ខេត្តព្រះសីហនុ ៖ មានរឿងរ៉ាវគួរឲ្យភ្ញាក់ផ្អើលមួយបានកើតឡើង កាលពីវេលាម៉ោង៦ល្ងាច ថ្ងៃទី២៨ ខែសីហា ឆ្នាំ២០១៣ ដោយសារតែមានស្ត្រីម្នាក់ ដែលជាភ្ញៀវទេសចរបានស្នាក់នៅក្នុងសណ្ឋាគារ សុខា បានលង់ទឹកស្លាប់នៅចំណុចមាត់ឆ្នេរក្នុងសណ្ឋាគារ សុខា ក្រុងព្រះសីហនុ ប៉ុន្តែត្រូវបានខាងសណ្ឋាគារព្យាយាមលាក់បាំងរឿងនេះ មិនឲ្យលេចឮទៅខាងក្រៅនោះទេ។
បើតាមប្រភពពីសាច់ញាតិរបស់ជនរងគ្រោះម្នាក់បានឲ្យដឹងថា ជនរងគ្រោះមានឈ្មោះ ឈួរ អៀងគៀង អាយុ ៦៦ឆ្នាំ មានទីលំនៅក្រុងភ្នំពេញ មាន មុខរបរជាអាជីវករ ជាភ្ញៀវទេសចរណ៍ស្នាក់នៅក្នុងសណ្ឋាគារសុខា ក្រុងព្រះសីហនុ ដោយមកធ្វើការកម្សាន្តជាលក្ខណៈក្រុមគ្រួសារ ។
ជុំវិញករណីមានភ្ញៀវលង់ទឹកស្លាប់ខាងលើ ត្រូវបានសណ្ឋាគារបិទបាំងមិនឲ្យបែកឮចេញទៅខាងក្រៅ នោះទេ ដោយហាមមិនឲ្យសមត្ថកិច្ចនិងក្រុមអ្នកកាសែតចុះយកព័ត៌មាន ឬថតរូបនោះទេ ដោយខ្លាចប៉ះពាល់ដល់កិត្តិយសសណ្ឋាគារលំដាប់ផ្កាយ៥របស់គេ ហើយថែមទាំងបានប្រាប់ទៅខាងក្រុមគ្រួសារសាច់ញាតិរបស់ជនរងគ្រោះ កុំផ្តល់បទសម្ភាសន៍ ឬ និយាយអ្វីជាមួយក្រុមអ្នកសារព័ត៌មានឲ្យសោះ។
បន្ទាប់ពីកើតហេតុភ្លាមៗ ខាងភាគីសណ្ឋាគារបានប្រើល្បិចជម្លៀសសាកសពចេញពីកន្លែងកើតហេតុ ដោយបានបញ្ជូនតាមរថយន្តទៅធ្វើការសង្គ្រោះនៅមន្ទីរពេទ្យបង្អែកចំការចេក ប៉ុន្តែតាមការពិតជនរងគ្រោះបានស្លាប់ដាច់ខ្យល់តាំងពីក្នុងសណ្ឋាគារមកម្ល៉េះ។
បច្ចុប្បន្នសាកសពរបស់ជនរងគ្រោះ ត្រូវបានក្រុមគ្រួសារដឹកយកមកធ្វើបុណ្យតាមប្រពៃណីនៅរាជធានីភ្នំពេញ។ ទាក់ទិននឹងបញ្ហាខាងលើនេះ ប្រជាពលរដ្ឋបានសម្តែងនូវការហួសចិត្តយ៉ាងខ្លាំង មិនគួរសណ្ឋាគារដែលជាប់លំដាប់ផ្កាយ៥ បែរជាខ្វះការយកចិត្តទុកចំពោះសុវត្ថិភាពភ្ញៀវបែបនេះសោះ ៕
ប្រភពពី៖ វត្តភ្នំ
No comments:
Post a Comment