានធ្វើអោយមានមតិមួយចំនួនបានលើកឡើងថា លោក សយ សុភាព ពិតជាគោរពពាក្យសំដីរបស់ខ្លួនប្រាកដមែន សាកសមជាមនុស្សថ្លៃថ្នូរ ទទួលស្គាល់នូវអ្វីដែលខ្លួនធ្វើ និងនិយាយ ជាពិសេសបានអនុវត្តភា្លមៗតែម្តង។

អ្នកខ្លះទៀតបាននិយាយថា លោក សយ សុភាព កោរសក់នៅប្រាសាទព្រះវិហារ មិនមែនដោយសារលោក សម រង្ស៊ីទេ គឺ ដោយសារ លោកមានជំនឿ និងចង់បណ្តេញទាហានសៀមឈ្លានពានទឹកដី ដោយពួកវាបានចូលមកលុកលុយយើងគ្មានពេលស្រាកស្រាន្តសោះ ជាហេតុទើបធ្វើអោយមានការចូលរួមពីប្រជាជនដ៏ច្រើន។

ទោះបីជាលោក សយ សុភាព កោរសក់ដោយឈរលើហេតុផលណាក៏ដោយ ក៏សុទ្ធតែជាផលល្អសំរាប់លោក ព្រោះវាបង្ហាញពីភាពទទួលខុសត្រូវ និងការយកចិត្តទុកដាក់ចំពោះស្ថានការណ៍នយោបាយនៅក្នុងប្រទេសកម្ពុជា។

សូមបញ្ជាក់ផងដែរថា ពុំទាន់មានពត៌មានច្បាស់លាស់ថាតើលោក សយ សុភាព ពិតជាបានកោរសក់ដូចក្នុងរូបនេះមែន ឬក៏គ្រាន់តែជារូបភាពចាស់ទេ ឬវាគ្រាន់តែជាពាក្យចចាមអារ៉ាមប៉ុណ្ណោះ៕

ប្រភពពី៖ Happy Cambodia

Friday, July 19, 2013

លោកសម រង្ស៊ីជួបជាមួយអ្នកគាំទ្រនៅទីលានប្រជាធិបតេយ្យ

ដោយ អ៊ឹម រចនា

លោកសម រង្ស៊ី ថ្លែងទៅកាន់អ្នកគាំទ្រ នៅទីលានប្រជាធិបតេយ្យ ថ្ងៃទី១៩ កក្កដា ឆ្នាំ២០១៣
Siv Channa/RFI

លោកសម រង្ស៊ី ប្រធានគណបក្សសង្គ្រោះជាតិ នៅទីបំផុតក៏បានវិលត្រឡប់ចូលស្រុកវិញ នៅថ្ងៃសុក្រ ទី១៩កក្កដានេះ ដោយមានមនុស្សរាប់សែននាក់ បានទទួលស្វាគមន៍ និងក្រោយមក បានហែហម អមដំណើរលោកសម រង្ស៊ី ពីព្រលានយន្ដហោះអន្ដរជាតិភ្នំពេញ ឆ្ពោះមកកាន់ទីលានប្រជាធិបតេយ្យ។លោកសម រង្ស៊ី អមដោយលោកកឹម សុខា និងថ្នាក់ដឹកនាំជាន់ខ្ពស់នៃគណបក្សសង្គ្រោះជាតិជាច្រើនរូបទៀត បានមកដល់ទីលានប្រជាធិបតេយ្យនៅម៉ោងប្រមាណ២រសៀល ក្រោមការសាទរយ៉ាងក្លៀវក្លាពីសំណាក់អ្នកគាំទ្រដ៏ច្រើនលើសលុប។

សេចក្ដីរាយការណ៍របស់ អ៊ឹម រចនា

ស្តាប់ (04:08)

ម៉ោង២រសៀលទៅហើយ តែមេឃប្រែជាស្រទុំ ត្រជាក់ ខុសពីទឹកចិត្តរបស់អ្នកគាំទ្រគណបក្សសង្គ្រោះជាតិ ដែលពុះកញ្ជ្រោលកាន់តែខ្លាំងពេលសមាជិកជាន់ខ្ពស់គណបក្សសង្គ្រោះជាតិ អ្នកស្រី មួរ សុខហួរ ប្រកាសអញ្ជើញលោកសម រង្ស៊ី ប្រធានគណបក្សសង្គ្រោះជាតិ ឲ្យឡើងថ្លែងសុន្ទរកថា។ ជាសុន្ទរកថាផ្លូវការដំបូងបង្អស់ ដែលលោកសម រង្ស៊ី ថ្លែងទៅកាន់អ្នកគាំទ្ររបស់ខ្លួន ក្រោយពីលោកបានវិលត្រឡប់ចូលស្រុកវិញ នៅថ្ងៃសុក្រ ទី១៩កក្កដា ឆ្នាំ២០១៣។
ចំនួនអ្នកគាំទ្រដ៏ច្រើនលើសលុប ដែលបានទៅប្រមូលផ្ដុំគ្នានៅទីលានប្រជាធិបតេយ្យ ដើម្បីបានជួបជាមួយលោកសម រង្ស៊ីនោះ ត្រូវបានអះអាងផ្សេងៗពីគ្នា។ លោកយឹម សុវណ្ណ អ្នកនាំពាក្យគណបក្សសង្គ្រោះជាតិឲ្យដឹងថា មានចំនួនជាង១០ម៉ឺននាក់។

ក្រោមសំឡេងហ៊ោកញ្ជៀវរបស់អ្នកគាំទ្រ លោកសម រង្ស៊ី ចាប់ផ្ដើមសុន្ទរកថារបស់ខ្លួន ដោយថ្លែងពីអារម្មណ៍ រំភើបរីករាយ និងក្ដុកក្ដួល ដែលបានត្រឡប់មកជាន់ដីកម្ពុជាវិញ។ លោក សម រង្ស៊ីថ្លែងថា វាជាសុបិនក្លាយជាការពិត។

បន្ទាប់ពីនោះ លោកក៏បានឆ្លៀតឱកាសនោះ ថ្លែងអំណរគុណដល់ព្រះមហាក្សត្រដែលបានព្រះរាជទានលើកលែងទោសដល់រូបលោក។

ក្នុងពេលដែលលោកសម រង្ស៊ី ត្រូវព្រះមហាក្សត្រព្រះរាជទាន លើកលែងទោស លោកលែងមានឈ្មោះជាទណ្ឌិត ហើយលោកបញ្ជាក់ថា ពេលនេះ លោកមានសេរីភាពពេញលេញហើយ។

លោកសម រង្ស៊ី បញ្ជាក់ប្រាប់អ្នកគាំទ្របន្ថែមថា ការត្រឡប់មកមាតុប្រទេសរបស់លោក មុនពេលការបោះឆ្នោតនេះ គឺលោកត្រឡប់មករួមជាមួយគណបក្សរបស់លោក ដើម្បីសង្គ្រោះជាតិ។

ប្រធានគណបក្សប្រឆាំងរូបនេះ បានថ្លែងកោតសរសើរចំពោះសហការីរបស់លោក សម្រាប់ការខិតខំប្រឹងប្រែងរៀបចំការស្វាគមន៍ដំណើរវិលត្រឡប់របស់លោក។ លោកបន្តថា បើគ្មាន គណបក្សសង្គ្រោះជាតិ លោកក៏គ្មានថ្ងៃនេះដែរ។ លោកសម រង្ស៊ី សំដៅជាពិសេសដល់លោក កឹម សុខា អនុប្រធានគណបក្សសង្គ្រោះជាតិ ដែលលោកបានអះអាងថាជា ដៃគូស្លាប់រស់របស់លោក។

ក្រោយពីនោះ ប្រធានគណបក្សសង្គ្រោះជាតិ លោក សម រង្ស៊ី បានប្រកាសឲ្យអ្នកគាំទ្រ ជ្រាបជាថ្មីម្ដងទៀត អំពីគោលនយោបាយរបស់គណបក្សសង្គ្រោះជាតិ មុននឹងបិទបញ្ចប់សុន្ទរកថា របស់លោកនៅម៉ោងជាង៣រសៀល។ ក្រោយពីនោះ គ្រាប់ភ្លៀងធំៗជាច្រើន បានធ្លាក់ចុះមកសស្រាក់ ហាក់បណ្ដេញសកម្មជនគណបក្សសង្គ្រោះជាតិ ឲ្យបែកខ្ញែកគ្នា ទៅសម្រាកយកកម្លាំង ឬទទួលទានអាហារ។ អាហារដែលសកម្មជនគណបក្សប្រឆាំងដ៏ធំមួយនេះ មិនទាន់បានទទួលទានមួយគ្រាប់សោះ តាំងពីហែលោកសម រង្ស៊ីចេញពីព្រលានយន្ដហោះអន្ដរជាតិភ្នំពេញ មកទល់ម៉ោងជាង៣រសៀល៕
ប្រភពពី៖ ខេមរភាសា

Tuesday, July 16, 2013

ការសម្រេចចិត្តមួយដែលរំលូតការចម្លងបដិវត្តន៍ “រដូវផ្ការីកនៅអារ៉ាប់”មកកម្ពុជា

ភ្នំពេញ: នៅពេលដែលអ្នកនិពន្ធសរសេរអត្ថបទនេះដំបូង គឺចង់ធ្វើការវិភាគថា តើបក្សប្រឆាំងកំពុងតែចង់នាំបដិវត្តន៍ផ្កាម្លិះ ចូលមកកម្ពុជា នៅមុនពេលបោះឆ្នោត ឬយ៉ាងណា ដោយហេតុថា លោកសម រង្ស៊ី បានប្តេជ្ញាចិត្តថា ដាច់ខាតលោកត្រូវត្រឡប់មកកម្ពុជាវិញ ទោះបីជាលោកត្រូវប្រឈមនឹងការចាប់ខ្លួន។

ប៉ុន្តែនៅក្នុងដំណើរការនៃការប្រមូល ទិន្ន័យដើម្បីគាំទ្រដល់ការវិភាគនេះ សម្តេចហ៊ុន សែន បានសម្រេចចិត្តស្នើទៅកាន់ព្រះមហាក្សត្រ ដើម្បីព្រះរាជទានការលើកលែងទោសដល់លោក សម រង្ស៊ី ដែលនៅថ្ងៃទី១២ ខែកក្កដា ឆ្នាំ២០១៣ លោកក៏ទទួលការលើកលែងទោសពីព្រះមហាក្សត្រកម្ពុជា។ ដូច្នេះ ការវិភាគត្រូវបានប្តូរទិសទៅរកថា តើការសម្រេចចិត្តរបស់នាយករដ្ឋមន្ត្រី មានសារសំខាន់យ៉ាងណា ដើម្បីបញ្ចៀសការបង្ហូរឈាមមួយ ដែលអាចនឹងកើតមាន ដោយសារតែការវិលត្រឡប់របស់លោកសម រង្ស៊ី បើសិនជាគ្មានការលើកលែងទោសទេនោះ។

នៅក្នុងទិដ្ឋភាពចំពោះមុខមួយ រដ្ឋាភិបាលកម្ពុជា បានដកថយមួយជំហានចំពោះចំណាត់ការចំពោះលោក សម រង្ស៊ី ដែលមានទោសជាង១០ឆ្នាំជាប់ខ្លួន ហើយត្រូវប្រឈមមុខនឹងការចាប់ខ្លួន បើសិនជាគាត់វិលត្រឡប់មកវិញ ដោយគ្មានការលើកលែងទោសពីព្រះមហាក្សត្រ។ ការវិភាគជ្រៅជាងនេះ គណបក្សកាន់អំណាច និងសម្តេចនាយករដ្ឋមន្ត្រី អាចនឹងទទួលការគោរពច្រើនពីការសម្រេចចិត្តមួយនេះ។ ទីមួយ ការលើកលែងទោសដល់លោក សម រង្ស៊ី អាចធ្វើឲ្យការបោះឆ្នោតនៅកម្ពុជា កាន់តែមានលក្ខណ:សេរី និងប្រជាធិបតេយ្យ ខណ:ដែលកម្ពុជាបានលះបង់បន្តិច អំពីគោលការណ៍ច្បាប់ និងយុត្តធម៌សង្គម។ សំខាន់ជាងនេះ ការលើកលែងទោសដល់លោក សម រង្ស៊ីនោះ គឺមានន័យថា ជាការបញ្ចប់ការប្រឈមមុខដាក់គ្នា រវាងកម្លាំងប៉ូលិសអនុវត្តច្បាប់ និងក្រុមអ្នកគាំទ្ររបស់លោកសម រង្ស៊ី នៅពេលដែលលោកសម រង្ស៊ី វិលត្រឡប់មកកម្ពុជាវិញ ហើយគាត់ត្រូវចាប់ខ្លួននៅព្រលានយន្តហោះ ក្នុងករណីដែលគ្មានការលើកលែងទោស។ វាទំនងជាអំពើហិង្សា អាចនឹងកើតមាននៅពេលនោះ ដោយសារតែការតទល់គ្នា រវាងសមត្ថកិច្ច និងក្រុមអ្នកគាំទ្ររបស់លោក សម រង្ស៊ី និងគណបក្សង្គ្រោះជាតិ។ តាមពិតទៅនោះ មជ្ឈដ្ឋានជាច្រើន បានមានការព្រួយបារម្ភបែបនេះ មុនពេលព្រះមហាក្សត្រ ព្រះរាជទានការលើកលែងទោសដល់លោក។

ដូច្នេះ តាមការវិភាគជ្រុងមួយនោះ គណបក្សសង្គ្រោះជាតិ និងលោក សម រង្ស៊ីផ្ទាល់ បានឈ្នះចិត្តរដ្ឋាភិបាល និងសម្តេចហ៊ុនសែន ដោយជំរុញឲ្យមានការលើកលែងទោសដល់លោក សម រង្ស៊ី។ ប៉ុន្តែការវិភាគស៊ីជម្រៅជាងនេះ សម្តេចហ៊ុន សែន បានរំលូតការប៉ុនប៉ងរបស់មេបក្សប្រឆាំងនៅក្នុងការនាំយកបដិវត្តន៍ ផ្កាម្លិះ ឬក៏បដិវត្តន៍ “រដូវផ្ការីកនៅអារ៉ាប់” មកកាន់ប្រទេសកម្ពុជា ដោយប្រើហ្វូងមនុស្ស ដើម្បីបះបោរ និងដណ្តើមអំណាច។ សម្តេចអាចនឹងព្រួយបារម្ភថា ការប្រឈមមុខដាក់គ្នា រវាងអាជ្ញាធរ និងក្រុមអ្នកគាំទ្រលោកសម រង្ស៊ី អាចនឹងនាំដល់ការបង្ហូរឈាមមនុស្ស។ ដូច្នេះ គណបក្សប្រឆាំង ក៏មិនអាចដើរដល់គោលដៅនៃការជំរុញការបះបោរ។

ហេតុអ្វីបានជាមានការវិភាគថា ការបះបោរប្រជាជន គឺជាគោលដៅចង់បានបំផុតរបស់លោក សម រង្ស៊ី និងគណបក្សប្រឆាំង?

ការពិតដ៏រឹងមាំចំនួនពីរ អាចគាំទ្រការវិភាគតាមទិដ្ឋភាពនេះ។ ទីមួយ ការវិភាគទូទៅ គឺគណបក្សប្រជាជនកម្ពុជា នឹងឈ្នះការបោះឆ្នោតនេះ ហើយបន្តកាន់អំណាចទៀត។ នេះជាការសន្និដ្ឋានរបស់អ្នកវិភាគជាច្រើន និងសារព័ត៌មានអន្តរជាតិល្បីៗ ដូចជា AFP AP Kyodo Reuters ជាដើម។

ដូច្នេះ គណបក្សសង្គ្រោះជាតិ នឹងមិនអាចចូលកាន់អំណាចបានឡើយ តាមរយ:ការបោះឆ្នោត នៅថ្ងៃទី២៨ខែកក្កដាខាងមុខនេះ។ ការបះបោរ គឺជាផ្លូវតែមួយគត់ដែលអាចជួយពួកគេបាន បើសិនជាការវាយតម្លៃ ដោយអ្នកវិភាគ និងសារព៍ត៌មានបរទេស ពិតជាត្រឹមត្រូវមែននោះ។

ទី ពីរ លោក សម រង្ស៊ី មានផែនការយូរមកហើយ នៅក្នុងការដឹកនាំប្រទេស តាមរយ:ការបះបោរ តាមលំនាំអ្វីដែលកើតមាន នៅប្រទេសអារ៉ាប់ ដែលកំពុងតែជាប់ផុងនៅក្នុងវិបត្តិដោយសារតែការធ្វើបដិវត្តន៍ទាំងនោះ។

ហេតុអ្វីមានការវិភាគថា លោក សម រង្ស៊ី ចង់ឲ្យមានការបះបោរ ដូចជា បដិវត្តន៍ផ្កាម្លិះ?

ដោយពិនិត្យថយក្រោយ ទៅរកអតីតកាលជាង ២ឆ្នាំមុន នៅពេលដែលប្រទេសទុយណេស៊ី បានផ្ទុះបដិវត្តន៍មួយ ដែលហៅថា បដិវត្តន៍ផ្កាម្លិះ ចាប់ពីថ្ងៃទី១៨ខែធ្នូឆ្នាំ២០១០ ហូតដល់ថ្ងៃទី១៤ ខែមករាឆ្នាំ២០១១ និង សកម្មភាពរបស់លោក សម រង្ស៊ី ៧ខែក្រោយពេលនោះ គេនឹងងាយគិតថា មេបក្សប្រឆាំងរូបនេះ ដែលធ្លាប់ល្បីឈ្មោះ ជាដង្ខៅបាតុកម្ម រង់ចាំតែពេលវេលាទុំជោរ ដើម្បីឈានដល់ការបះបោរនៅក្នុងប្រទេសកម្ពុជា ដោយមិនខ្វល់ថា នឹងមានការបង្ហូរឈាមមនុស្ស ឬយ៉ាងណាឡើយ ដើម្បីបុព្វហេតុអ្វីដែលក្រុមលោកហៅថា “ការផ្លាស់ប្តូរ”។

បដិវត្តន៍ផ្កាម្លិះ បានផ្ទុះនៅប្រទេសទុយណេស៊ី នៅថ្ងៃទី១៨ ខែធ្នូឆ្នាំ២០១០ រហូតដល់ថ្ងៃទី ១៤ខែមករាឆ្នាំ២០១១ ដោយបង្ខំឲ្យប្រធានាធិបតី បេន អាលី បានលាលែងពីតំណែង។ ប៉ុន្តែរហូតមកទល់ពេលនេះ ទុយណេស៊ី ស្ថិតនៅក្នុងវិបត្តិនៅឡើយ។ ការបះបោរនោះ បានរាលដាលដល់ប្រទេសអារ៉ាប់ ដែលផ្ទុះចេញជាអ្វីដែលគេហៅថា បដិវត្តន៍ “រដូវផ្ការីកនៅអារ៉ាប់” ដែលនាំទៅដល់ការដួលរលំរបស់មេដឹកនាំប្រទេសអេហ្ស៊ីប លីប៊ី ស៊ីរី និង យេមេនផងដែរ។

នៅពេលមានការដួលរលំតៗគ្នាបែបនេះ លោក សម រង្ស៊ី ក៏ចាប់ផ្តើមមានគំនិតចម្លងយកបដិវត្តន៍បែបនោះ មកកាន់ប្រទេសកម្ពុជា ដោយមិនខ្លាចអំពីផលលំបាកដែលបណ្តាលមកពីការបះបោរបែបនោះឡើយ។ នៅថ្ងៃទី២១ ខែកក្កដា លោក សម រង្ស៊ី បានធ្វើដំណើរទៅកាន់ប្រទេសទុយណេស៊ី ដោយចង់រៀនសូត្រ និងដកពិសោធន៍ អំពីរបៀបដឹកនាំការបះបោរនៅប្រទេសនោះ។

គណបក្សរបស់លោក មិនញញើត នឹងប្រកាសត្រង់ៗអំពីទស្សនកិច្ចនោះ ហើយថែមទាំងបង្ហាញអំពីចេតនានៃការរៀបចំការបះបោរនៅកម្ពុជា តាមរយ:ទស្សនកិច្ចដ៏កម្ររបស់លោកសមរង្ស៊ី។ នៅថ្ងៃទី២១ ខែកក្កដាឆ្នាំ២០១១ គណបក្សសម រង្ស៊ី ក៏បានចេញសេចក្តីថ្លែងការណ៍មួយ ដែលនិយាយត្រង់ៗអំពីចេតនារៀបចំអ្វីដែលគេហៅថា “អំណាចប្រជាជន” ដោយចង់ឲ្យមានបដិវត្តន៍ តាមលំនាំបដិវត្តន៍ “រដូវផ្ការីកនៅអារ៉ាប់” កើតមាននៅកម្ពុជា ដែលកំពុងតែធ្វើដំណើរលើផ្លូវប្រជាធិបតេយ្យស្រាប់ទៅហើយនោះ។

ជាមួយនឹងចំណងជើង “លោក សម រង្ស៊ី នៅប្រទេសទុយណេស៊ី ដើម្បីរៀបចំ “អំណាចប្រជាជន ”នៅកម្ពុជា សេចក្តីថ្លែងការណ៍របស់គណបក្សសម រង្ស៊ី បានឲ្យដឹងថា សមរង្ស៊ីអំពាវនាវឲ្យមានអ្វីដែលហៅថា សម្ព័ន្ធភាពប្រជាជន ដើម្បីផ្តួលរំលំមេដឹកនាំ ដែលកាន់អំណាចច្រើនទសវត្សរ៍។

សកម្មភាពថ្មីៗនេះរបស់លោក សម រង្ស៊ី ក៏បានព្យាយាមប្រមូលកម្លាំងគាំទ្រពីយុវជន សម្រាប់សុបិនមួយនេះរបស់គាត់ និងគណបក្សប្រឆាំង។ លោក សម រង្ស៊ី បានសម្រេចហ៊ានប្រឈមនឹងការចាប់ដាក់គុក នៅពេលគាត់វិលត្រឡប់មកវិញ។ ប៉ុន្តែទន្ទឹមនោះ គណបក្សរបស់គាត់ ក៏ត្រៀមមនុស្សជាច្រើនពាន់នាក់ ដើម្បីទៅទទួលគាត់នៅព្រលានយន្តហោះផងដែរ។

សាកគិតទៅមើល នឹងមានអ្វីកើតឡើង បើសិនជាប៉ូលិស តាំងចិត្តធ្វើតាមសាលក្រមតុលាការ ហើយចាប់ខ្លួនលោក សម រង្ស៊ី ហើយអ្នកគាំទ្រគាត់ មិនបណ្តោយឲ្យប៉ូលិសចាប់ខ្លួនគាត់នោះ។ ពេលនោះ មនុស្សគ្រប់គ្នា នឹងធ្លាក់ចូលក្នុងអន្ទាក់ របស់លោក សម រង្ស៊ី ហើយការប៉ះទង្គិចគ្នាប្រាកដជាកើតឡើង ចំណែកផលវិបាកគឺគ្មាននរណានឹកស្មានដល់ឡើយ។

ការចាប់លោក សម រង្ស៊ី នឹងអាចផ្តល់លេសគ្រប់គ្រាន់សម្រាប់ការដុតបញ្ឆេះការបះបោរមួយ តាមអ្វីដែលលោក សម រង្ស៊ី ធ្លាប់គិត។ ការបះបោរជាចំហមួយ នឹងអាចប្រកាសឡើងនៅពេលនោះ ហើយអាចនឹងរុញច្រានកម្ពុជា ឲ្យធ្លាក់ក្នុងវិបត្តិនយោបាយដ៏សែនធ្ងន់ ឬសង្គ្រាមស៊ីវិលដូចដែលអ្វីបានកើតនៅប្រទេសអារ៉ាប់ទាំងឡាយ ដែលឆ្លងកាត់បដិវត្តន៍ផ្កាម្លិះ ឬបដិវត្តន៍រដូវផ្ការីក ឬក៏បដិវត្តន៍ផ្កាឈូក។

ទស្សនាវដ្តី The Economist បានសន្និដ្ឋានថា ប្រទេសទុយណេស៊ី ប្រទេសអេហ្ស៊ីប ប្រទេសលីប៊ី ប្រទេសយេម៉េន និងប្រទេសស៊ីរី ដែលកើតមានបដិវត្តន៍ទាំងនោះ គឺគ្មានប្រទេសណាមួយ រហូតមកទល់ពេលនេះ មានស្ថិរភាពនយោបាយ ឬលទ្ធិប្រជាធិបតេយ្យដ៏ត្រឹមត្រូវឡើយ។ ការតវ៉ា បាតុកម្ម អំពើហិង្សា កុប្បកម្ម ភេរវកម្ម កំពុងញាំញីប្រទេសទាំងនោះ ពិសេសប្រទេសស៊ីរី ស្ថិតនៅក្នុងសង្គ្រាមស៊ីវិលនៅឡើយ។

ប្រទេសកម្ពុជាដែលត្រូវគេ ចាត់ទុកថា កំពុងតែធ្វើដំណើរលើផ្លូវដ៏ត្រឹមត្រូវនោះ មិនគួរនឹងធ្វើដំណើរតាមផ្លូវប្រទេសអារ៉ាប់ទាំងនោះឡើយ។ ចំណែកលោក សម រង្ស៊ី ក៏មិនគួរគិតអំពីអ្វីដែលបំផ្លិចបំផ្លាញ សម្រាប់ប្រទេស និងប្រជាជនកម្ពុជាដែរ។

នៅក្នុងការវិភាគលើកក្រោយ អ្នកនិពន្ធ នឹងព្យាយាមពន្យល់លម្អិតថា តើការបះបោរនៅប្រទេសទាំងនោះ មានទំហំផលប៉ះពាល់ធ្ងន់ធ្ងរប៉ុនណា ហើយថាហេតុអ្វី ក៏កម្ពុជាមិនគួរចម្លងវាចូលមក៕

ប្រភពពី៖ ខ្មែរស្ថាបនា