កាលពីម្សិលមិញសមាជិកអង្គការលើកលែងទោសអន្តរជាតិ និងក្រុមសកម្មជនសិទ្ធិមនុស្ស មកពីប្រទេសកាណាដា ប្រមាណជិត ១០នាក់ បានចូលរួមតវ៉ាជាមួយអ្នកភូមិបឹងកក់ និងបុរីកីឡា ជាង ៥០ នាក់ បិទកំណាត់ផ្លូវនៅកណ្ដាលរាជធានីភ្នំពេញ ដោយ ស្រែកទាមទារឲ្យអាជ្ញាធរធ្វើការដោះស្រាយបញ្ហាដីធ្លីដ៏រ៉ាំរ៉ៃ របស់ពួកគេ និងដោះលែងសកម្មជនដីធ្លី អ្នកស្រីយ៉ោម បុប្ផា ដែលកំពុងជាប់ឃុំនៅពន្ធនាគារ។ ការចូលរួមតវ៉ារបស់ក្រុមសមាជិកអង្គការលើកលែងទោសអន្តរជាតិ និងសកម្មជនសិទ្ធិមនុស្សអន្តរជាតិកាលពីម្សិលមិញ គឺបានធ្វើឡើង បន្ទាប់ពីសកម្មជនស្ត្រី នៃសហគមន៍បឹងកក់ម្នាក់ ក្នុងចំណោមពីរនាក់ ត្រូវបានកម្លាំងសមត្ថកិច្ចរាជធានី វាយឲ្យរលូតកូន ក្នុងផ្ទៃ ២ខែកន្លះ នៅក្នុងការបង្ក្រាបការតវ៉ានៅមុខសាលារាជធានីកាលពីថ្ងៃចន្ទ។
សកម្មជនសិទ្ធិមនុស្សមកពីកាណាដា កញ្ញា Mathim Veda ដែលបានចូលរួមស្រែកតវ៉ា នៅលើទ្រូងផ្លូវព្រះមុនីវង្ស មុខសាលារាជធានី បានប្រាប់ភ្នំពេញ ប៉ុស្តិ៍ថា៖«មុនពេលខ្ញុំមកកម្ពុជា ខ្ញុំបានទស្សនាវីដេអូឃ្លីប តាម Facebook និង Youtube ឃើញថា ស្ត្រីនិងកុមារនៅកម្ពុជាត្រូវបានគេវាយដំយ៉ាងឃោរឃៅ ដោយសារតែការតវ៉ាទាមទារដំណោះស្រាយដីធ្លី។ អាជ្ញាធរគួរតែផ្ដល់ដំណោះស្រាយឲ្យបានសមរម្យដល់ពលរដ្ឋក្រីក្រ រងគ្រោះទាំងនេះ ជាជាងការបង្ក្រាបដោយហិង្សា»។
បញ្ហាជម្លោះដីធ្លីនៅតំបន់បឹងកក់ បានអូសបន្លាយជាង ៦ ឆ្នាំមកហើយគិតចាប់តាំងពីអតីតអភិបាលរាជធានី កែប ជុតិមា បានចុះកិច្ចសន្យាជួលតំបន់នេះឲ្យទៅលោកឡាវ ម៉េងឃីន សមាជិកព្រឹទ្ធិសភា គណបក្សប្រជាជន ក្នុងអំឡុងដើមខែកុម្ភៈឆ្នាំ ២០០៧។
កញ្ញា ជីហុង មីន(Jihong Min) សមាជិកអង្គការលើកលែងទោសអន្តរជាតិ មកពីកូរ៉េខាងត្បូង បានថ្លែងថា៖«យើងមកទីនេះ គឺដើម្បីជួយគាំទ្រស្ត្រីនិងកុមារ ក្នុងសហគមន៍បឹងកក់ ក្នុងការទាមទារយុត្តិធម៌ និងសេរីភាព សម្រាប់ស្ត្រីម្នាក់ឈ្មោះ យ៉ោម បុប្ផា»។
កញ្ញាជីហុង បន្តថា៖«យើងជឿថា អ្នកស្រីយ៉ោម បុប្ផា ពិតជារងនូវភាពអយុត្តិធម៌ខ្លាំងណាស់។ អាជ្ញាធរគួរតែដោះលែងគាត់ដើម្បីឲ្យគាត់បានជួបជុំប្ដី និងកូនតូចរបស់គាត់»។
វត្តមានរបស់ក្រុមសកម្មជនសិទ្ធិមនុស្ស មកពីក្រៅប្រទេសទាំងនេះ បានរងនូវការចោទប្រកាន់ពីក្រុមមន្ត្រីអាជ្ញាធរថា ជាអ្នកនៅពីក្រោយនៃការអុជអាលឲ្យអ្នកភូមិធ្វើការតវ៉ា។ លោក ឡុង ឌីម៉ង់ អ្នកនាំពាក្យសាលារាជធានី បានថ្លែងថា ការតវ៉ារបស់អ្នកភូមិបឹងកក់ គឺមានការជំរុញពីក្រោយដោយជនបរទេស និងអង្គការក្រៅរដ្ឋាភិបាលមួយក្ដាប់តូច។
លោកថ្លែងថា៖«វត្តមានរបស់ពួកគេ បង្ហាញថា ពួកគេជាអ្នកនៅពីក្រោយនៃការអុជអាលឲ្យអ្នកភូមិធ្វើការតវ៉ា បិទផ្លូវ។ ទោះយ៉ាងណា វត្តមានរបស់ពួកគេ មិនអាចជំរុញឲ្យមានការផ្លាស់ប្ដូរ នីតិវិធី ដោះស្រាយវិវាទដីធ្លីនេះដែរ»។
បន្ទាប់ពីឈរតវ៉ានៅលើទ្រូង ផ្លូវ ជាងពីរម៉ោង ដោយគ្មានការឆ្លើយតប ពីមន្ត្រីសាលារាជធានី ក្រុមអ្នកតវ៉ា បានបង្វែរទិសដៅឆ្ពោះទៅកាន់ភូមិគ្រឹះលោកនាយករដ្ឋមន្ត្រី ហ៊ុន សែន ក្បែរវិមានឯករាជ្យ ដើម្បីសុំកិច្ចអន្តរាគមន៍។ ប៉ុន្តែការព្យាយាមរបស់ពួកគាត់ មិនបានសម្រេចទេ ដោយក្រុមសមត្ថកិច្ចចម្រុះ បានដាក់របាំងបិទផ្លូវ និងមានការជួយឈរពាំងផ្លូវពីក្រុមសកម្មជនគណបក្សប្រជាជន ដែលកំពុងធ្វើយុទ្ធនាការឃោសនាបោះឆ្នោត។
សកម្មជនដីធ្លី ម្នាក់ អ្នកស្រីគង់ ចាន់ថា បានស្នើសុំឲ្យក្រុមសកម្មជនគាំទ្រគណបក្សប្រជាជន និងអាជ្ញាធរ បើកផ្លូវឲ្យពួកគាត់ ដោយថ្លែងថា បញ្ហាប្រឈមរបស់ពួកគាត់ ក្នុងតំបន់បឹងកក់ កើតឡើងដោយសារការអភិវឌ្ឍគ្មានតម្លាភាព ទើបពួកគាត់មករកប្រមុខរដ្ឋាភិបាលឲ្យជួយ។ អ្នកស្រីបន្តថា៖ «អាជ្ញាធររាជធានីពន្យារការដោះស្រាយម្ដងហើយម្ដងទៀត ហាក់ដូចមិនខ្វល់ពីក្ដីទុក្ខវេទនារបស់យើងខ្ញុំជាពលរដ្ឋក្រីក្រ ទេ»។
នៅពេលនោះ ក្រុមសកម្មជនគាំទ្រគណបក្សប្រជាជន គិតតែពីនាំគ្នាស្រែកតាមមីក្រូថា៖«បោះឆ្នោតជូនគណបក្សប្រជាជន លេខរៀងទី៤»។ «គណបក្សប្រជាជនហ៊ានធ្វើហ៊ានទទួលខុសត្រូវ គណបក្សប្រជាជនធានាលើកកម្ពស់សិទ្ធិស្ត្រីនិងកុមារ»។ ខណៈនោះក្រុមអ្នកតវ៉ា បានលើកផ្ទាំងបដារូបភាព នៃការប្រើហិង្សាមកលើក្រុមអ្នកតវ៉ាជាស្រ្តីនិងកុមារបង្ហាញពួក សកម្មជនទាំងនោះហើយស្រែកថា៖«ប៉ុន្តែលោកកែប ជុតិមា មិនដែលទទួលខុសត្រូវនោះទេ»។
ភ្លាមៗនោះ តំណាងក្រុមអ្នកតវ៉ាបានអំពាវនាវកុំឲ្យក្រុមអ្នកតវ៉ា ប៉ះពារពាក្យសម្តីជាមួយក្រុមសកម្មជនគណបក្ស។ ក្រុមអ្នកតវ៉ា បានខំប្រឹងប្រែងរុញច្រានជាមួយក្រុមសមត្ថកិច្ច ដើម្បីរុលចូលទៅមុខភូមិគ្រឹះលោកនាយករដ្ឋមន្ត្រី ប៉ុន្តែមិនបានសម្រេចឡើយដោយសារកម្លាំងសមត្ថកិច្ចមានចំនួនច្រើន ជាងពួកគេលើសលប់។
លោក កែម ឡី អ្នកវិភាគឯករាជ្យបានថ្លែងថា ជម្លោះដីធ្លី ដែលកើតឡើងដោយសារការផ្ដល់ដីសម្បទានសេដ្ឋកិច្ច និងការច្បាមយកដីពីប្រជាពលរដ្ឋក្រីក្រ ដែលធ្វើឲ្យមានការតវ៉ា ហើយមានការបង្ក្រាបជាបន្តបន្ទាប់ បើទោះបីជាការបោះឆ្នោតជិតចូលមកដល់ក្តី វាជាសញ្ញាបង្ហាញពីការកើតមានវិបត្តិដីធ្លី នៅតែបន្តអូសបន្លាយវែងឆ្ងាយទៅមុខទៀត។
លោកបានបញ្ជាក់ថា៖«បញ្ហាដីធ្លីនៅតែបន្តកើតមានដែលមិនអាច ដោះស្រាយបាន ប្រសិនបើគណបក្សប្រជាជនឈ្នះឆ្នោត។ ទោះជាបែបណាគណបក្សសង្គ្រោះជាតិ ក៏ដូចជាគណបក្សដទៃទៀតដែរ នឹងមិនអាចដោះស្រាយឲ្យបានសម្រេចក្នុងរយៈពេលខ្លីបានទេគឺទាមទារ ពេលវេលាយូរអង្វែង តិចបំផុតក៏៥ ឆ្នាំដែរទើបអាចដោះបាន»៕
ប្រភពពី៖ Cambodia page
No comments:
Post a Comment