ការបំផ្លាញព្រៃឈើនៅស្រុកវាលវែងនិងភ្នំក្រវ៉ាញ ជាប្រភពសេដ្ឋកិច្ចរបស់លោក គឹម ចិន្តា
ខេត្តពោធិ៍សាត់ ៖ លោក គឹម ចិន្តា នាយខណ្ឌរដ្ឋបាលព្រៃឈើខេត្តពោធិ៍សាត់ មានភាពធូររលុងមិនដែលហ៊ានចេញមុខបង្ក្រាបការ ដឹកជញ្ជូនឈើខុសច្បាប់ របស់ក្រុមឈ្មួញទាំងតូចទាំងធំឆ្លងកាត់ខេត្តពោធិ៍សាត់ យ៉ាងគគ្រឹកគគ្រេងទាំងយប់ទាំងថ្ងៃនោះទេ ដែលគេសង្ស័យថាក្រុមឈ្មួញរកស៊ីកាប់បំផ្លាញនិងដឹកជញ្ជូនឈើ ខុសច្បាប់យ៉ាងអនាធិបតេយ្យទាំងនោះ ទំនងជាមានការត្រូវរ៉ូវបង់លុយបង់កាក់ជូនលោក គឹម ចិន្តា ផងដែរហើយមើលទៅ ទើបពួកគេអាចធ្វើសកម្មភាពរកស៊ីដឹកជញ្ជូនឈើខុសច្បាប់យ៉ាងអនាធិបតេយ្យ ពេញបន្ទុក គ្មានក្រែងញញើតច្បាប់ទម្លាប់អ្វីឡើយ។
សេចក្តីរាយការណ៍ពីខេត្តពោធិ៍សាត់បានឲ្យដឹងថា ក្នុងភូមិសាស្ត្រស្រុកវាលវែង និងស្រុកភ្នំក្រវាញ មានការដាក់ម៉ាស៊ីនរ៉ៃសម្រាប់អារច្រៀកឈើរាប់សិបកន្លែង ហើយប្រភេទឈើជាច្រើនដូចជាបេង ធ្នង់ ផ្ចឹក នាងនួន ត្រូវបានក្រុមឈ្មួញកាប់បំផ្លាញយ៉ាងរាលដាលនៅតាមតំបន់អភិរក្ស ហើយអូសយកមកអារច្រៀកនៅតាមចំណុចរោងសិប្បកម្មជាច្រើនកន្លែង ដែលដាក់បង្កប់នៅក្នុងព្រៃ។ រោងសិប្បកម្មកែច្នៃឈើទាំងនោះប្រើប្រាស់ម៉ាស៊ីនរ៉ៃ ផ្ទុយពីបទបញ្ជាលេខ០១ របស់រាជរដ្ឋាភិបាលកម្ពុជា ប៉ុន្តែក្រុមឈ្មួញអាចធ្វើសកម្មភាពទៅបានក៏ព្រោះតែមានការបើកភ្លើង ខៀវពីប្រធានមន្ទីរបរិស្ថានខេត្តពោធិ៍សាត់ជាពិសេសជំនាញរដ្ឋបាល ព្រៃឈើរបស់លោក គឹម ចិន្តា តែម្តង។
សកម្មភាពកាប់បំផ្លាញព្រៃឈើក្នុងតំបន់អភិរក្ស នៅស្រុកវាលវែងនិងស្រុកភ្នំក្រវាញ នាពេលបច្ចុប្បន្ននេះ មានរូបភាពអនាធិបតេយ្យខ្លាំងបំផុត ហើយគេសង្កេតឃើញឈើហ៊ុបមូលគ្រប់ប្រភេទទាំងឈើមិនទាន់គ្រប់អាយុ ក៏ត្រូវបានក្រុមឈ្មួញ កាប់បំផ្លាញយ៉ាងវិនាសហិនហោច ប្រមូលយកមកអារច្រៀកនៅចំណុចរោងសិប្បកម្មខុសច្បាប់រាប់សិបកន្លែង គេមិនដែលឃើញជំនាញរដ្ឋបាលព្រៃឈើហើបមាត់ឬចុះបង្ក្រាបម្តងណាឡើយ។ ក្រុមឈ្មួញក៏មានទំនាក់ទំនងល្អជាមួយអាជ្ញាធរផងដែរ ទើបគេមិនដែលឃើញលោក ខូយ សុខា ជាអភិបាលខេត្តពោធិ៍សាត់ចេញបទបញ្ជាឲ្យសមត្ថកិច្ចពាក់ព័ន្ធចុះទៅ បង្ក្រាបរោងម៉ាស៊ីនរ៉ៃ កែច្នៃអារច្រៀកឈើខុសច្បាប់ទាំងនោះឲ្យស្របតាមបទបញ្ជារបស់ រាជរដ្ឋាភិបាលម្តងណាឡើយ ។
នៅក្នុងខេត្តពោធិ៍សាត់នេះផងដែរ ក៏មានការដឹកជញ្ជូនឈើគ្រញូងឆ្លងកាត់យ៉ាងអនាធិបតេយ្យបំផុត ដោយក្រុមឈ្មួញបានប្រើប្រាស់រថយន្តទំនើបៗដឹកជញ្ជូនទាំងយប់ទាំង ថ្ងៃ ហើយរាល់ការដឹកជញ្ជូនឈើ គ្រញូងខុសច្បាប់ឆ្លងកាត់ខេត្តពោធិ៍សាត់ ស្ទើរខូងផ្លូវទៅហើយ គេមិនដែលឃើញជំនាញរដ្ឋបាលព្រៃឈើរបស់លោក គឹម ចិន្តា បង្ក្រាបការដឹកជញ្ជូនឈើខុសច្បាប់ទាំងនោះយកស្នាដៃទៅបង្អួតថ្នាក់លើ នោះទេ ហើយកន្លងមកគេសង្កេតឃើញជំនាញរដ្ឋបាលព្រៃឈើរបស់លោក គឹម ចិន្តា រងចាំតែទទួលវត្ថុតាងជារថយន្តនិងឈើល្មើសច្បាប់ដែលសមត្ថកិច្ចដទៃ ចេញមុខបង្ក្រាបជំនួសតែប៉ុណ្ណោះ ដូចដែលមន្ត្រីតូចតាចមួយចំនួនបានបង្ហើបឲ្យដឹងថា លោក គឹម ចិន្តា មិនចង់បានស្នាដៃយកទៅបង្អួតថ្នាក់លើទេ គឺគាត់ចង់បានតែលុយយកទៅច្រកហោប៉ៅសម្រាប់ធ្វើមានធ្វើបាន ផ្ទាល់ខ្លួនប៉ុណ្ណោះ។
លោក ឆេង គឹមស៊ុន ជាប្រធានរដ្ឋបាលព្រៃឈើគួរតែយកចិត្តទុកដាក់ពីភាពអនាធិបតេយ្យនៃ ការកាប់បំផ្លាញព្រៃឈើខុសច្បាប់ ជាពិសេសការដាក់តាំងម៉ាស៊ីនអារច្រៀកកែច្នៃឈើយ៉ាងគគ្រឹកគគ្រេង ក្នុងស្រុកវាលវែង និងស្រុកភ្នំក្រវាញ ខេត្តពោធិ៍សាត់ឡើងវិញជាបន្ទាន់ មិនគួរទុកឱកាសឲ្យលោក គឹម ចិន្តា ធ្វើអ្វីៗតាមតែអំពើចិត្តនោះទេ ព្រោះទំហំនៃការបំផ្លាញព្រៃឈើនៅក្នុងខេត្តពោធិ៍សាត់ទាំងមូល គួរឲ្យភ័យខ្លាចនិងព្រួយបារម្ភបំផុត។ គេកំពុងតាមដានយ៉ាងយកចិត្តទុកដាក់ ថាតើលោក ខូយ សុខា ជាអភិបាលខេត្តពោធិ៍សាត់ មានឆន្ទៈលុបបំបាត់ភាពអសកម្មនៃការបំផ្លាញព្រៃឈើខុសច្បាប់យ៉ាង មហន្តរាយក្នុងស្រុកវាលវែង និងស្រុកភ្នំក្រវាញ តាមអនុសាសន៍របស់សម្តេចនាយករដ្ឋមន្ត្រី ឬក៏យ៉ាងណា៕
ប្រភព Watphnom News
No comments:
Post a Comment