រដ្ឋមន្ដ្រីការពារជាតិអាមេរិក លោក Chuch Hagel បានប្រកាសថា ប្រសិនបើប្រធានាធិបតី អូបាម៉ា ចេញបញ្ជាឱ្យប្រើប្រាស់ កម្លាំងយោធាទៅលើស៊ីរីនោះ ទាហាន នឹងធ្វើសកម្មភាពភ្លាមៗ ដោយពេលនេះទាហានអាមេរិក បានត្រៀមលក្ខណៈ រួចជាស្រេចហើយ ។ លោក Chuch Hagel បញ្ជាក់ទៀតថា កម្លាំងទាហានអាមេរិក បានបញ្ជូនទៅកាន់សមុទ្រមេឌីទែរ៉ាណេ រួមជាមួយយន្ដហោះ ចម្បាំងមួយចំនួនទៀតផង ។ ទីតាំងនានាក្នុងប្រទេសស៊ីរី កំពុងស្ថិតក្នុងគោលដៅ នៃការវាយប្រហារពីកាំជ្រួច មីស៊ីលចេញពីនាវាចម្បាំងទាំងនោះ ។
អាមេរិកក៏មាន នាវាផ្ទុកយន្ដហោះ ២គ្រឿងដែល កំពុងតែឈរជើងនៅ ឈូងសមុទ្រពែក្ស អាចចូលរួមវាយប្រហារគ្រប់ពេល ហើយទីតាំងទ័ពអាកាសនៅប្រទេសទួរគី ក៏នឹងត្រូវបានប្រើប្រាស់ ក្នុងការវាយប្រហារ ស៊ីរី ផងដែរ។ ទន្ទឹមនឹងសកម្មភាព ត្រៀមធ្វើសង្គ្រាមនៅប្រទេសស៊ីរី ប្រធានាធិបតី បារ៉ាក់ អូបាម៉ា បានជួប សន្ទនាគ្នាតាមទូរស័ព្ទ ជាមួយមេដឹកនាំសំខាន់ៗជាច្រើន ក្នុងនោះមាននាយករដ្ឋមន្ដ្រីអូស្ដ្រាលី ប្រធានាធិបតីបារាំង និង នាយករដ្ឋមន្ដ្រីអង់គ្លេសជាដើម។
រដ្ឋមន្ដ្រីការបរទេសអាមេរិក លោកចន ឃេរី ក៏បានជួបពិភាក្សា ជាមួយអគ្គលេខាធិការ អង្គការសហប្រជាជាតិ លោកបាន គីមូន ស្ដីពីបញ្ហាវាយប្រហារ ប្រទេសស៊ីរី ផងដែរ ។ ប្រធានាធិបតីអាមេរិក នៅមិនទាន់អាចចេញ សេចក្ដីសម្រេចចុងក្រោយ ឱ្យប្រើប្រាស់ កម្លាំងទាហាន ទៅលើប្រទេសស៊ីរី នៅឡើយទេ ប៉ុន្ដែលោកអាចចេញបញ្ជា ឱ្យវាយប្រហារមានពេលកំណត់ ដូចដែលបានធ្វើ ទៅលើប្រទេសលីប៊ី ។ បារាំង អង់គ្លេស ក៏នឹងចូលរួមសកម្មភាពវាយប្រហារនោះដែរ ដោយកន្លងមក មន្ដ្រីជាន់ខ្ពស់យោធា បារាំងបានបង្ហាញពីយុទ្ធសាស្ដ្រវាយប្រហារ មុនអាមេរិកទៀតផង បើអាមេរិកមិនចូលរួមទេនោះ ៕
No comments:
Post a Comment