Khmervital ខ្មែរវ៉ាយថល: June 2013

Sunday, June 30, 2013

និសិ្សតម្នាក់ស្លាប់ ពេលបើកម៉ូតូធំ ទៅបុកបង្គោលសញ្ញាឡើងភ្នំគូលែន

សៀមរាប: និស្សិតម្នាក់បានស្លាប់នៅកន្លែងកើតហេតុ ពេលជិះម៉ូតូធំតែម្នាក់ឯងយ៉ាងលឿន ពីខេត្ដសៀមរាប ក្នុងគោលដៅឡើងទៅលេងរមណីយដ្ឋានភ្នំគូលែន បុកបង្គោលសញ្ញាផ្លូវកោង បណ្ដាលឱ្យដាច់ភ្លៅខាងឆ្វេងចេញពីខ្លួន ហើយម៉ូតូក៏ដាច់ ២ កំណាត់ ពីខេត្ដសៀមរាបក្នុង គោលដៅឡើងទៅលេងរមណីយដ្ឋានភ្នំគូលែន

ហេតុការណ៍គ្រោះថ្នាក់ដ៏រន្ធត់នេះ ស្ថិតនៅភូមិថ្នល់ ឃុំរុនតាឯក ស្រុកបន្ទាយស្រី វេលាម៉ោង៨ព្រឹក ថ្ងៃទី២៨ ខែមិថុនា ឆ្នាំ២០១៣នេះ។
លោកវរសេនីយ៍ត្រីអ៊ុយ វណ្ណា អធិការនគរបាលស្រុកបន្ទាយស្រី បានបញ្ជាក់ប្រាប់ថា ជនរងគ្រោះដែលស្លាប់នោះមានឈ្មោះមាស សេរីវឌ្ឍន៍ ហៅម៉ាប់ ភេទប្រុស អាយុ២៣ឆ្នាំ ជានិស្សិតឆ្នាំទី៣ នៅសាកលវិទ្យាល័យបញ្ញាសាស្ដ្រខេត្ដសៀមរាប មានទីលំនៅភូមិសាលា កន្សែង សង្កាត់ស្វាយដង្គំ ក្រុង-ខេត្ដសៀមរាប។

លោកវរសេនីយ៍ត្រីអ៊ុយ វណ្ណា បានឱ្យដឹងទៀតថា នៅថ្ងៃកើតហេតុគេបានឃើញយុវជនមួយក្រុមជិះម៉ូតូពី ៣ ទៅ ៥ គ្រឿងពីខេត្ដសៀមរាប ក្នុងគោលបំណងជិះឡើងទៅលេងនៅរមណីយដ្ឋានភ្នំគូលែន។ មុនពេលកើតហេតុនេះដែរ ម៉ូតូរបស់មិត្ដភក្ដិ ជនរងគ្រោះនោះពី ៣ ទៅ ៥ គ្រឿងបានបើកទៅមុខហួសគោលដៅកន្លែងគ្រោះថ្នាក់រួចហើយ។ ដោយឡែកជនរងគ្រោះបានជិះម៉ូ តូធំរបស់ខ្លួន ដោយពាក់ឯកសណ្ឋានអាវការពារ និងមួកសុវត្ថិភាពត្រឹមត្រូវ ហើយបើកក្នុងល្បឿនលឿនតាមម៉ូតូមិត្ដភក្ដិនៅ
ខាងមុខ។ ប៉ុន្ដែប្រភពពីមិត្ដភក្ដិនិយាយថា ជនរងគ្រោះបានជិះម៉ូតូធំវ៉ាមិត្ដភក្ដិទៅមុន ហើយក៏គ្រោះថ្នាក់បុកបង្គោលស្លាកសញ្ញាតែម្ដង។

លោកអធិការបានបន្ដឱ្យដឹងទៀតថា នៅពេលមកដល់កន្លែងកើតហេតុជនរងគ្រោះបានបើកម៉ូតូធំ ទៅបុកនឹងបង្គោលស្លាកសញ្ញាប្រាប់ពីទិសកោងយ៉ាងពេញទំហឹង បណ្ដាលឱ្យជនរងគ្រោះដាច់ភ្លៅខាងឆ្វេងចេញពីដងខ្លួន ហើយម៉ូតូក៏បានដាច់ជាពីរកំណាត់ និងខ្ទាតអូសចេញពីកន្លែងកើតហេតុប្រមាណ ៥០ ម៉ែត្រ ស្លាប់ភ្លាមៗនៅនឹងកន្លែងកើត។

លោកអធិការបានបន្ដទៀតថា គ្រោះថ្នាក់ខាងលើ គឺជាករណីគ្រោះថ្នាក់ចរាចរណ៍ដោយខ្លួនឯង ហើយទីនោះជាផ្លូវកោងថែមទៀតផង។ លោកនិយាយទៀតថា កន្លែងគ្រោះថ្នាក់ចរាចរណ៍ខាងលើគឺធ្លាប់កើតហេតុគ្រោះថ្នាក់ចរាចរណ៍ ជាញឹកញាប់រួចមកហើយ៕

រូបថតកាលពីមិនទាន់ស្លាប់ជាមួយនិងម៉ូតូធំរបស់ខ្លួន (រូបថត៖ហ្វេសប៊ុក)))

ប្រភព៖ khmer-note

Saturday, June 29, 2013

បក្សប្រឆាំង គ្មានសិទ្ធិប្រើរថយន្ដ ពាក់ ស្លាកលេខ រដ្ឋសភា សម្រាប់ឃោសនា រក សំឡេងឆ្នោតនោះឡើយ

ភ្នំពេញ ៖ គណបក្សសង្គ្រោះជាតិ ជា ពិសេស អតីតតំណាងរាស្ដ្ររបស់ខ្លួនទាំង អស់ ពុំមានសិទ្ធិអនុញ្ញាតឱ្យប្រើរថយន្ដ ដែលពាក់ស្លាកលេខរដ្ឋសភា សម្រាប់ប្រើ ពេលយុទ្ធនាការឃោសនាបោះឆ្នោតនោះ ឡើយ ដោយសារតែពួកគេត្រូវអស់អភ័យ ឯកសិទ្ធិជាតំណាងរាស្ដ្រទៀតហើយក្រោយ ពីគណបក្សសម រង្ស៊ី និងគណបក្សសិទ្ធិ មនុស្ស បានរួមបញ្ចូលគ្នាជាគណបក្សតែ មួយ គឺគណបក្សសង្គ្រោះជាតិ ។

ឥណ្ឌា ចុះបេសកកម្មស្វែងរកសាកសព ជនរងគ្រោះព្រោះទឹកជំនន់

ក្រុមសង្គ្រោះបានចេញប្រតិបត្តការណ៍ក្នុងការស្វែងរកសាកសព មនុស្សដែលបានស្លាប់ដោយសារទឹកជំនន់នៅភាគខាងជើងប្រទេសឥណ្ឌាកាលពី ម្សិលមិញនេះ។
ប្រជាពលរដ្ឋដែលរស់នៅក្នុងរដ្ឋ Uttarakhand ជាង ១ សែននាក់បានឈរ និងអង្គុយជាជួរនៅលើទីទួលសវត្ថិភាព មានមនុស្សប្រមាណជាង ៤ ពាន់នាក់ប៉ុណ្ណោះដែលបានទៅដល់ជំរំសង្គ្រោះ។ ទន្លេដែលកើតចេញពីទឹកជំនន់បានបោកបក់យកផ្ទះសម្បែង និងសាលារៀន អស់ជាច្រើន ក្នុងនោះរដ្ឋាភិបាលឥណ្ដាបានប្រាប់ដល់សារព័ត៌មានបារាំង AFP ឱ្យដឹងថាអាចនឹងមានមនុស្សច្រើនជាង ១ ពាន់នាក់បានស្លាប់បាត់បង់ជីវិត ខណៈពេលដែលថ្ងៃម្សិលមិញនេះក្រោយពេលដែលព្យុះភ្លៀងបានស្ងប់គេបាន បញ្ចេញក្រុមសង្គ្រោះដើម្បីស្វែងរកសាកសពជនរងគ្រោះ។
អ្នកនាំពាក្យរដ្ឋាភិបាលក៏បានប្រាប់បន្ថែមផងដែរថា អ្នកដែលរស់រានមានជីវិតនឹងត្រូវបានគេជួយសង្គ្រោះជាបន្តបន្ទាប់។ គួរបញ្ជាក់ផងដែរថារដ្ឋភាគខាងជើងប្រទេសឥណ្ឌា បានរងគ្រោះព្រោះតែព្យុះម៉ូសុង ដែលបានអូសបន្លាយមកតាំងពីថ្ងៃទី ១៥ មកម្ល៉េះ៕

ប្រភព៖ ABC

បរិស្ថានល្អត្រូវចាប់ផ្ដើមពីយើងទាំងអស់គ្នា

សព្វថ្ងៃ បញ្ហាផ្ទុកផ្ដាក់ និងប្រមូលសម្រាម គឺជាក្ដីកង្វល់មួយសម្រាប់ប្រជាពលរដ្ឋ និងជាប្រធានបទដ៏ក្ដៅគគុកមួយដែលប្រជាពលរដ្ឋ និងអាជ្ញាធរកំពុងចោទដាក់គ្នា។
តាមការសង្កេត នៅកែងផ្លូវ ឬដីទំនេរទំនេរចោលមួយចំនួន បានក្លាយទៅជាកន្លែងចោលសម្រាមរបស់ប្រជាពលរដ្ឋ ហើយចំនួនសម្រាមកាន់តែមានចំនួនច្រើនឡើងៗ បណ្ដាលឲ្យបរិស្ថានក្នុងតំបន់មានភាពមិនប្រក្រតី ដោយសារតែក្លិនស្អុយសាយភាយចេញពីគំនរសម្រាមទាំងនោះ និងធ្វើឲ្យប៉ះពាល់ដល់សុខភាពប្រជាពលរដ្ឋទៀតផង។
ម្យ៉ាងវិញទៀតនោះ បញ្ហាក្នុងការប្រមូលសម្រាមគឺស្ថិតនៅក្នុងចំណុចក្ដៅ ដោយសារតែភាពយឺតយ៉ាវពីសំណាក់ក្រុមហ៊ុនលើការប្រមូលសម្រាម។ បញ្ហានេះក៏កាន់តែជម្រុញឲ្យសម្រាមកាន់តែមានការកើនឡើង និងបង្កជាបញ្ហាផងដែរ។ យ៉ាងណាមិញ ការផ្ទុកផ្ដាក់សម្រាមរបស់ប្រជាពលរដ្ឋមួយចំនួនគឺមិនទាន់មានភាពល្អ ប្រសើរ និងបែងចែកតាមប្រភេទនៅឡើយដែលជាហេតុធ្វើឲ្យសម្រាមកាន់តែមានសភាព មិនល្អ និងសាយក្លិនកាន់តែអាក្រក់។
បញ្ហាប្រឈមនេះ ត្រូវបានប្រជាពលរដ្ឋរិះគន់យ៉ាងចាស់ដៃទៅលើអាជ្ញាធរពីកង្វះ សមត្ថភាពកក្នុង

ការដោះស្រាយ និងកាត់បន្ថយនូវចំនួនសម្រាម ខណៈដែលប្រជាពលរដ្ឋមួយចំនួនមិនបានចូលរួមថែរក្សាបរិស្ថានក្នុង តំបន់ និងបន្ដបោះចោលសម្រាមដោយគ្មានសណ្ដាប់ធ្នាប់ផងនោះ។ ហើយបញ្ហានេះយើងមិនអាចធ្វើការស្ដីបន្ទោសទៅលើភាគីណាម្ខាងបានឡើយ ព្រោះប្រសិនបើសង្កេតទៅលើស្ថានភាពបច្ចុប្បន្ន យើងបានឃើញយ៉ាងច្បាស់ថា ប្រភពនៃសម្រាមទាំងនោះកើតឡើងដោយសារតែអ្នកណា ហើយបញ្ហាទាំងនេះមានអ្នកណាហ៊ានចេញមុខទទួលខុសត្រូវឬទេ គឺមានតែការចោទដាក់គ្នាទៅវិញទៅមកប៉ុណ្ណោះ។
ប្រសិនបើក្រឡេកទៅមើលបណ្ដាប្រទេសដែលមានការអភិវឌ្ឍន៍នៅក្នុង តំបន់មួយចំនួន ការផ្ទុកផ្ដាក់សម្រាមគឺជាកត្តាយ៉ាងសំខាន់មួយ ដែលប្រជាពលរដ្ឋ និងអាជ្ញាធរចូលរួមសហការគ្នាយ៉ាងសស្រាក់សស្រាំ ត្បិតពួកគេបានដឹងថាសម្រាមគឺជាប្រភពនៃមេរោគ និងបង្កឲ្យមានផលប៉ះពាល់ដល់បរិស្ថានយ៉ាងធ្ងន់ធ្ងរ ជាពិសេសសុខភាពប្រជាពលរដ្ឋ ប្រសិនបើមិនមានការផ្ទុកផ្ដាក់វាត្រឹមត្រូវទេនោះ។ បន្ថែមទៅទៀតនោះ ការផ្ទុកផ្ដាក់សម្រាមទៀតសោត ត្រូវបានប្រជាពលរដ្ឋនៃប្រទេសទាំងនោះបែងចែកទៅតាមប្រភេទ ដែលអាជ្ញាធរក៏ដូចជាក្រសួងពាក់ព័ន្ធបានកំណត់ ដោយមានការដាក់នូវធុងសម្រាមត្រឹមត្រូវ និងដាក់ពណ៌ដើម្បីជាកំណត់សម្គាល់ ហើយប្រភេទសម្រាមត្រូវបានបែងចែកជា សំណល់រឹង រាវ និងសំណល់ផ្ទះបាយ ដែលជាហេតុធ្វើឲ្យគេអាចគ្រប់គ្រងបញ្ហានេះបានយ៉ាងល្អប្រសើរ។
ក្រឡេកមកមើលការផ្ទុកផ្ដាក់សម្រាមក្នុងប្រទេសកម្ពុជា ជាពិសេសរាជធានីភ្នំពេញវិញម្ដង យើងសង្កេតឃើញថា ប្រជាពលរដ្ឋ និងអាជ្ញាធរហាក់ដូចជាមិនសូវមានភាពស៊ីសង្វាក់នឹងគ្នាទាល់តែសោះ ដោយមានប្រជាពលរដ្ឋមួយចំនួនបានចោលសម្រាមពាសវាលពាសកាល ឯអ្នកខ្លះទៀតដាក់សម្រាមនៅនឹងមុខចញ្ចើមផ្លូវក្បែរមាត់លូបង្ក ឲ្យមានការស្ទះលូនៅពេលមានភ្លៀងម្ដងៗ ហើយមានអ្នកខ្លះទៀតបានយកសម្រាមទៅចោលនៅកែងផ្លូវឬដីទំនេរ ដែលធ្វើឲ្យអ្នកដ៏ទៃទៀតយកសម្រាមទៅចោលតាមរហូតធ្វើឲ្យសម្រាមគរ ឡើងស្ទើរដូចកូនភ្នំមួយទៅហើយ។ បន្ថែមទៅទៀតនោះ ការបែងចែកនូវប្រភេទសម្រាម គឺមិនត្រូវបានយកចិត្តទុកដាក់ពីប្រជាពលរដ្ឋឡើយ ដោយពួកគេដឹងតែច្រកដាក់ក្នុងថង់នូវរាល់ប្រភេទសម្រាម និងយកទៅបោះចោលតែម្ដង ដែលវាជាហេតុធ្វើឲ្យក្លិនរបស់សម្រាមទាំងនោះឆាប់សាយភាយយ៉ាង ឆាប់រហ័ស។
ដោយសារតែបញ្ហាខាងលើនេះហើយ ទើបធ្វើឲ្យប្រជាពលរដ្ឋមានការក្ដៅកក្រហាយនៅពេលដែលក្រុមហ៊ុន ពាក់ព័ន្ធមកប្រមូលសម្រាមយឺតយ៉ាវម្ដងៗ ដោយសារតែក្លិនសម្រាមនោះប៉ះពាល់ដល់ការដកដង្ហើមរបស់ពួកគេខ្លាំង ពេក។ ម្យ៉ាងវិញទៀតនោះ ប្រជាពលរដ្ឋមួយចំនួនបានធ្វើការរិះគន់ដល់អាជ្ញាធរក្នុងការអនុវត្ត ច្បាប់ ឬពិន័យដល់អ្នកចោលសម្រាមផ្ដេសផ្ដាស ខណៈពេលដែលពួកគេមិនបានចូលរួមកាត់បន្ថយបញ្ហានេះទាល់តែសោះ ហើយក៏មិនមានសមត្ថកិច្ចណាម្នាក់ទៅអង្គុយចាំយាមមើលអ្នកចោល សម្រាមផ្ដេសផ្ដាសឡើយត្បិតប្រជាពលរដ្ឋគួរមានសីលធម៌ និងទំនួលខុសត្រូវក្នុងការផ្ទុកផ្ដាក់សម្រាម និងចូលរួមក្នុងការថែរក្សាបរិស្ថានក្នុងតំបន់ដែលខ្លួនរស់នៅ។
វាជារឿងងាយស្រួលទេ ចំពោះការលុបបំបាត់បញ្ហាមួយនេះ ដោយប្រជាពលរដ្ឋគួរតែរៀបចំឲ្យមានកន្លែងចោលសម្រាមត្រឹមត្រូវដូចជា ការដាក់ក្នុងធុងសម្រាម ឬមានបាវសម្រាប់ច្រកសម្រាម និងបែងចែកនូវប្រភេទសម្រាមទាំងនោះតាមការកំណត់។ ជាពិសេសទៅទៀតនោះ ប្រជាពលរដ្ឋមិនគួរបោះចោលសម្រាមនៅតាមកែងផ្លូវ ឬដីទំនេរចោលនោះទេ ព្រោះថាការធ្វើដូច្នោះនឹងធ្វើឲ្យមានអ្នកដ៏ទៃចោលសម្រាមជា បន្ដបន្ទាប់ និងធ្វើឲ្យសម្រាមកាន់តែមានចំនួនកើនឡើង ដែលជាហេតុធ្វើឲ្យមានការលំបាកក្នុងការប្រមូលពីក្រុមហ៊ុន។

បរិស្ថានល្អត្រូវចាប់ផ្ដើមពីយើងទាំងអស់គ្នា

ប្រភព៖ ABC

ឧទ្ធម្ភាសចក្រស៊េរីថ្មី CH-147F Chinook ចំនួន១៥គ្រឿង ត្រូវបានដាក់តាំង បង្ហាញនៅកាណាដា

យោងតាមប្រភពព័ត៌មានពីគេហទំព័រ http://news.xinhuanet.com បានឲ្យដឹងថា ឧទ្ធម្ភាសចក្រស៊េរីថ្មីឈ្មោះCH-147F Chinook ចំនួន១៥គ្រឿង ដែលជួយដល់សុវត្ថិភាព ដែនអាកាសរបស់កងកម្លាំង និងដែនអាកាសរបស់ប្រទសកាណាដា ត្រូវបានដាក់តាំង បង្ហាញនៅ Ottaw ប្រទេសកាណាដា កាលពីថ្ងៃទី២៨ ខែមិថុនា ឆ្នាំ២០១៣ ៕ រីករាយ

ប្រភព៖ ABC

ក្រុមហ៊ុនផលិតរថយន្ត Honda Motor គ្រោងលក់រថយន្ត នៅក្នុងប្រទេសចិន ឲ្យបានទ្វេដងនៅក្នុងឆ្នាំ ២០១៥

យោងតាមប្រភពព័ត៌មានពីគេហទំព័រ http://www.carnewschina.com បានឲ្យដឹងថា ក្រុមហ៊ុនផលិតរថយន្ត Honda Motor ជប៉ុន កាលពីពេលថ្មីៗនេះ បានប្រកាសដំណឹង នៅក្នុងទីក្រុងប៉េកាំងថា ក្រុមហ៊ុននឹងគ្រោងដាក់លក់រថយន្ត នៅក្នុងប្រទេសចិន ឲ្យបានទ្វេដងនៅក្នុងឆ្នាំ ២០១៥ខាងមុខនេះ ក្នុងនោះនឹងមានការបង្ហាញម៉ូឌែលថ្មីទាំងអស់ចំនួន១២ ដែលចាប់ផ្តើមពីឥលូវនេះរហូតដល់ឆ្នាំ

២០១៥តែម្តង ជាពិសេសក្នុងចំណោមម៉ូឌែលទាំង១២នោះ មានម៉ូឌែលចំនួន៥ ត្រូវបានរចនាឡើងយ៉ាងយកចិត្ត ទុកដាក់សម្រាប់អតិថិជន នៅក្នុងប្រទេសចិន។
តំណាងក្រុមហ៊ុន បាននិយាយថា តាំងពី ក្រុមហ៊ុនផលិតរថយន្ត Honda Motor ចាប់ផ្ដើមដំណើការការផលិតរថយន្ត នៅក្នុងប្រទេសចិន រហូតមកដល់ពេលនេះគឺមានរយៈពេល១៥ឆ្នាំហើយ ហើយទីផ្សារនៃការលក់បានកើនឡើងដល់ ៩០ភាគរយ ដូច្នេះនៅក្នុងឆ្នាំ ២០១៥ខាងមុខនេះ ក្រុមហ៊ុន គ្រោងនឹងដាក់លក់រថយន្តចំនួន ១.៣លានគ្រឿងទៀតផងដែរ។
ដោយឡែកអ្វីដែលជាកត់សម្គាល់នោះ គឺ ព្រោះតែជម្លោះដណ្តើមកោះគ្នា រវាងប្រទេសជប៉ុន និងចិន បានធ្វើឲ្យទីផ្សារលក់រថយន្តរបស់ក្រុមហ៊ុន Honda Motor កាលពីឆ្នាំ ២០១១ ធ្លាក់ចុះ៤ភាគរយ ហើយនៅឆ្នាំ ២០១២ ក៏បន្តធ្លាក់ចុះ ៣,១ភាគរយបន្ថែម។
យ៉ាងណាមិញ នៅពេលថ្មីៗនេះ ក្រុមហ៊ុន បានរំពឹងថា ទីផ្សាររថយន្តនៅក្នុង ប្រទេសចិនអាចនឹងមានការកើនឡើងវិញនៅក្នុងឆ្នាំ ២០១៣ នេះ នៅខែឧសភា កន្លងទៅនេះ ទីផ្សាររថយន្តរបស់គេមានការកើនឡើងរហូតដល់ ៤,៦ភាគរយ ដូច្នេះក្រុមហ៊ុន រំពឹងថាតួលេខ អាចនឹងកើនឡើងបន្តទៀតនៅពេលខាងមុខនេះ៕ រីករាយ

ប្រភព៖ ABC

Thursday, June 27, 2013

តំណាងរាស្ត្រតៃវ៉ាន់ ប្រតាយប្រតប់គ្នា

តាម AFP ក្នុងកិច្ចពិភាក្សាពីរឿងអនុម័តពន្ធលើប្រាក់ចំណេញចំពោះការទិញលក់ ប័ណ្ណភាគហ៊ុន នៅសភាតៃវ៉ាន់ កាលពីថ្ងៃទី២៥/៦ បានធ្លាក់ក្នុងសភាពទាល់ច្រក គ្រាដែលភាគីទាំងសងខាង(ទាំងកាន់អំណាច និងប្រឆាំង) បានរុញច្រានគ្នាដើម្បីឡើងវេទិការបញ្ចេញមតិ ។
សភារបស់ដែនដីនេះធ្លាប់ល្បីល្បាញនឹងកាយវាយតប់គ្នារវាង តំណាងរាស្ត្រ ប៉ុន្តែវាបានស្ងប់ទៅមួយរយៈពេលវែង ។ ឥឡូវចាប់ផ្តើមទៀតហើយ ។

ប្រភព៖ ខ្មែរស្ថាបនា

Venezuela ត្រៀមទទួល Snowden ឲ្យភៀសខ្លួននយោបាយ

ប្រភពពី RIA Novosti រុស្ស៊ីឲ្យដឹងថា នៅថ្ងៃទី២៦/៦ ក្រុមហ៊ុនអាកាសចរណ៍រុស្ស៊ី Aeroflot បញ្ជាក់ថា ពុំមានអតិថិជនឈ្មោះ Edward Snowden ក្នុងជើងហោះហើរអន្តរជាតិទាំងឡាយសម្រាប់រយៈពេល៣ថ្ងៃនេះទេ ។ បើតាម Interfax របស់រុស្ស៊ីដែរនោះ មូលហេតុគឺ Snowden បន្តស្ថិតនៅក្នុងតំបន់សម្រាប់ឆ្លងកាត់នៃអាកាសយានដ្ឋាន Shermetiero ព្រោះ Snowden ពុំមានលិខិតស្នាមអ្វីសម្រាប់ទិញសំបុត្រ ក្រោយពីប៉ាស្ព័រត្រូវបានអាមេរិកដកហូត ។

ប្រធានាធិបតី Venezuela Nicolas Maduro ប្រកាសថា Venezuela ត្រៀមពិនិត្យសំណើរសុំភៀសខ្លួននយោបាយរបស់ Snowden ព្រោះនេះជាវិធានការសមស្របនឹងច្បាប់អន្តរជាតិ ។

ប៉ុន្តែកាសែត El Telegrafo របស់ Ecuador នៅថ្ងៃទី២៥/៦ បានចុះផ្សាយលិខិតសុំភៀសខ្លួននៅ Ecuador ផ្ញើជូនប្រធានាធិបតីប្រទេសនេះ លោក Rafail Correa ហើយ ៕

ប្រភព៖ ខ្មែរស្ថាបនា

Wednesday, June 26, 2013

សហភាពសហជីពកម្ពុជាអំពាវនាវឲ្យពលរដ្ឋបោះឆ្នោតជូនបក្សសង្គ្រោះជាតិ

សហភាពសហជីពកម្ពុជានៅថ្ងៃពុធ ទី២៦ ខែមិថុនានេះ បានផ្ញើលិខិតអំពាវនាវដល់សមាជិក, កម្មករ, និយោជិត, គ្រូបង្រៀន, មន្ត្រីរាជការ និងប្រជាពលរដ្ឋឲ្យបោះឆ្នោតជូនគណបក្សសង្គ្រោះជាតិនៅក្នុងការ បោះឆ្នោតជ្រើសរើសតំណាងរាស្ត្រអាណត្តិទី៥ ខែកក្កដាខាងមុខ។

លោក រ៉ុង ឈុន ប្រធានសហភាពសហជីពកម្ពុជា និងជាប្រធានសមាគមគ្រូបង្រៀនកម្ពុជាឯករាជ្យបានឲ្យដឹងក្នុង សន្និសីទកាសែតនាទីស្នាក់ការក្រុងភ្នំពេញថា មូលហេតុដែលនាំឲ្យរូបលោកចេញសេចក្តីអំពាវនាវនេះគឺដោយយល់ថា គណបក្សសង្គ្រោះជាតិ មានគោលនយោបាយល្អ និងជួយគិតគូរពីសុខទុក្ខមន្ត្រីរាជការ, គ្រូបង្រៀន, សិស្សនិស្សិត និងកម្មករឲ្យទទួលបានប្រាក់បៀវត្សសមរម្យ ជាពិសេស ឲ្យប្រទេសជាតិគោរពសិទ្ធិមនុស្ស និងគ្មានការគំរាមកំហែង។

ដូចគ្នាដែរសំរាប់សហព័ន្ធនិស្សិតបញ្ញវន្តកម្ពុជានៅ ថ្ងៃទី២៦ ខែមិថុនា ក៏បានចេញសេចក្តីអំពាវនាវ របស់ខ្លួនឲ្យប្រជាពលរដ្ឋជាពិសេសយុវជនសិស្ស, និស្សិត, បញ្ញវន្ត អញ្ជើញទៅបោះឆ្នោតជ្រើសរើសតំណាងរាស្ត្រអាណត្តិទី៥ ខែកក្កដាខាងមុខកុំបីខានព្រោះថា ការបោះឆ្នោតមានសារៈសំខាន់ ដើម្បីជំរុញឲ្យជីវភាពរស់នៅរបស់បងប្អូនមានការផ្លាស់ប្តូរ។

លិខិតដដែលបញ្ជាក់ថា បើបងប្អូនបោះឆ្នោត ឬសំរេចចិត្តត្រូវនោះ ជីវភាពរបស់បងប្អូននឹងប្រសើរឡើង ហើយសង្គមជាតិនឹងមានការរីកចំរើន។ ដូច្នេះសូមបងប្អូនបោះឆ្នោតស្របតាមសតិសម្បជញ្ញៈពិតប្រាកដ របស់បងប្អូនម្នាក់ៗដោយសេរី។

ការបោះឆ្នោតជ្រើសរើសតំណាងរាស្ត្រអាណត្តិទី៥ នឹងប្រព្រឹត្តទៅនៅថ្ងៃទី២៨ ខែកក្កដាឆ្នាំ ២០១៣ខាងមុខ។ ការបោះឆ្នោតនេះ មានគណបក្សនយោបាយចំនួន៨ បានចុះឈ្មោះចូលរួមប្រកួតប្រជែង។
រីឯយុទ្ធនាការឃោសនាបោះឆ្នោត នឹងចាប់ផ្តើមនៅថ្ងៃទី២៧ ខែមិថុនា ដល់ថ្ងៃទី២៦ ខែកក្កដា ឆ្នាំ២០១៣៕

ប្រភព៖ khmer-pop

បាញ់សម្លាប់ អ្នកប្រមូលលុយ ឱ្យក្រុម ហ៊ុនឯកជនមួយ សង្ស័យប្លន់យកទ្រព្យ សម្បត្ដិ

កណ្ដាល ៖ អំពើឃាតកម្ម បាញ់សម្លាប់ ទៅលើបុគ្គលិក ដែលមានតួនាទីជាអ្នកដើរ ប្រមូលលុយឱ្យក្រុមហ៊ុនឯកជនមួយ បាន បង្កឱ្យមានការភ្ញាក់ផ្អើលយ៉ាងខ្លាំង ពីសំ ណាក់ប្រជាពលរដ្ឋ ធ្វើដំណើរតាមផ្លូវ និង សមត្ថកិច្ចមូលដ្ឋាន បន្ទាប់ពីគេបានឃើញ បុរសម្នាក់ ត្រូវបានគេបាញ់ចំក្បាល រួចហើយ ទម្លាក់ចេញពីរថយន្ដឆ្លាម ១គ្រឿង នៅជិត ស្ពានព្រែកហូរ លើកំណាត់ផ្លូវជាតិលេខ ២ ក្នុងភូមិតាក្ដុល សង្កាត់តាក្ដុល ក្រុងតាខ្មៅ ខេត្ដកណ្ដាល កាលពីវេលាម៉ោងប្រមាណ ៣ និង៥០នាទីរសៀល ថ្ងៃទី ២៦ ខែមិថុនា ឆ្នាំ ២០១៣ ។

មេបញ្ជាការអាវុធហត្ថ ខេត្ដកណ្ដាល លោកឧត្ដមសេនីយ៍ មាស សុវណ្ណ បានប្រាប់ មជ្ឈមណ្ឌលព័ត៌មានដើមអម្ពិល តាមទូរ ស័ព្ទ នៅល្ងាចថ្ងៃទី២៦ ខែមិថុនា ឆ្នាំ ២០១៣ នេះថា ជនរងគ្រោះឈ្មោះ ទាវ វិចិត្រ អាយុជាង ២០ឆ្នាំ មុខរបរ ជាអ្នក ដើរប្រមូលលុយ ឱ្យក្រុមហ៊ុនឯកជនមួយ និងមានស្រុកកំណើត នៅខេត្ដកណ្ដាល ហើយបច្ចុប្បន្នសពជនរងគ្រោះ ត្រូវបាន សមត្ថកិច្ច ប្រគល់ជូនក្រុមគ្រួសារយកទៅ ធ្វើបុណ្យតាមប្រពៃណី ។

លោកឧត្ដមសេនីយ៍ មាស សុវណ្ណ បាន ថ្លែងថា បើតាមសាក្សីមុនពេលកើតហេតុ ជនរងគ្រោះ ត្រូវបានជនសង្ស័យម្នាក់បាន ប្រើកាំភ្លើងបាញ់ចំក្បាល បណ្ដាលឱ្យស្លាប់ ភ្លាមៗ រួចហើយរុញទម្លាក់ចេញពីរថយន្ដ ឆ្លាម ពណ៌ត្រីឆ្លូញ នៅជិតស្ពានព្រែកហូរ។

លោកបញ្ជាក់ថា ក្រោយពីធ្វើសកម្មភាព ប្រើប្រាស់កាំភ្លើង កា ៥៩ បាញ់ចំក្បាលជន រងគ្រោះរួចមក ជនសង្ស័យមិនបានបើក រថយន្ដចេញពីកន្លែងកើតហេតុទាន់នោះទេ ពោលបានឡើងជិះម៉ូតូ ជាមួយបក្ខពួករបស់ ខ្លួនម្នាក់ទៀត ដែលធ្វើដំណើរពីក្រោយ រថយន្ដ ដូច្នេះតាមការសន្និដ្ឋានជាជំហាន ដំបូង ជនសង្ស័យអាចមានគ្នា ២នាក់ ។

បើ តាមមេបញ្ជាការអាវុធហត្ថ ខេត្ដកណ្ដាល អំពើឃាតកម្មខាងលើនេះ សង្ស័យបណ្ដាល ចេញមកពីគម្រោងការប្លន់ ទុកជាមុន ប៉ុន្ដែ ករណីនេះ ស្ថិតក្រោមការស្រាវជ្រាវយ៉ាង យកចិត្ដទុកដាក់ ពីសមត្ថកិច្ចខេត្ដកណ្ដាល ដើម្បីឈានទៅដល់ការចាប់ខ្លួន ជនសង្ស័យ ទាំងនោះ ។

ប្រភព៖ khmerload

Miley Cyrus ព្រមានឪពុកឱ្យទម្លាយការពិត

តារាចម្រៀង និងតារាសម្តែងភាពយន្តល្បីល្បាញរឿង “Hannah Montana” Miley Cyrus បានព្រមានឪពុកនាងតាមបណ្តាញសង្គម Twitter ឱ្យទម្លាយការពិតបើមិនដូច្នេះទេ នាងនឹងនិយាយការពិតដោយខ្លួនឯង។

អត្ថន័យ សរសេរក្នុងបណ្តាញសង្គម Twitter តារាស្រីវ័យ ២០ឆ្នាំ Miley Cyrus ហាក់គំរាមឪពុកបង្កើតនាងលោក Billy Ray Cyrus ចំៗតែម្តង។ ខណៈនោះ Miley បានបង្ហោះរូបថតឪពុកនាងជាមួយនារីអាថ៌កំបាំងម្នាក់ ដោយសរសេរក្រោមរូបថតនោះថា៖ “ដោយសារប៉ាមិនឆ្លើយតបសារខ្ញុំ ខ្ញុំទុកពេលឱ្យប៉ាមួយម៉ោងនិយាយការពិត មិនអីចឹងទេខ្ញុំនឹងនិយាយការពិតជំនួសប៉ា”។

Miley និងឪពុកម្ដាយមុនពេលឪពុកម្ដាយនាងលែងលះគ្នា

ប៉ុន្តែក្រោយមក តារាចម្រៀងវ័យក្មេងខាងលើបានលុបចោលសារដែលនាងបង្ហោះលើ Twitter នោះវិញ។ មួយម៉ោងបានកន្លងផុតទៅនៅតែមិនមានអ្វីកើតឡើងដូចក្នុងសារដែល Miley បានសរសេរបង្ហោះទេ។ នោះអាចប្រហែលមកពី Billy Ray បានទាក់ទងទៅនាងហើយមើលទៅ។

ក្រោយពីទំនាក់ទំនង Billy Ray និងភរិយា Tish ឈានដល់ទីបញ្ចប់ដោយការលែងលះ កាលពីសប្តាហ៍មុន មតិភាគច្រើនយល់ថា នារីអាថ៌កំបាំងក្នុងរូបថតនោះអាចជាមូលហេតុក៏ថាបាន។ គេនៅសង្ស័យទៀតថា នារីម្នាក់នោះអាចជាមូលហេតុចម្បងនាំឱ្យ Miley ព្រមានឪពុកនាងលើ Twitter៕

ប្រភព៖ Sabay News

Angelina Jolie: ពិភពលោកត្រូវតែដោះស្រាយបញ្ហារំលោភស្រ្តីនៅតាមតំបន់សង្គ្រាម

តារាភាពយន្តអាម៉េរិក័ងល្បីល្បាញ អ្នកនាង Angelina Jolie បានធ្វើការអំពាវនាវនៅចំពោះមុខក្រុមប្រឹក្សាសន្ដិសុខនៃអង្គការ សហប្រជាជាតិដើម្បីរកដំណោះស្រាយជាអាទិភាពខ្ពស់បំផុតមួយលើបញ្ហា រំលោភបំពានផ្លូវភេទទៅលើស្រ្តីនៅក្នុងតំបន់មានសង្គ្រាម។

តារាភាពយន្តអាម៉េរិក័ងល្បីល្បាញ អ្នកនាង Angelina Jolie ។

អ្នកនាង Jolie ដែលជាបេសកជនពិសេសរបស់ទីភ្នាក់ងារទទួលបន្ទុកជនភៀសខ្លួនរបស់ អង្គការសហប្រជាជាតិបានថ្លែងទៅកាន់បណ្ដារដ្ឋជាសមាជិករបស់អង្គការ សហប្រជាជាតិថា ពួកគេត្រូវតែបង្ហាញនូវភាពជាអ្នកដឹកនាំក្នុងការថ្កោលទោសទៅលើ ករណីចាប់រំលោភស្រ្តីនៅក្នុងតំបន់សង្គ្រាម។

អ្នកនាង Angelina Jolie មានប្រសាសន៍ថា អំពើរំលោភគឺជាឧបករណ៍មួយនៃសង្គ្រាម។ វាជាការបំពារបំពាននិងជាឧក្រិដ្ឋកម្មប្រឆាំងមនុស្សជាតិ។ វាជាការធ្វើដោយចេតនាដែលបង្កអន្តរាយដល់ស្រ្តីនិងសហគមន៍។ វាបំផ្លាញអាយុជីវិតនិងបញ្ឆេះដុតរោលវិបត្តិ។

គួរបញ្ជាក់ថា សមាជិកទាំង១៥របស់ក្រុមប្រឹក្សាសន្ដិសុខអង្គការសហប្រជាជាតិបាន ធ្វើការសម្រេចចិត្តទទួលស្គាល់ជាឯកច្ឆ័នថា អំពើរំលោភអាចធ្វើឲ្យបញ្ហាជម្លោះកាន់តែធ្ងន់ធ្ងរឡើង ហើយបានបង្អាក់ដល់ការស្ដារសន្ដិភាពនិងសន្ដិសុខទៀតផង៕

ប្រភព៖ Radio Australia

ក្រុមសកម្មប្រយុទ្ធសម្លាប់ទាហាន៨នាក់មុនទស្សនកិច្ចនាយករដ្ឋមន្ត្រី

ទាហានឥណ្ឌា ស្ថិតក្នុងទីតាំងក្បែររថយន្តខូច នៅកន្លែងត្រូវគេវាយប្រហារ។AFP

ក្រុងស្រ៊ីណាហ្ការៈនាយករដ្ឋមន្ត្រីឥណ្ឌាលោក ម៉ាន់ម៉ូហាន់ ស៊ីងបានបំពេញទស្សនកិច្ចជាប្រវត្តិសាស្ត្រមួយទៅតំបន់កាស្មៀរឥណ្ឌា ដែលមានបញ្ហាកាលពីថ្ងៃអង្គារ មួយថ្ងៃបន្ទាប់ពីក្រុមសកម្មប្រយុទ្ធប្រដាប់ដោយអាវុធធុនធ្ងន់បាន សម្លាប់ទាហាន៨នាក់ក្នុងការវាយប្រហារសម្លាប់មនុស្សច្រើនបំផុតនៅ ក្នុងតំបន់សម្រាប់រយៈពេល៥ឆ្នាំមកនេះ។

លោកស៊ីងត្រូវបានអមដំណើរដោយលោក សូនីញ៉ា គន្ធី ជាប្រធាននៃគណបក្សខុនក្រេសកំពុងកាន់អំណាចសម្រាប់ដំណើរទស្សនកិច្ច រយៈពេលពីរថ្ងៃដែលលោកនឹងពិនិត្យមើល គម្រោងហេដ្ឋារចនាសម្ព័ន្ធធំៗនិងសម្ពោធបណ្តាញផ្លូវដែកមួយផ្នែកដែល តភ្ជាប់តំបន់ភាគខាងជើង និងតំបន់កាស្មៀរខាងត្បូង។

វាជាលើកទីមួយហើយដែលលោកនាយករដ្ឋមន្ត្រីធ្វើទស្សនកិច្ចតំបន់នៃ ទឹកដីភ្នំហិមពាន្តបែកបាក់ដែលគ្រប់គ្រងដោយឥណ្ឌាដែលធ្លាប់ជា សមរភូមិសង្គ្រាមពីរជាមួយប៉ាគីស្ថានចាប់តាំងពីខែមិថុនា ឆ្នាំ២០១០ និងកើតមានមិនដល់មួយឆ្នាំមុនពេលឥណ្ឌាបោះឆ្នោត។

ក្រុមមន្ត្រីបាននិយាយថា ក្បួនរថយន្តយោធាត្រូវបានពួនស្ទាក់វាយប្រហារនៅឯជាយក្រុង ស្រ៊ីណាហ្ការ ជាក្រុងធំ របស់តំបន់កាស្មៀរគ្រប់គ្រងដោយឥណ្ឌា ខណៈក្បួនរថយន្តនោះឆ្ពោះទៅជំរំមូលដ្ឋានមួយនៅក្បែរនោះ។

មន្ត្រីប៉ូលិសជាន់ខ្ពស់ម្នាក់បានប្រាប់AFPថា៖«ទាហាន៨នាក់ បានស្លាប់ក្នុងការវាយប្រហារនោះ រីឯ១៣នាក់ផ្សេងទៀតរបួស»។

លោក បានបន្ថែមថា អ្នករបួសម្នាក់កំពុងស្ថិតក្នុងស្ថានភាពធ្ងន់ធ្ងរ។

ការវាយប្រហារនេះ បានបញ្ជាក់ពីថ្ងៃសម្លាប់កម្លាំងសន្តិសុខឥណ្ឌាច្រើនបំផុតនៅ កាស្មៀរឥណ្ឌាចាប់តាំងពីខែកក្កដា ឆ្នាំ២០០៨ដែលការផ្ទុះមីនមួយបានសម្លាប់ទាហាន៩នាក់នៅលើរថយន្ត ក្រុងនៅជាយក្រុងស្រ៊ីណាហ្ការ។ក្នុងសេចក្តីថ្លែងការណ៍មួយចេញនៅ រដ្ឋធានីញូវដែលី លោកស៊ីងបានថ្កោលទោសយ៉ាងខ្លាំងចំពោះការវាយប្រហារនេះ៕ CC

ប្រភព៖ ភ្នំពេញ ប៉ុស្តិ៍

ក្រុមសង្គ្រោះតាមអាកាសឥណ្ឌា២០នាក់ គ្មានសង្ឃឹមថាអាចនៅមានជីវិត

ក្រុមសង្គ្រោះទាំងអស់ចំនួន ២០ នាក់ ក្នុងនោះរួមមានបុគ្គលិក IAF និងកងទ័ព ត្រូវបានបារម្ភថា គ្មានសង្ឃឹមអាចនៅរស់រានមានជីវិត បន្ទាប់ពីឧទ្ធម្ភាគចក្រទ័ពអាកាស១គ្រឿង បានជួបគ្រោះថ្នាក់នៅក្នុងអាកាសធាតុមេឃកំពុងធ្លាក់ភ្លៀងយ៉ាងខ្លាំង ម្តង កាលពីថ្ងៃអង្គារ នៅក្នុងរដ្ឋ Uttarakhand ដែលត្រូវបានបំផ្លិចបំផ្លាញដ៏ធ្ងន់ធ្ងរនោះ ខណៈដែលឧទម្ភាគចក្រនេះ បានព្យាយាមទៅសង្គ្រោះមនុស្សរាប់ពាន់នាក់ ដែលកំពុងស្ថិតក្នុងស្ថានភាពតែលតោលក្នុងទឹកជំនន់ ។

អ្នកនាំពាក្យ IAF បាននិយាយថា អាកាសធាតុអាក្រក់ ត្រូវបានសង្ស័យថា អាចនាំឲ្យមានគ្រោះថ្នាក់នេះកើតឡើង មកលើឧទ្ធម្ភាគចក្រ Mi-17V5 ដែលផលិតដោយរុស្ស៊ី ។ ឧទ្ធម្ភាគចក្រនេះ បានធ្លាក់នៅភាគខាងជើង Gaurikund ដែលជាជំរុំមូលដ្ឋានសម្រាប់ក្រុមអ្នកធ្វើដំណើរតាមរទេះគោ ទៅកាន់ Kedarnath នៅម៉ោងប្រហែល ១២ និង ៣០ នាទីព្រឹក ។ មានកងកម្លាំង IAF ៥ នាក់, ប៉ូលីសព្រំដែន (Indo-Tibetan) ៦ នាក់ និងបុគ្គលិកកងកម្លាំងសង្គ្រោះគ្រោះមហន្តរាយជាតិ ៩ នាក់ ដែលស្ថិតនៅលើឧទ្ទម្ភាគចក្រនោះ ។ រហូតមកដល់ពេលនេះ សាកសពតែ ៩ នាក់ប៉ុណ្ណោះ ទើបត្រូវបានរកឃើញ ។

មន្ត្រីបាននិយាយថា រហូតមកទល់ពេលនេះ ចំនួនអ្នកស្លាប់ដោយសារទឹកជំនន់ បានកើនឡើងដល់ ៨២២ នាក់ហើយ ជាមួយ ១៤២ សាកសព ត្រូវបានរកឃើញ ។ សូមបញ្ជាក់ថា កាលពី ២-៣ ថ្ងៃមុននេះ អភិបាលរដ្ឋ Uttarakhand លោក Vijay Bahuguna បានដាក់ចំនួនស្លាប់នេះ ដល់រហូត ១ពាន់នាក់ ប៉ុន្តែនេះគ្រាន់តែជាតួលេខសម្រាប់រក្សាទុកប៉ុណ្ណោះ ៕

ប្រភព៖ ខែ្មរស្ថាបនា

ប្រកួតសម្រស់ឈុតក្នុង៖ បេក្ខនារីម្នាក់ប្រើស្ទីលទាក់ទាញដាក់ទូរស័ព្ទចន្លោះដើមទ្រូង

ខាងក្រោមនេះ គឺជារូបភាពមួយចំនួន បង្ហាញឲ្យឃើញពីការប្រកួតសម្រស់ “ឈុតក្នុង” ដែលត្រូវបានធ្វើឡើងនៅខេត្ត Guangdong ប្រទេសចិន ដោយបេក្ខនារីម្នាក់ៗ ត្រូវបានតំរូវឲ្យស្លៀកតែខោអាវទ្រនាប់ប៉ុណ្ណោះ ។

ប៉ុន្តែ អ្វីដែលគួរឲ្យចាប់អារម្មណ៍នោះ គឺនៅពេលដែលបេក្ខនារីម្នាក់ ឃើញថាមានសម្រស់លេចធ្លោជាងគេ បានឆ្លៀតប្រូម៉ូតសិនទូរស័ព្ទដៃ ដោយប្រើស្ទីលទាក់ទាញដាក់នៅចន្លោះចង្វែកដើមទ្រូងដ៏ស្រស់ផូរផង់ របស់នាង ខណៈដែលបេក្ខនារីទាំងឡាយមិនអាចធ្វើបាន ។

ទោះជា យ៉ាងណា រូបភាពដ៏ទាក់ទាញរបស់នាង ក៏ត្រូវបានរីករាលយ៉ាងឆាប់រហ័សបំផុត នៅលើប្រព័ន្ធធើរណេត ហើយនាងក៏ត្រូវបានអ្នកនិយមលេងអ៊ីនធើរណេតចិន ផ្តល់រហស្សនាមថា “ទេពធីតាដើមទ្រូង” ផងដែរ ។ ចំពោះរឿងនេះ យើងអាចគិតថា នាងប្រហែលទំនងយកគំរូតាម នាង Larissa Riquelme ដែលបានយកទូរស័ព្ទដៃម៉ាក Nokia E71 ដាក់នៅចន្លោះដើមទ្រូង ដើម្បីចូលរួមលើកកម្លាំងចិត្តដល់ក្រុមកីឡាករសញ្ជាតិប៉ារ៉ាហ្កាយ របស់នាង នៅក្នុងព្រឹត្តិការណ៍បាល់ទាត់ពិភពលោក 2010 FIFA World Cup ៕

ប្រភព៖ ខែ្មរស្ថាបនា

Tuesday, June 25, 2013

រថយន្តលឿនបំផុតក្នុងលោកបង្ហាញខ្លួននៅអង់គ្លេស

រថយន្ត ដែលមានល្បឿនលឿនបំផុតក្នុងលោកបានបង្ហាញខ្លួនជាលើកដំបូងនៅ ប្រទេសអង់គ្លេស ដោយមាននាយករដ្ឋមន្ត្រីអង់គ្លេសលោក David Cameron ចូលរួមក្នុងកម្មពិធីសម្ពោធសមិទ្ធផលថ្មីនេះដែរ។

ក្រោម ការឌីសាញ និងបង្កើតឡើងដោយក្រុមវិស្វករជនជាតិអង់គ្លេស រថយន្តរ៉ុកកែតម៉ាក Bloodhoud ដែលមានល្បឿនលឿនជាងសំឡេង នឹងអាចរួមចំណែកយ៉ាងសំខាន់សម្រាប់អនាគតបច្ចេកវិទ្យារថយន្តលើដង ផ្លូវដែលជាសមិទ្ធផលថ្មីមួយទៀតប្រសូតចេញពីស្នាដៃវិស្វករ ជនជាតិអង់គ្លេសសុទ្ធសាធ។
ក្នុងសន្ទរកថាថ្លែងទៅកាន់អ្នកចូលរួមកម្មវិធី លោក Cameron បានបញ្ជាក់ថារថយន្តម៉ាក Bloodhoud គឺជាតឹកតាងមួយដែលបញ្ជាក់ឲ្យឃើញពីអនុភាពនៃក្រុមវិស្វករ អង់គ្លេស។ លោកបានបន្ថែមថា វាគឺជារបកគំហើញថ្មីមួយទៀត ដែលជាផ្នែកមួយដ៏សំខាន់ក្នុងការជំរុញឲ្យមានកំណើនវិស្វករជំនាញ ចំនួន ១០០.០០០ នាក់បន្ថែមទៀត សម្រាប់ប្រទេសអង់គ្លេសទាំងមូលមុនដំណាច់ឆ្នាំ២០១៨។
លោក Cameron ក៏បានបង្ហាញពីគោលជំហរយ៉ាងមុតមាំទៅលើក្រុមវិស្វកររបស់ខ្លួន ដែលបានរួមចំណែកយ៉ាងលើសលប់ ក្នុងការសម្រេចគោលដៅអភិវឌ្ឍសេដ្ឋកិច្ចរបស់ប្រទេសនេះ តាមរយៈការបង្កើតឱកាសជាច្រើន ដើម្បីទទួលបានជំនាញថ្មីៗលើរបកគំហើញបច្ចេកវិទ្យា ក្នុងស្មារតីប្រកួតប្រជែងមួយដោយស្មោះត្រង់បំផុត។
បើ យោងតាមការឲ្យដឹង រថយន្តខាងលើនេះនឹងត្រូវដាក់ចរាចរជាផ្លូវការនៅឆ្នាំ២០១៥ ខាងមុខនេះ ដែលមានល្បឿនលឿនបំផុតរហូតដល់ ១.០០០ម៉ៃ (ប្រហែល១៦០០ គ.ម) ក្នុង ១ម៉ោង៕

ប្រភព៖ sabay news

យុវជនញៀនថ្នាំម្នាក់វាយម្តាយខ្លួនឯងបង្កើតបែកមាត់ព្រោះតែខឹងសុំលុយមិនបាន

រាជធានីភ្នំពេញ ៖ យុវជនម្នាក់ដែលមានចិត្តជាសត្វត រិច្ឆាន ត្រូវបានសមត្ថកិច្ចចាប់ឃាត់ខ្លួន កាលពីវេលាម៉ោង១១និង២០នាទីព្រឹក ថ្ងៃទី២៤ ខែមិថុនា ឆ្នាំ២០១៣ ក្នុងសង្កាត់កាកាប ខណ្ឌពោធិ៍សែនជ័យ បន្ទាប់ពីយុវជនខាងលើនេះ បានធ្វើសកម្មភាពប្រើអំពើហិង្សា វាយម្តាយបង្កើតខ្លួនឯង បណ្តាលឲ្យរងរបួសបែកមាត់ និងបោកចានឆ្នាំងបែកពេញផ្ទះ ព្រោះតែខឹងសុំលុយមិនបាន។

បើតាម ប្រភពព័ត៌មានពីសមត្ថកិច្ចបានឲ្យដឹងថា យុវជនដែលត្រូវសមត្ថកិច្ចចាប់ឃាត់ខ្លួនខាងលើនេះមានឈ្មោះ ម៉ាក់ កាមរី អាយុ២២ឆ្នាំ គឺជាយុវជនដែលញៀនថ្នាំយ៉ាងងុបងល់។ ប្រភពដដែលបានបន្តឲ្យដឹងទៀតថា មុនពេលកើតហេតុ យុវជនខាងលើនេះ បានសុំលុយម្តាយទៅទិញគ្រឿងញៀន ប៉ុន្តែម្តាយមិនឲ្យ គេក៏ដើរចេញទៅក្រៅបាត់ប្រហែលមួយម៉ោង លុះត្រឡប់ចូលផ្ទះវិញស្រាប់តែយុវជននោះយកចានឆ្នាំងមកបោកខ្ទេច ហើស្ទុះទៅដាល់ម្តាយមួយដៃ បណ្តាលឲ្យបែកមាត់តែម្តង។

ក្រោយពេលកើតហេតុ ស្ត្រីរងគ្រោះខាងលើបានប្តឹងសមត្ថកិច្ចឲ្យទៅចាប់កូនអកតញ្ញូរូបនេះ យកទៅប៉ុស្តិ៍កាកាប ដើម្បីធ្វើការអប់រំ។ គួររំលឹកផងដែរថា បញ្ហាគ្រឿងញៀនគឺជាវិបត្តិមួយដ៏ធ្ងន់ធ្ងរ ដែលអាចបង្កបញ្ហាជាច្រើនដល់សង្គមជាតិ ដូច្នេះប្រជាពលរដ្ឋទាំងអស់ត្រូវតែ និយាយថាទេ ចំពោះគ្រឿងញៀន៕

ប្រភព CAMBODIA PAGE NEWS

មនុស្សច្រើននាក់ ផ្អើលតាមថតមនុស្សចេះហោះ ក្នុងទីក្រុង

ប្លែកៗ៖ នៅពេលដែលគេឃើញបុរសម្នាក់ បានឈរនៅក្បែរដំបូលរថយន្ដក្រុង (ក្រៅរថយន្ដ)
ដោយគ្រាន់តែយកដៃរបស់គាត់ កាន់ដំបូលរថយន្ដក្រុងបន្ដិចសោះ ហើយអាចហោះតាមរថ
យន្ដបាននោះ គឺបានធ្វើអោយមនុស្សជាច្រើន មានការភ្ងាក់ផ្អើលជាខ្លាំង ហើយក៏បានតាម
ប្រម៉ាញ់ថតរូប បុរសម្នាក់នោះផងដែរ។

បុរស ដែលអាចហោះតាមដំបូលរថយន្ដក្រុងនោះ គឺមានឈ្មោះថា Steven Frayne ឬហៅ
ថាDynamo មានវ័យ ៣០ឆ្នាំ ត្រូវបានគេស្គាល់ថា ជាបុរសដែលមានវេទមន្ដ អាចហោះហើរ
តាមរថយន្ដក្រុងបាន នៅឯក្នុងទីក្រុង London ប្រទេសអង់គ្លេស។

អ្វីដែលជាការពិត ហើយបានធ្វើអោយមនុស្សរាប់ពាន់នាក់ មានការចាប់អារម្មណ៍ និងភ្ងាក់
ផ្អើលនោះ គឺបុរសនោះ បាននឹងកំពុងថតស៉្បតពាណិជ្ជកម្ម អោយភេសជ្ជៈ Pepsi ឬ Pepsi
Max ។

ទោះបីជាយ៉ាងណាក៏ដោយ លោក Steven ត្រូវបានមនុស្សជាច្រើន នៅក្នុងសង្គម យល់ថា
គាត់គឺជាមនុស្ស ដែលមានវេទមន្ដពិតៗ ជាក់ស្ដែងគឺទេពកោសល្យ និងភាពអស្ចារ្យ នៃការ
បង្ហាញខ្លួន ក្នុងការសម្ដែងពាណិជ្ជកម្ម ឬស៉្បតផ្សេងៗតែម្ដង៕

ប្រភព៖ CAMNEWS

Monday, June 24, 2013

បុរសវ័យចំណាស់ម្នាក់ត្រូវកូនប្រសារនិងដន្លងព្រួតគ្នាវាយហូរឈាមស្រោចខ្លួន

ខេត្តបាត់ដំបង ៖ អំពើហិង្សាក្នុងគ្រួសារមួយបានកើតឡើង កាលពីវេលាម៉ោង១១ថ្ងៃត្រង់ថ្ងៃទី២៤ ខែមិថុនា ឆ្នាំ២០១៣ ស្ថិតក្នុងសង្កាត់វត្តគ ក្រុងបាត់ដំបង ដែលបណ្តាលឲ្យបុរសចំណាស់ម្នាក់រងរបួសធ្ងន់ធ្ងរ ដោយសារតែត្រូវបានកូនប្រសាប្រុស និងដន្លងព្រួតគ្នាវាយ ដោយសារតែរឿងទំនាស់បន្តិចបន្តួច។

បើតាមប្រភពពីសមត្ថកិច្ចបានឲ្យដឹង បុរសរងគ្រោះខាងលើមានឈ្មោះ ហែម សុភ័ណ្ឌ អាយុ៦១ឆ្នាំ រស់នៅភូមិក្រពើខាងកើត ឃុំភ្នំសំពៅ ស្រុកបាណន់។ រីឯកូនប្រសាដ៏ឃោរឃៅឈ្មោះ វិបុល រតនា អាយុ២៨ឆ្នាំ រស់នៅភូមិកម្មករ សង្កាត់ស្វាយប៉ោ ក្រុងបាត់ដំបង ។ ប្រភពដដែលបានបន្តឲ្យដឹងទៀតថា មូលហេតុដែលនាំឱ្យកើតអំពើហិង្សាដ៏កំរោលនេះ គឺក្រោយពីលោកចៅសង្កាត់វត្តគ បញ្ចប់ការផ្សះផ្សារវាងប្តីប្រពន្ធរបស់ឈ្មោះ វិបុល រតនា ដែលរស់នៅមិនចុះសម្រុងនឹងគ្នា ។

បើតាមការរៀបរាប់របស់ជនរងគ្រោះបានឲ្យដឹងថា កូនស្រីរបស់លោកឈ្មោះ ហែម ឆដា អាយុ២៥ឆ្នាំ និងកូនប្រសាឈ្មោះ វិបុល រតនា នេះរស់នៅមិនចុះសម្រុងគ្នាទេ ហើយត្រូវលោកចៅសង្កាត់ហៅមកផ្សះផ្សាគ្នាតាមបណ្តឹងនៃភាគីទាំង២ ។ លោកបានបន្តថា ក្រោយពីបញ្ចប់ការផ្សះផ្សា លោកបានសុំយកចៅទៅលេង តែកូនប្រសាមិនឱ្យក៏កើតមានជម្លោះតែម្តង ។ ខណៈនោះគាត់ទៅយកចៅពីដៃកូនប្រសា តែត្រូវកូនប្រសាមិនឱ្យ ភ្លាមនោះកូនប្រសាបានទូរស័ព្ទហៅម្តាយ និងបងប្អូនគេមក ៤-៥នាក់ ព្រួតគ្នាវាយមកលើគាត់តែម្តង បណ្តាលឱ្យគាត់បែកចិញ្ចើមទាំងសងខាង។

បន្ទាប់ពីកើតហេតុ សមត្ថកិច្ចបានហៅភាគីជនបង្កដើម្បីមកធ្វើការសាកសួរ និងកសាងសំណុំរឿងចាត់ការទៅតាមនីតិវិធីច្បាប់៕

ប្រភព៖ វត្តភ្នំ