Thursday, June 20, 2013
ការចំណាយរបស់ជនបរទេសនៅរាជធានីភ្នំពេញបន្តកើនឡើង
ទីក្រុងតូក្យូ របស់ប្រទេសជប៉ុន បានបាត់បង់ចំណាត់ថ្នាក់ទី១ ជាទីក្រុងដែលការចំណាយរបស់ជនបរទេសច្រើនបំផុតក្នុងពិភពលោក និងត្រូវជំនួសដោយទីក្រុងអូស្លូ របស់ប្រទេសន័រវេស។ បច្ចុប្បន្ននេះទីក្រុងតូក្យូ ជាប់ចំណាត់ថ្នាក់ទី៦ក្នុងនាមទីក្រុងដែលចំណាយខ្ពស់បំផុត។ បន្ទាប់ពីទីក្រុងអូស្លូ មកគឺទីក្រុងលូអង់ដា របស់ប្រទេសអង់ហ្គោឡា ជាប់ចំណាត់ថ្នាក់ទី២ ទីក្រុងស្ទេវិលជ័រ របស់ប្រទេសន័រវេស លេខ៣ ទីក្រុងជូបា របស់ប្រទេសស៊ូដង់ខាងត្បូង លេខ៤ និងទីក្រុងម៉ូស្គូ របស់ប្រទេសរុស្ស៊ី ជាប់លេខ៥។
ការអង្កេតរបស់ក្រុមហ៊ុន ECA International បានរៀបចំឡើងពីរដងក្នុងមួយឆ្នាំ ដោយធ្វើការប្រៀបធៀបតម្លៃទំនិញប្រើប្រាស់និងសេវាកម្មដែលនិយោជិត នៅក្នុងតំបន់ជាង៤០០កន្លែងនៅជុំវិញពិភពលោក បានទិញប្រើប្រាស់។
នៅទ្វីបអាស៊ី ទីក្រុងរបស់ប្រទេសជប៉ុន នៅតែគ្រប់គ្រងតំណែងជាទីក្រុងដែលចំណាយខ្ពស់ជាងគេសម្រាប់ការរស់ នៅដដែល ពោលគឺចំណាត់ថ្នាក់ចំនួន៤ក្នុងចំណោមទីតាំងដែលចំណាយខ្ពស់ជាងគេ បំផុតទាំង៥នៅក្នុងតំបន់គឺនៅប្រទេសជប៉ុន។ ទីក្រុងសេអ៊ូល ប្រទេសកូរ៉េខាងត្បូង ក៏មានវត្តមានក្នុងតារាងចំណាត់ថ្នាក់នេះដែរ ដោយលោតពីចំណាត់ថ្នាក់លេខ៧ មកនៅចំណាត់ថ្នាក់លេខ៣ ក្នុងនាមជាទីក្រុងដែលចំណាយខ្ពស់ជាងគេបំផុតនៅក្នុងតំបន់អាស៊ី និងឡើងពីចំណាត់ថ្នាក់ទី២៩ មកចំណាត់ថ្នាក់ទី១៤ ក្នុងនាមជាទីក្រុងចំណាយខ្ពស់បំផុតនៅទូទាំងពិភពលោក។ មិនត្រឹមតែតម្លៃទំនិញ និងសេវាកម្មទេ ដែលបានកើនឡើងខ្ពស់ជាងតម្លៃកាលពីឆ្នាំមុននោះ តែតម្លៃរូបិយប័ណ្ណក្នុងស្រុកវិញក៏បានឡើងថ្លៃផងដែរបើធៀបនឹង រូបិយប័ណ្ណធំៗដោយជំរុញឲ្យការចំណាយនៅតាមទីក្រុងទាំងនោះកើនឡើង ខ្ពស់សម្រាប់ជនបរទេសជាច្រើន។
ទីក្រុងប៉េកាំង ជាប់ចំណាត់ថ្នាក់ទី២៤ ទីក្រុងស៊ាងហៃ ជាប់ចំណាត់ថ្នាក់ទី២៦ ប្រទេសសិង្ហបុរី ចំណាត់ថ្នាក់ទី៣៦ និងទីក្រុងហុងកុង ចំណាត់ថ្នាក់ទី៣៨ បានឈរនៅក្នុងតារាងចំណាត់ថ្នាក់កំពូលទាំង១០ក្នុងនាមជាទីក្រុង ដែលចំណាយខ្ពស់បំផុតក្នុងការរស់នៅក្នុងតំបន់អាស៊ី។ គិតជាមធ្យម តម្លៃទំនិញប្រើប្រាស់នៅក្នុងបញ្ជីចំណាយរស់នៅប្រចាំថ្ងៃដែល អង្កេតដោយក្រុមហ៊ុន ECA នៅតាមទីតាំងមួយចំនួនក្នុងប្រទេសចិន បានកើនឡើងបន្តិច ឬធ្លាក់ចុះបន្តនៅក្នុងឆ្នាំនេះ។ ជាលទ្ធផលទីតាំងមួយចំនួននៅប្រទេសចិន បានធ្លាក់ចំណាត់ថ្នាក់បន្តិច តែកំណើនថ្លៃប្រាក់យន់ជាបន្តបន្ទាប់បើធៀបនឹងរូបិយប័ណ្ណធំៗផ្សេង ទៀតគឺជាកត្តាទប់ស្កាត់ទីក្រុងទាំងនោះមិនឲ្យធ្លាក់ចំណាត់ថ្នាក់ ខ្លាំងក្នុងនាមជាទីក្រុងដែលចំណាយខ្ពស់សម្រាប់ការរស់នៅប្រចាំ ថ្ងៃ។
ទីក្រុងហុងកុង ដែលជាប់ចំណាត់ថ្នាក់ទី៣៨នៅក្នុងតារាងរបស់ពិភពលោក និងជាប់ចំណាត់ថ្នាក់ទី១០ក្នុងនាមជាទីក្រុងដែលចំណាយខ្ពស់ជាងគេ នៅតំបន់អាស៊ីការចំណាយរស់នៅក្នុងទីក្រុងមួយនេះ គ្រាន់តែធ្លាក់ចុះបន្តិចតែប៉ុណ្ណោះ។ តម្លៃទំនិញ និងសេវាកម្មនៅក្នុងតារាងបញ្ជីចំណាយរស់នៅរបស់ក្រុមហ៊ុន ECA បានកើនឡើងប្រមាណ៤ភាគរយក្នុងមួយឆ្នាំគិតជាមធ្យមនៅតាមតំបន់ ទាំងនោះ ពោលអត្រាកំណើននេះ មានកម្រិតទាបជាងឆ្នាំមុនៗ នៅពេលដែលតម្លៃទំនិញ និងសេវាកម្ម បានកើនឡើងជាមធ្យម៦ភាគរយ។ ដោយសារអត្រាប្តូរប្រាក់ដុល្លារហុងកុង និងដុល្លារអាមេរិកមានស្ថិរភាពនោះ ការចំណាយរស់នៅរបស់ជនបរទេសនៅទីក្រុងនេះនៅតែមានស្ថិរភាពដដែល។
តំបន់មួយចំនួនក្នុងប្រទេសឥណ្ឌា នៅតែជាតំបន់ដែលចំណាយមានសភាពតិចជាងគេនៅទ្វីបអាស៊ី ទាំងការចំណាយរស់នៅរបស់ជនបរទេស។ រដ្ឋធានីញូវដែលី របស់ប្រទេសឥណ្ឌា ជាប់ចំណាត់ថ្នាក់ទី២០០នៅទូទាំងពិភពលោក ខណៈទីក្រុងបុមប៉ៃ ជាប់ចំណាត់ថ្នាក់ទី២១៥។
ទីក្រុងការ៉ាជី របស់ប្រទេសប៉ាគីស្ថាន ជាប់ចំណាត់ថ្នាក់ទី២៥៦ក្នុងពិភពលោក ពោលគឺជាទីក្រុងដែលចំណាយសម្រាប់រស់នៅមានរបស់ជនបរទេសសភាពទាបជាង គេបំផុតក្នុងពិភពលោក៕ BP
ប្រភព ភ្នំពេញ ប៉ុស្តិ៏
Subscribe to:
Post Comments (Atom)
No comments:
Post a Comment